ཕྱི་ལོ་ ༢༠༡༩ ཟླ་ ༧ ཚེས་ ༢༦ རེས་གཟའ་པ་སངས།

༄༅། །ཕྱི་ལ་ོོ ༢༠༡༩ ཟླ་ ༧ ཚེས་ ༢༣ རེས་གཟའ་མིག་དམར་ཉིན་ཨ་རི་རྒྱལ་ས་ཝ་ཤིང་ཊོན་ཌི་སི་དུ་ཡོད་པའི་ཇོར་ཇ་སྦ་ཤིང་ཊོན་ George Washington University’s Marvin Center  གཙུག་ལག་སློབ་གཉེར་ཁང་དུ་བྱང་ཨ་རིའི་སྐུ་ཚབ་དོན་ཁང་དང་། ཨ་རི་རོགས་ཚོགས་ USAID ། ཇོར་ཇ་སྦ་ཤིང་ཊོན་གཙུག་ལག་སློབ་གཉེར་ཁང་བཅས་ཐུན་མོང་གི་་གོ་སྒྲིག་འོག   བོད་ནང་གི་དགོང་མོ་ཞིག་ An evening in Tibet ཅེས་བོད་ཀྱི་ཟློས་གར་ཚོགས་པས་སྲོལ་རྒྱུན་གྱི་རིག་གཞུང་འཁྲབ་སྟོན་ཐོག འཛམ་གླིང་ཞི་བདེའི་དེད་དཔོན། བོད་མིའི་བླ་ན་མེད་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་གྲངས་ ༨༤ ལ་ཕེབས་པའི་སྐུའི་འཁྲངས་སྐར་དུས་ཆེན་སྲུང་བརྩི་གཟབ་རྒྱས་ཞུས་འདུག

དེ་ཡང་མཛད་སྒོའི་ཐོག་ཨ་རི་རྒྱལ་སྤྱིའི་ཆོས་དད་རང་དབང་སྐུ་ཚབ་སྐུ་ཞབས་སེ་མི་ཡོལ་བྷྲའོན་བྷེག་ Samuel Brownback མཆོག་དང་། ཨ་རི་ཐེབས་རྩའི་ཨེ་ཤི་ཡ་ཁུལ་གྱི་འཛིན་སྐྱོང་འགན་འཛིན་ལས་རོགས་ལྕམ་སྐུ་ཨན་མཱ་རི་ཡ་སི་ཏིས་ཧོཀ Ann Marie Yastishock མཆོག  ཇོར་ཇ་སྦ་ཤིང་ཊོན་དུ་ཡོད་པའི་ཨེ་ཤེ་ཡན་སློབ་གཉེར་ཁང་གི་སི་གུར་ལྟེ་གནས་ཁང་གི་འགན་འཛིན་སྐུ་ཞབས་བྷན་ཇ་མིན་ཧོན་ཀིན་སི་ Benjamin Hopkins  ལགས། ཨ་རི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་བཅས་ཆེད་ཕེབས་ཀྱིས་ཐོག་མར་སྐུ་ཞབས་བྷན་ཇ་མིན་ཧོབ་ཀིན་སི་ལགས་ཀྱིས་ཕེབས་བསུའི་གསུང་བཤད་གནང་གྲུབ་མཚམས་ཨ་རི་རྒྱལ་སྤྱིའི་ཆོས་དད་རང་དབང་སྐུ་ཚབ་སྐུ་ཞབས་སེ་མི་ཡོལ་བྷྲའོན་བྷེག་མཆོག་གིས། ཁོང་ཉིད་བོད་དོན་དང་བོད་མིར་རྒྱབ་སྐྱོར་མཚོན་ཆེད་ཕེབས་པ་ཞིག་ཡིན་སྐོར་དང་། དེ་སྔོན་རྒྱལ་སྤྱིའི་ཆོས་དད་རང་དབང་ལྷན་ཚོགས་ཐེངས་གཉིས་པའི་ཐོག་ཞིང་གཤེགས་དམ་པ་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་གི་ཚ་མོ་ཉི་མ་ལྷ་མོ་ལགས་ཀྱིས་བོད་དོན་ཐོག་རྒྱབ་སྐྱོར་མུ་མཐུད་ཡོང་བའི་འབོད་སྐུལ་དང་གཏམ་བཤད་སྤེལ་ཡོད་སྐོར་སོགས་གསུང་བཤད་གནང་རྗེས་བོད་ཀྱི་ཟློས་གར་ཚོགས་པས་༸རྒྱལ་བའི་བསྟོད་གཞས་ཕུལ་བསྟུན་རྟེན་འབྲེལ་མཚོན་བྱེད་མངར་ཟས་བགོ་འགྲེམས་གནང་ཡོད།

སྐབས་དེར་སྐུ་མགྲོན་རྣམས་ནས་བོད་ཀྱི་སྲོལ་རྒྱུན་གྱི་རིག་གཞུང་འཁྲབ་སྟོན་རྣམས་སྤྲོོ་བོ་བྱུང་ཡོད་པ་བཅས། །