ཕྱི་ལོ་ ༢༠༡༩ ཟླ་ ༧ ཚེས་ ༨ རེས་གཟའ་ཟླ་བ།
༄༅། །ཕྱི་ལོ་ ༢༠༡༩ ཟླ་ ༧ ཚེས་ ༧ ནས་ ༨ བཅས་ཉིན་གྲངས་གཉིས་རིང་བཞུགས་སྒར་རྡ་རམ་ས་ལ་བོད་ཀྱི་དཔེ་མཛོད་ཁང་དུ་ཨུ་རུ་སུ་དང་རྒྱ་གར། ཕིན་ལེནྜི། ཨོ་གླིང་སོགས་ཁྱོན་རྒྱལ་ཁབ་བཅུ་ནས་ཤེས་ཡོན་ཉམས་ཞིབ་པ་དང་ལྟ་གྲུབ་སྨྲ་བ། སློབ་སྟོན་པ་སོགས་ལྷན་འཛོམས་ཀྱིས་འབྱུང་འགྱུར་སྟོང་ལོ་གསུམ་པའི་ནང་། འགྲོ་བ་མིའི་ཤེས་ཡོན་ལམ་ལུགས་ཇི་འདྲ་ཞིག་དགོས་མིན་ཐད་གོ་བསྡུར་སྦྱང་བཤད་གཟབ་རྒྱས་གནང་བ་མ་ཟད། ཕྱི་ཚེས་ ༨ སྔ་དྲོ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཞུགས་གནས་ཕོ་བྲང་དུ་མཇལ་བཅར་ཐོག དེང་དུས་ཤེས་ཡོན་ལམ་ལུགས་དེ་འདོད་བློ་ཁེངས་ཐབས་ཤིག་རྩ་བ་ནས་མེད་པ་མ་ཟད། འབྱུང་འགྱུར་ཤེས་ཡོན་ལམ་ལུགས་དེར་བཟང་ཕྱོགས་ཀྱི་འགྱུར་བ་ཞིག་མ་བཏང་ཚེ་གནས་སྟངས་དེ་བས་ཇེ་སྡུག་ཏུ་འགྲོ་རྒྱུའི་ཉེན་ཁ་ཡོད་སྐོར་སོགས་ཞུས་པ་དང་སྦྲགས། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ལམ་སྟོན་བཀའ་སློབ་གསོལ་འདེབས་ཞུས་པ་ལྟར་མགོན་པོ་མཆོག་གིས་བཀའ་སློབ་སྩལ་འདུག
དེ་ཡང་སྐབས་དེར་ཐོག་མར་ཨུ་རུ་སིའི་ཤེས་ཡོན་ཅན་མར་ག་རི་ཏ་ Margarita Kozhevnikova ལགས་ཀྱིས་སྟོང་ལོ་གསུམ་པའི་ནང་འགྲོ་བ་མིའི་ཤེས་ཡོན་ལམ་ལུགས་ཇི་འདྲ་ཞིག་དགོས་སྐོར་གྱི་བགྲོ་གླེང་ལྷན་ཚོགས་སྐོར་ངོ་སྤྲོད་ཞུས་བསྟུན། ཨོ་གླིང་ཌེ་ཀིངྒ་གཙུག་ལག་སློབ་གྲྭའི་ Deaking University -Australia ཤེས་ཡོན་སློབ་སྟོན་པ་ Scott Webster ཞིག་གིས་ངོ་སྤྲོད་རྒྱས་པ་ལྷ་སྙན་སྒྲོན་འབུལ་ཞུས་རྗེས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་སྩལ་དོན།
འཛམ་གླིང་ནང་དེང་སྐབས་རྙོག་གྲ་བཟོ་མཁན་དེ་དག་གིས་གཙོས་འགྲོ་བ་མི་རིགས་ཐེར་འབུམ་བདུན་ཡོད་པ་རྣམས་རང་གི་མ་ལས་སྐྱེས་པ་ཤ་སྟག་རེད། ཆུང་དུས་མའི་བྱམས་བརྩེའི་འོག་ནས་འཚར་ལོངས་བྱས་ཡོད། ངོས་ལ་མཚོན་ན་ངོས་ཀྱི་བྱམས་བརྩེའི་དགེ་རྒན་ཆེས་ཐོག་མ་ནི་ངོས་ཀྱི་ཨ་མ་ལགས་ཡིན། ངའི་པཱ་ལག་ཏོག་ཙམ་སྐུ་རླུང་བཞེང་པོ་ཡོད། འོན་ཀྱང་ངོས་ཀྱིས་ཨ་མ་ལགས་སྐུ་རླུང་བཞེངས་པ་ངོས་ཀྱིས་ནམ་ཡང་མཇལ་མྱོང་མེད། ཐུགས་སེམས་ཧ་ཅང་བཟང་པོ་རེད།
སྤྱིར་ཤེས་ཡོན་གྱི་དགོས་དམིགས་གཙོ་བོ་མི་ཚེ་བདེ་སྐྱིད་ལྡན་པ་བཟོ་རྒྱུ་དེ་རེད། འགྲོ་བ་མིའི་གཞི་རྩའི་ལྷན་སྐྱེས་རང་བཞིན་དེ་བྱམས་བརྩེ་ལྡན་པ་ཞིག་ཡིན་པ་ཚན་རིག་པ་ཚོས་ཀྱང་བརྗོད་ཀྱི་ཡོད། དེ་ལྟར་ན་འཛམ་གླིང་ནང་མི་དགོས་པའི་རྙོག་གྲ་འདི་འདྲ་མང་པོ་ཞིག་གང་འདྲ་བྱས་ནས་བྱུང་བ་རེད། ཕྲུ་གུ་ཆུང་དུས་སློབ་གྲྭར་མ་ཞུགས་གོང་མིའི་ལྷན་སྐྱེས་བྱམས་བརྩེའི་འདུ་ཤེས་དེ་གསལ་པོ་ཡོད། སློབ་གྲྭའི་ནང་དུ་བཟང་སྤྱོད་དེ་དག་ཐོག་དེ་ཙམ་དོ་སྣང་མ་བྱས་པར་བརྟེན་བག་ལ་ཉལ་བའི་ཚུལ་དུ་གནས་བཞིན་ཡོད། དེར་བརྟེན་ཆགས་སྡང་གི་བློ་དེ་དག་སྐྱེ་སྐབས་གཉེན་པོ་ཇི་ལྟར་བསྟེན་དགོས་མིན་དོ་སྣང་གང་ཡང་མ་བྱས་སྟབས་གདོང་ལེན་བྱེད་སྟངས་ཤེས་ཀྱི་མེད། ལུས་པོར་འཕྲོད་བསྟེན་དགོས་པ་ལྟར་ད་ཆ་བསམ་བློའི་འཕྲོད་བསྟེན་དགོས་མཁོ་ཧ་ཅང་འདུག ད་ལྟའི་འཛམ་གླིང་གནས་སྟངས་འདི་འདྲ་ཞིག་འདུག ཕྱི་དངོས་པོའི་འཛུགས་སྐྲུན་ཁོ་ནར་གཙིགས་ཆེར་འཛིན་པའི་ཤེས་ཡོན་ལམ་ལུགས་ཐོག་ཕྱིན་པར་བརྟེན་མི་རབས་ནས་མི་རབས་དངོས་པོ་འཛུགས་སྐྲུན་ཁོ་ནར་དམིགས་ནས་ཕྱིན་པ་མ་གཏོགས་མིའི་ནང་གི་གཤིས་རྒྱུད་དང་འབྲེལ་བའི་བཟང་པོའི་རིན་ཐང་དེ་དག་ལ་དོ་སྣང་རྩ་བ་ནས་མེད་པར་བརྟེན་དཀའ་ངལ་འཕྲད་བཞིན་ཡོད།
ད་ཆ་རྒྱ་གར་བ་ཚོས་གནའ་རབས་སྲོལ་རྒྱུན་ནས་བྱུང་བའི་འཚེ་མེད་ཞི་བ་དང་སྙིང་རྗེའི་ཉམས་ལེན་དེ་དག་འཛམ་གླིང་ཐོག་སྣེ་ཁྲིད་ཐུབ་པ་བྱེད་དགོས། ཆགས་སྡང་གི་བློར་རྒྱ་གར་སྲོལ་རྒྱུན་ལེགས་བཤད་ནས་གསུངས་པའི་གཉེན་པོ་བསྟེན་སྟངས་དེ་དག་སྟེང། དེང་དུས་ཤེས་ཡོན་གྱི་བསམ་བློ་གཏོང་སྟངས་ཟུང་འབྲེལ་ཐོག་ནས་དཀའ་ངལ་སེལ་ཐབས་ཡོད་པ་གསལ་འདོན་བྱེད་དགོས། འདི་ལོར་ང་ཚོས་དགེ་རྒན་ཁག་གཅིག་ལ་བློ་སྦྱོང་གི་ཉམས་ལེན་སྐོར་ཟབ་སྦྱོང་ཞིག་གོ་སྒྲིག་ཞུ་འཆར་ཡོད། ཀླད་པ་རྐྱང་རྐྱང་ལ་བརྟེན་པའི་ཤེས་ཡོན་དེ་མཐུན་ཕྱོགས་སུ་འགྲོ་དང་མི་མཐུན་ཕྱོགས་སུ་འགྲོ་མིན་གཙོ་བོ་ཀུན་སློང་གིས་ཐག་གཅོད་རྒྱུ་རེད།
དེར་བརྟེན་མིའི་ཕུལ་དུ་བྱུང་བའི་ཀླད་པ་དེ་དང་བྱམས་བརྩེའི་བསམ་བློ་གཉིས་ཟུང་འབྲེལ་ཐོག་ནས་འགྲོ་དགོས། དེའི་ཐོག་ནས་བཟང་སྤྱོད་ཀྱི་འགན་ཡོད་པའི་མི་ཚེ་ཞིག་བསྐྱལ་དགོས། ད་ལྟའི་ཤེས་ཡོན་ལམ་ལུགས་དེ་ཙམ་གྱིས་འདང་ངེས་མེད། ད་ལྟའི་འཛམ་གླིང་འདིའི་སྟེང་རྙོག་གྲ་བཟོ་མཁན་ཕལ་མོ་ཆེ་དེང་དུས་ཤེས་ཡོན་ཐོག་ལ་ཆ་བཞག་ན་ཤེས་ཡོན་ཧ་ཅང་ཡག་པོ་ཐོབ་པ་ཤ་སྟག་ཕལ་ཆེར་རེད། འོན་ཀྱང་ཤེས་ཡོན་དེས་མཐར་མི་ཚེའི་ནང་རེ་དོགས་དང་། དངངས་སྐྲག ཞེ་སྡང་། ཕྲག་དོག འགྲན་སེམས་སོགས་མི་མཐུན་པའི་རྣམ་རྟོག་དེ་དག་ལུ་གུ་རྒྱུད་ནས་མི་ཚེའི་ནང་དཀའ་ངལ་ཟམ་མ་ཆད་པར་བརྟེན། དཀའ་ངལ་དེ་དག་ལས་མཐར་ཐབས་ཆེད་མྱོས་རྫས་སྤྱོད་རྒྱུ་དང་། མཐའ་ན་རང་ཤི་ཚུན་ཆད་བརྒྱབ་པའི་གནས་སྟངས་དེ་འདྲ་འབྱུང་བཞིན་ཡོད། ཁྱེད་ཚོས་ལྷན་ཚོགས་འདི་འདྲ་ཞིག་ཚོགས་དགོས་པ་དེ་ནི་དེང་དུས་ཤེས་ཡོན་ལམ་ལུགས་ལ་འགྱུར་བ་གཏོང་དགོས་པ་ཞིག་མཐོང་བ་རེད། དེ་དངོས་བདེན་རེད། ངོས་ཀྱིས་རྒྱབ་སྐྱོར་ཡོད། ང་ཚོ་མི་ལ་གཞན་དང་མི་འདྲ་བའི་ཀླད་པ་ཞིག་ཡོད་པ་དེ་མཚོན་ཆ་བཟོ་རྒྱུ་མིན་པར་སྤྱི་ཚོགས་བདེ་སྐྱིད་ལྡན་པ་ཞིག་བཟོ་ཐབས་ཆེད་བཀོལ་སྤྱོད་བྱེད་དགོས། ཅེས་སོགས་ཀྱི་བཀའ་སློབ་སྩལ།
སྤྱིར་ཉིན་གཉིས་ཀྱི་བགྲོ་གླེང་ལྷན་ཚོགས་དེ་བཞིན་བོད་སྐྱོབ་དགེ་རྩ་ཚོགས་པ་ Save Tibet Foundation དང་། བོད་ཀྱི་རིག་གཞུང་བསྟི་གནས་ཁང་། བོད་ཀྱི་དཔེ་མཛོད་ཁང་བཅས་ཀྱིས་མཐུན་འགྱུར་གོ་སྒྲིག་གནང་བ་ཞིག་ཡིན་འདུག
མཇལ་ཁའི་སྐབས་བཀའ་བློན་ཁྲི་ཟུར་མཁས་དབང་སློབ་དཔོན་ཟམ་གདོང་རིན་པོ་ཆེ་མཆོག་དང་། བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས་སོགས་ཕེབས་འདུག་པ་བཅས། །
