༢༠༡༩ ཟླ་ ༧ ཚེས་ ༢༧ རེས་གཟའ་སྤེན་པ།
༄༅། །ཕྱི་ལོ་ ༢༠༡༩ ཟླ་ ༧ ཚེས་ ༢༠ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལ་དྭགས་དབྱར་ཆོས་ཆེན་མོར་སྩལ་བའི་བཀའ་ཡིག་ནང་འཁོད་དོན། ཐོག་མར་ལ་དྭགས་ཁུལ་དུ་ཡོད་པའི་དད་ལྡན་མི་མང་དང་ངོས་ཀྱི་གྲོགས་པོ་རྙིང་པ་མང་པོ་ཡོད་པ་དེ་དག་ཚང་མར་འཚམས་འདྲི་བཀྲ་ཤིས་བདེ་ལེགས་ཡོད། ལོ་ལྟར་ངོས་རང་ལ་དྭགས་སུ་ཡོང་བཞིན་ཡོད་པས་ཁྱེད་རྣམས་ནས་དེར་དབྱར་ཆོས་འཚོགས་བཞིན་པའི་སྐབས་ངོས་རང་དེར་ཡོད་བཞིན་པ་ལྟ་བུའི་ཚོར་སྣང་ཡོང་གི་འདུག ངོས་རང་དབང་བཙན་བྱོལ་དུ་འབྱོར་བའི་བོད་མི་རྣམས་འདས་པའི་མི་ལོ་དེ་དག་གི་རིང་རྒྱ་གར་དུ་གནས་སྡོད་བྱེད་པའི་སྐབས་ལ་དྭགས་མི་མང་རྣམས་ནས་ལྷག་བསམ་རྣམ་དག་དང་དད་པ་དམ་ཚིག་གཡོ་བ་མེད་པར་རྒྱབ་སྐྱོར་གནང་ཡོད་པ་གོ་སྐབས་འདི་བརྒྱུད་ཐུགས་རྗེ་ཆེ་ཞུ།
ཉེ་བའི་ལོ་ཤས་རིང་གཞུང་ཆེན་སློབ་གཉེར་ལ་དོ་སྣང་ཆེན་པོས་དབྱར་ཆོས་ལོ་བསྟུད་མར་ཚུགས་ཐུབ་པར་བྱུང་བ་སྤྲོ་བ་བརྟས། ངོས་ནས་དུས་རྟག་ཏུ་སངས་རྒྱས་ཀྱི་བསྟན་པ་ལ་ཤེས་ནས་དད་པ་ཐོབ་པ་གལ་འགངས་ཆེན་པོར་བརྩིས་ཏེ་འབྲེལ་ཡོད་རྣམས་ལ་སློབ་གཉེར་བྱེད་དགོས་པའི་བསྐུལ་མ་བྱེད་ཀྱི་ཡོད། དེའི་ཕྱིར་དབྱར་ཆོས་གོ་སྒྲིག་ཞུ་མཁན་འབྲེལ་ཡོད་ཀུན་ལ་ལེགས་སོའི་བསྔགས་བརྗོད་དང་ཐུགས་རྗེ་ཆེ་ཞུ་བཞིན་ཡོད། སངས་རྒྱས་ཀྱི་བསྟན་པ་ཡུན་རིང་དུ་གནས་པར་འདོད་ན་བཤད་སྒྲུབ་ཟུང་འབྲེལ་དགོས་པ་ལས་བཤད་སྒྲུབ་ཕྱོགས་རེར་སོང་ན་བསྟན་པ་ཡུན་རིང་དུ་གནས་ཐབས་བྲལ། དེའི་ཕྱིར་རང་རེ་སངས་རྒྱས་པའི་རྗེས་འཇུག་རྣམས་ཀྱིས་སངས་རྒྱས་ཀྱི་བསྟན་པའི་ཁྱད་ཆོས་རྣམས་ཤེས་པར་བྱས་ནས་བསྟན་པ་རིན་པོ་ཆེ་ཉམས་པ་སླར་གསོ་དང་མི་ཉམས་གོང་སྤེལ་དགོས་པ་ཕྲག་ཏུ་བབ་པའི་འོས་འགན་དུ་གྱུར་ཡོད།
ཆབས་ཅིག་ཏུ་ཆོས་ཀྱི་སྙིང་པོ་བྱམས་བརྩེ་ཉམས་ལེན་དང་དར་སྤེལ་གྱིས་མིའི་རིགས་ཀྱི་སྤྱི་ཚོགས་ཆེན་པོ་འདི་བྱམས་བརྩེ་དང་ཡ་རབས་ཀྱི་སྤྱི་ཚོགས་ཤིག་ཏུ་བསྒྱུར་བའི་འགན་ཁུར་ཡང་རང་རེ་ཐེག་པ་ཆེན་པོར་ཁས་ཆེ་བ་རྣམས་ལ་ཡོད་པ་དེ་ལྟར་ཐུགས་འཇགས་འཚལ། ཞེས་འཁོད་འདུག
