ཕྱི་ལོ་ ༢༠༡༩ ཟླ་ ༧ ཚེས་ ༢༥ རེས་གཟའ་ཕུར་བུ།

༄༅། །ཕྱི་ལོ་ ༢༠༡༩ ཟླ་ ༧ ཚེས་ ༢༥ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སྐུ་ཞབས་བྷོ་རི་སི་ཇོན་སན་ Boris Johnson མཆོག་ཨིན་ཡུལ་གྱི་སྲིད་བློན་གསར་པར་འོས་འདེམས་བྱུང་བར་འཚམས་འདྲིའི་གསུང་འཕྲིན་སྩལ་དོན། འདས་པའི་ལོ་མང་རིང་ངོས་རང་ཨིན་ཡུལ་དུ་ཡང་ཡང་སླེབས་མྱོང་ཡོད།  སྐབས་དེ་དག་ཏུ་སྐྱེ་བོ་མཆོག་དམན་ཀུན་གྱིས་ངོས་ལ་ཧ་ཅང་སེམས་ཐག་ཉེས་པོ་དང་། མཛད་བརྩེའི་འཚམས་འདྲི་གནང་བྱུང་།  སེམས་འགུལ་ཧ་ཅང་ཐེབས་མྱོང་ཡོད།  ཕྱོགས་མཚུངས་བོད་མིར་སེམས་ཐག་ཉེ་བའི་ཨིན་ཇིའི་གྲོགས་པོ་ཚོས་བོད་མིའི་གཞི་རྩའི་རང་དབང་དང་ཆེ་མཐོང་ལ་རྒྱབ་སྐྱོར་དང་བརྩི་བཀུར་གནང་དང་གནང་མུས་ཡིན།  ངོས་ཀྱིས་ཡི་རངས་བསྔགས་བརྗོད་རྒྱ་ཆེ་ཞུ་རྒྱུ་ཡིན། 

ལོ་རྒྱུས་ཐོག་བོད་ཨིན་དབར་ཡུན་རིང་ནས་འབྲེལ་བ་དམིགས་བསལ་ཞིག་ཡོད།  དུས་ད་ལྟའང་ང་ཚོ་དང་དེ་སྔ་ཕྱི་ལོ་ ༡༩༥༩ གོང་བོད་ནང་ཕྱག་ལས་གནང་མྱོང་མཁན་གྱི་ཨིན་ཇིའི་གཞུང་ཞབས་པ་ཚོའི་ནང་མིའི་དབར་མཛའ་བརྩེའི་འབྲེལ་བ་རྒྱུན་སྐྱོང་བྱེད་བཞིན་ཡོད།   

ད་ལྟ་དུས་ཚོད་དཀའ་ལས་ཁག་པོ་ཞིག་ནང་ཡོད།  ཨིན་ཡུལ་ལ་མཚོན་ན་ཡུ་རོབ་སྤྱི་མཐུན་ཚོགས་པའི་སྒྲིག་འཛུགས་ནས་ཕྱིར་འཐེན་བྱེད་བཞིན་ཡོད།  དེའི་ཐད་ངོས་ཀྱི་བསམ་ཚུལ་རྣམས་མང་ཚོགས་ལ་བརྗོད་རྒྱུ་བྱུང་།  ངོས་ནི་ཡུན་རིང་ནས་ཡུ་རོབ་སྤྱི་མཐུན་ཚོགས་པའི་སྒྲིག་འཛུགས་ལ་རྒྱབ་སྐྱོར་དང་ཡི་རངས་བསྔགས་བརྗོད་ཞུ་མཁན་ཞིག་ཡིན།  ལོ་ངོ་བརྒྱ་ཕྲག་མང་པོའི་རིང་ནས་ཡུ་རོབ་ནང་རྒྱལ་ཁབ་ཕན་ཚུན་དམག་འཁྲུག་སོགས་བརྒྱབ་ནས་བསྡད་པ་རེད།  འོན་ཀྱང་ད་ཆ་རྒྱལ་ཁབ་སོ་སོའི་སྒེར་གྱི་ཁེ་ཕན་ལས་སྤྱི་པའི་སྒྲིག་འཛུགས་དེ་གལ་ཆེ་བར་བརྩིས་ནས།  ཡོ་རོབ་སྤྱི་མཐུན་ཚོགས་པའི་སྒྲིག་འཛུགས་དེ་འདྲ་ཞིག་གསར་གཏོད་གནང་ཐུབ་པ་རེད།   རྒྱལ་ཁབ་དེ་དག་དེ་སྔ་ཡིན་ན་ཕན་ཚུན་མི་མཐུན་པའི་དགྲ་བོར་ངོས་འཛིན་བྱས་ཀྱང་།  ད་ཆ་གྲོགས་པོར་འགྱུར་ནས་སྤྱི་སྒེར་གཉིས་ལས་སྤྱིའི་བདེ་ཐབས་གལ་ཆེ་བར་འཛིན་པ་དང་།  སྤྱི་པའི་བདེ་དོན་སྲུང་སྐྱོབ་ཆེད་མཉམ་རུབ་འབད་བརྩོན་གནང་མུས་ཡིན།  འོན་ཀྱང་ཕྱི་ལོ་ ༢༠༡༦ ལོར་ཨིན་ཡུལ་ནང་རྒྱལ་ཡོངས་འོས་བསྡུ་ཆེན་མོ་གནང་བ་རེད།  སྐབས་དེར་ཨིན་ཡུལ་ཡུ་རོབ་སྤྱི་མཐུན་ཚོགས་པའི་སྒྲིག་འཛུགས་ནས་ཕྱིར་འཐེན་བྱ་རྒྱུ་ཡིན་པ་མི་མང་གི་བསམ་ཚུལ་བསྡུ་ལེན་བྱས་རྗེས་ཐག་གཅོད་དེ་འདྲ་ཞིག་གནང་བ་རེད།  ངོས་ཀྱིས་མང་ཚོགས་ཀྱི་བསམ་ཚུལ་ལ་བརྩི་བཀུར་ཞུ་བཞིན་ཡོད།

ཕྱིར་འཐེན་རྗེས་སུ་གནས་སྟངས་ལ་འགྱུར་བ་ཇི་འདྲ་སོང་ཡང་། དེང་སྐབས་ཕན་ཚུན་གཅིག་ལ་གཅིག་བརྟེན་དགོས་པའི་འཛམ་གླིང་གི་གནས་སྟངས་འོག  ཨིན་ཇིའི་སྟོབས་ཤུགས་མུ་མཐུད་གནས་ཐུབ་རྒྱུ་རེད་བསམ་པ་དྲན་གྱི་འདུག ཅེས་བཀའ་སློབ་སྩལ་བསྟུན་སྲིད་བློན་མཆོག་གི་ལས་དོན་གང་ཅིར་བྱ་བ་ལམ་ལྷོངས་ཡོང་བའི་བཀྲ་ཤིས་སྨོན་འདུན་མཛད་འདུག་པ་བཅས། །