ཕྱི་ལོ་ ༢༠༡༩ ཟླ་ ༧ ཚེས་ ༡ རེས་གཟའ་ཟླ་བ།

༄༅། །བོད་མིའི་སྒྲིག་འཛུགས་ཀྱི་ལས་བྱེད་འདེམས་བསྐོ་ལྷན་ཁང་གི་གོ་སྒྲིག་འོག་སྲི་ཞུ་བ་དྲུང་གཞོན་དང་། དྲུང་ལས། སྡེ་འགན་བཅས་ཁྱོན་མི་གྲངས་ ༢༡ ལ་ཕྱི་ལོ་ ༢༠༡༩ ཟླ་ ༦ ཚེས་ ༡༧ ནས་ ༢༦ བར་ཉིན་གྲངས་བཅུ་རིང་རྒྱ་གར་གྱི་རྒྱལ་ས་ལྡི་ལིར་རྟེན་གཞི་བྱས་པའི་རྒྱ་གར་གཞུང་གི་འཛིན་སྐྱོང་སྦྱོང་བརྡར་བསྟི་གནས་ཁང་ Indian Institute of Public Administration དུ་འཛིན་སྐྱོང་དང་འགོ་ཁྲིད་ཐབས་ལམ།    ལས་དོན་གྱི་གྲུབ་འབྲས་དང་ནུས་པ་བཟང་ངན་ཐོག་དཔྱད་པ་བྱེད་ཚུལ་དང་ལེགས་སྤེལ་ཉེས་འགོག་གི་བསམ་ཚུལ་སྤེལ་སྟངས།    དུས་ཚོད་སྟངས་འཛིན་ཐོག་ལས་དོན་ཆེ་ཕྲ་ཡོངས་ལ་འཆར་གཞི་འགོད་སྟངས།  རྩོད་རྙོག་འདུམ་འགྲིག་བྱེད་སྟངས་སོགས་ཀྱི་ཐོག་ཟབ་སྦྱོང་ལེགས་གྲུབ་བྱུང་འདུག 

རྒྱ་གར་གཞུང་གི་འཛིན་སྐྱོང་སྦྱོང་བརྡར་བསྟི་གནས་ཁང་གིས་གནང་བའི་ཟབ་སྦྱོང་གི་སློབ་དེབ་རྣམས་སྤུས་ཀ་ཚད་ལྡན་ཡིན་པ་མ་ཟད། སློབ་ཚན་གྱི་ནང་དོན་ཁག་ཕུན་སུམ་ཚོགས་པ་ཡོད་པས། མཉམ་ཞུགས་གནང་མཁན་སྲི་ཞུའི་ལས་བྱེད་རྣམས་ཀྱིས་དགའ་མོས་དང་ཡི་རངས་ཞུས་ཡོད། 

དེ་ཡང་ཕྱི་ཚེས་ ༢༦ ཉིན་ཟབ་སྦྱོང་མཇུག་བསྡོམས་ཀྱི་མཛད་སྒོའི་ཐོག་སྦྱོང་བརྡར་ཁང་གི་ངེས་སྟོན་པ་སྐུ་ཞབས་ཨེས་ཨིན་ཏྲི་པ་ཁྲི་  S.N. Tripathi ལགས་དང་། ལས་འཆར་འགན་འཛིན་སུར་སྦི་པན་ཌེ་ Dr. Surbhi Pandey ལགས། ལས་བྱེད་འདེམས་བསྐོ་ལྷན་ཁང་གི་དྲུང་ཆེ་ཚེ་རིང་དབྱངས་སྐྱིད་ལགས་བཅས་ཕེབས་ཡོད།  

སྐབས་དེར་སྦྱོང་བརྡར་ཁང་གི་ངེས་སྟོན་པ་སྐུ་ཞབས་ཨེས་ཨིན་ཏྲི་པ་ཁྲི་ལགས་ཀྱིས་གང་ཟག་སྒེར་གཅིག་གིས་ཚོགས་པ་སྒྲིག་འཛུགས་དང་། དེ་བཞིན་རྒྱལ་ཁབ་འཛུགས་སྐྲུན་སླད་ཤུགས་རྐྱེན་ཇི་ལྟར་སྤྲོད་ཐུབ་པའི་སྐོར་དང་། ཐེངས་འདིའི་ཟབ་སྦྱོང་ནང་མཉམ་ཞུགས་གནང་མཁན་སྲི་ཞུའི་ལས་བྱེད་རྣམས་ཀྱི་རྣམ་དཔྱོད་དང་ཡ་རབས་བཟང་སྤྱོད། སློབ་ཁྲིད་སྐབས་དོ་དབྱིངས་གནང་ཕྱོགས་སོགས་ཀྱི་ཐད་བསྔགས་བརྗོད་གནང་ཡོད། 

དེ་ནས་ལས་བྱེད་འདེམས་བསྐོ་ལྷན་ཁང་གི་དྲུང་ཆེ་ཚེ་རིང་དབྱངས་སྐྱིད་ལགས་ཀྱིས་ཐེངས་འདིའི་ཟབ་སྦྱོང་དེ་བཞིན་ལམ་ལྷོངས་ལྡན་པ་བྱུང་བར་འབྲེལ་ཡོད་ཚང་མར་ཐུགས་རྗེ་ཆེ་ཞུས་གནང་བ་དང་སྦྲགས། ཟབ་སྦྱོང་ནང་མཉམ་ཞུགས་གནང་མཁན་རྣམས་ལ་ཕྱག་འཁྱེར་གནང་སྟེ་ཟབ་སྦྱོང་ལེགས་པར་མཇུག་སྒྲིལ་ཡོད།

སྤྱིར་ཐེངས་འདིའི་ཟབ་སྦྱོང་ནང་བོད་མིའི་སྒྲིག་འཛུགས་ཀྱི་སྲི་ཞུའི་ལས་བྱེད་བུ་གྲངས་ ༡༨ དང་བུད་མེད་གྲངས་ ༣ བཅས་ཁྱོན་མི་གྲངས་ ༢༡ མཉམ་ཞུགས་གནང་ཡོད་པ་བཅས། །