ཕྱི་ལོ་ ༢༠༡༩ ཟླ་ ༨ ཚེས་ ༢༠ རེས་གཟའ་མིག་དམར།
༄༅། །མདྷ་ཡ་པར་ཌེ་ཤི་མངའ་སྡེའི་སྤྱི་ཁྱབ་བློན་ཆེན་ཟུར་པ་སྐུ་ཞབས་ཤིབ་རཇཱ་སིང་ཅོའ་ཧན་ Shivraj Singh Chouhan མཆོག་གིས་ཕྱི་ལོ་ ༢༠༡༩ ཟླ་ ༨ ཚེས་ ༢༠ རེས་གཟའ་མིག་དམར་ཉིན་གྱི་སྔ་དྲོ་ཆུ་ཚོད་ ༡༡ ཙམ་ལ་གངས་སྐྱིད་བཀའ་ཤག་ཚོགས་ཁང་དུ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་དང་མཇལ་འཕྲད་གནང་ཡོད།
སྐབས་དེར་དཔལ་ལྡན་སྲིད་སྐྱོང་མཆོག་གིས་འཚམས་འདྲིའི་མཇལ་དར་ཕུལ་བ་དང་ལྷན། སྤྱི་ཁྱབ་བློན་ཆེན་ཟུར་པ་མཆོག་ལ་སྟོན་པའི་སྐུ་ཐང་ཞིག་དང་བོད་མིའི་སྒྲིག་འཛུགས་བཀའ་ཤག་གི་དྲན་རྟེན་ཕྱག་རྟགས་ཕུལ་གྲུབ་མཚམས་གསུང་དོན། འཕགས་བོད་གཉིས་ཀྱི་དབར་ཆོས་དང་རིག་གཞུང་གི་འབྲེལ་བ་གཏིང་ཟབ་ཡོད་པ་མ་ཟད། རྒྱ་གར་གནའ་རབས་ཀྱི་ལེགས་བཤད་བསྐྱར་གསོ་བྱེད་རྒྱུ་གལ་ཆེན་ཡིན་པ་དང་། བོད་མི་རྣམས་ལ་མཚོན་ན་རྒྱ་གར་གཞུང་མང་གཉིས་ལས་ལྷག་པའི་བཀའ་དྲིན་ཆེ་བ་ཞིག་འཛམ་གླིང་ནང་མེད་སྐོར་སོགས་གསུངས།
དེ་ནས་སྐུ་ཞབས་ཤིབ་རཇཱ་སིང་ཅོའ་ཧན་མཆོག་གིས་བོད་མི་རྣམས་ལ་གདུང་སེམས་མཉམ་སྐྱེའི་ཚུལ་དུ་ང་ཚོས་མཉམ་རུབ་ཀྱིས་བོད་དོན་སྤྱི་དང་། ལྷག་པར་འཛམ་གླིང་རྒྱལ་ཁབ་ཡོངས་ཀྱི་ཆེད་འཕྱར་གྲུ་མཉམ་འདེགས་བྱེད་རྒྱུ་ཡིན། ཅེས་གསུངས།
མཇལ་འཕྲད་སྐབས་བོད་མིའི་སྒྲིག་འཛུགས་ཀྱི་ནང་སྲིད་བཀའ་བློན་འཁོར་ལྷ་ཚང་བསོད་ནམས་སྟོབས་རྒྱལ་མཆོག་དང་། དཔལ་འབྱོར་བཀའ་བློན་ཀརྨ་ཡེ་ཤེས་མཆོག ཤེས་རིག་བཀའ་བློན་པདྨ་དབྱངས་ཅན་མཆོག འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་མཆོག་བཅས་ཆེད་ཕེབས་གནང་ཡོད་པ་བཅས། །
