ཕྱི་ལོ་ ༢༠༡༩ ཟླ་ ༨ ཚེས་ ༣ རེས་གཟའ་སྤེན་པ།
༄༅། །ཕྱི་ལོ་ ༢༠༡༩ ཟླ་ ༨ ཚེས་ ༣ ཉིན་གྱི་སྔ་དྲོ་ཆུ་ཚོད་ ༩ ཙམ་ལ་ཨ་རིའི་མང་གཙོ་ཚོགས་པ་དང་སྤྱི་མཐུན་ཚོགས་པའི་གྲོས་ཚོགས་འཐུས་མི་དྲུག་ལས་གྲུབ་པའི་ཆེས་མཐོའི་སྐུ་ཚབ་ཚོགས་ཆུང་ཞིག་གངས་སྐྱིད་བཀའ་ཤག་ཚོགས་ཁང་དུ་ཕེབས་ནས། དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་དབུས་བཀའ་བློན་རྣམ་པ་དང་མཇལ་འཕྲད་གནང་འདུག ཆུ་ཚོད་གཅིག་ཙམ་གྱི་མཇལ་འཕྲད་གྲུབ་མཚམས་ཚོགས་ཆུང་གི་ཚོགས་གཙོ་མང་གཙོ་ཚོགས་པའི་གྲོས་ཚོགས་འཐུས་མི་སྐུ་ཞབས་ཌེ་ཝི་ཌི་ David Price མཆོག་གིས་གསར་འགོད་པར།
ཐེངས་འདིར་ཁོང་རྣམས་རྡ་སར་བཅར་དགོས་དོན་གཙོ་བོ་ནི་བོད་མིའི་ཆོས་དང་རིག་གཞུང་སྲུང་སྐྱོབ་ལ་རྒྱབ་སྐྱོར་ཞུ་ཆེད་དང་། བོད་མིར་གདུང་མཉམ་སྐྱེ་ཐོག་བོད་ནང་རང་དབང་སླར་གསོའི་ལས་འགུལ་ལ་རྒྱབ་སྐྱོར་གྱི་རྣམ་པ་མཚོན་ཆེད་བཅར་བ་ཡིན་སྐོར་དང་།
དེ་བཞིན་ཁོང་གིས་བཀའ་ཤག་ལྷན་རྒྱས་མཇལ་འཕྲད་ཡག་པོ་བྱུང་སྐོར་དང་། མཇལ་འཕྲད་གྲུབ་བསྟུན་༸རྒྱལ་བའི་ཕོ་བྲང་དུ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་མཇལ་ཁ་ཞུ་རྒྱུ་ཡིན་སྐོར་གསུངས།
དེ་ཡང་སྐུ་ཚབ་འཐུས་མི་རྣམས་བཀའ་ཤག་ཏུ་དཔལ་ལྡན་སྲིད་སྐྱོང་མཆོག་གིས་དབུས་བཀའ་བློན་རྣམས་དང་མཇལ་འཕྲད་སྐབས། ཁོང་ཚོས་འཛམ་གླིང་ཁྱོན་དུ་མང་གཙོའི་རིང་ལུགས་སྲ་བརྟན་གོང་འཕེལ་ལ་རྒྱབ་སྐྱོར་གནང་བཞིན་ཡོད་པ་མ་ཟད།
ལྷག་པར་བོད་མིའི་སྒྲིག་འཛུགས་ཀྱི་མང་གཙོའི་ལམ་བཟང་ཐོག་ཤར་སྐྱོད་བྱེད་བཞིན་པར་རྒྱབ་སྐྱོར་ཡོད་སྐོར་གསུངས། འཐུས་མི་ཁག་གཅིག་གི་དྲི་བ་དང་འབྲེལ་ནས་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་བཙན་བྱོལ་བོད་མིའི་མང་གཙོའི་འཕེལ་རིམ་དང་། བོད་མིའི་སྒྲིག་འཛུགས་ཀྱི་ལྷན་ཁང་ཁག་ངོ་སྤྲོད་དང་ལས་དོན་བྱེད་ཕྱོགས་སྐོར་ངོ་སྤྲོད་གནང་འདུག་པ་བཅས།
