ཕྱི་ལོ་ ༢༠༡༩ ཟླ་ ༨ ཚེས་ ༢༡ རེས་གཟའ་ལྷག་པ།

༄༅། །བྱང་ཨ་རིའི་སྐུ་ཚབ་དོན་ཁང་དང་ཨེ་མོ་རི་གཙུག་ལག་སློབ་ཁང་གཉིས་མཉམ་རུབ་ཐོག་ཆོས་ལུགས་ལ་མ་བརྟེན་པའི་བཟང་སྤྱོད་དང་ན་གཞོན་འགོ་ཁྲིད་ཟབ་སྦྱོང་ཐེངས་གཉིས་པ་གོ་སྒྲིག་གནང་འདུག
དེ་ཡང་ཟབ་སྦྱོང་མཇུག་སྒྲིལ་ཉིན་སྐུ་མགྲོན་གཙོ་བོར་ཞྭ་དཀར་བསྟན་པའི་གཙུག་རྒྱན་༧སྐྱབས་རྗེ་རྒྱལ་བ་སྨན་རི་བའི་ཁྲི་འཛིན་ ༣༤ པ་ལུང་རྟོགས་ཟླ་བ་དར་རྒྱས་རིན་པོ་ཆེ་མཆོག་གདན་འདྲེན་ཞུས་འདུག
སྐབས་དེར་ཞྭ་དཀར་བསྟན་པའི་གཙུག་རྒྱན་༸སྐྱབས་རྗེ་སྨན་རིའི་ཁྲི་འཛིན་ ༣༤ པ་རིན་པོ་ཆེ་མཆོག་གིས་བོད་མི་རྣམས་ཆོལ་ཁ་དང་ཆོས་ལུགས་ཀྱི་འཐེན་འཁྱེར་མེད་པར་དམ་ཚིག་རྡོག་རྩ་གཅིག་བསྒྲིལ་དགོས་གལ་དང་། ལྷག་པར་གཞོན་སྐྱེས་ཚོས་བོད་སྤྱི་པའི་རྩ་དོན་ལ་གནོད་པའི་ཆོལ་ཁ་དང་ཆོས་ལུགས་ཀྱི་འཐེན་འཁྱེར་མེད་པར་གཙོ་བོ་བོད་ཀྱི་རྒྱབ་ལྗོངས་ལོ་རྒྱུས་དང་།  སྐད་ཡིག་རིག་གཞུང་དང་བཅས་པ་མི་ཉམས་གོང་འཕེལ་ཐོག་དོ་ཁུར་དགོས་པའི་བླང་དོར་ལམ་སྟོན་མཛད་གནང་འདུག

བྱང་ཨ་རིའི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་ཀྱིས་མཐུན་འགྱུར་གནང་མཁན་འབྲེལ་ཡོད་ཡོངས་དང་།  ལྷག་པར་ཞྭ་དཀར་བསྟན་པའི་གཙུག་རྒྱན་༸སྐྱབས་རྗེ་སྨན་རིའི་ཁྲི་འཛིན་ ༣༤ པ་རིན་པོ་ཆེ་མཆོག་ཆེད་ཕེབས་གནང་བར་ཐུགས་རྗེ་ཆེ་ཞུས་འདུག

ཟབ་སྦྱོང་དེ་བཞིན་ཟླ་འདིའི་ཕྱི་ཚེས་ ༡༦ ནས་ ༡༨ བར་ནིའུ་ཡོག་དང་ནིའུ་ཇར་སིའི་བོད་རིགས་སྤྱི་མཐུན་ཚོགས་པའི་ཚོགས་ཁང་དུ་ཚོགས་གནང་འདུག་པ་དང་། ཟབ་སྦྱོང་ཐོག་དུས་རབས་ ༢༡ པའི་འགོ་ཁྲིད་དང་། བོད་མཐོ་སྒང་གི་ཁོར་ཡུག  ཨ་རིིིའི་གཞུང་གི་བོད་དོན་དང་འབྲེལ་བའི་སྲིད་བྱུས།  དབུ་མའི་ལམ་གྱི་སྲིད་བྱུས།  དེ་བཞིན་ཆོས་ལུགས་དང་མ་བརྟེན་པའི་བཟང་སྤྱོད་སྐོར་ངོ་སྤྲོད་དང་།  སྒོམ་རྒྱག་སྟངས་སྐོར་ལ་སྦྱོང་བརྡར་ཡང་གནང་ཡོད་པ་མ་ཟད། རྒྱ་རིགས་སློབ་དཔོན་སྐུ་ཞབས་ Lau  ལགས་ཀྱིས་བོད་སྐོར་དཔྱད་ཞིབ་སྤྱི་དང་། ལྷག་པར་བོད་ནི་རྒྱ་ནག་གི་ཆ་ཤས་ནམ་ཡང་མིན་པའི་སྐོར་ལ་གསུང་བཤད་གནང་འདུག་པ་བཅས། །