ཕྱི་ལོ་ ༢༠༡༩ ཟླ་ ༧ ཚེས་ ༢༣ རེས་གཟའ་མིག་དམར། 

༄༅། །ཕྱི་ལོ་ ༢༠༡༩ ཟླ་ ༧ ཚེས་ ༡༥ ནས་༢༣ བར་ལ་དྭགས་ལྡུམ་ར་ཁུལ་དུ་རྟེན་གཞི་བྱས་པའི་འབྲི་གུང་བཀའ་བརྒྱུད་མཐོང་གྲོལ་ཕུག་དགོན་པའི་ནང་ལ་དྭགས་ནང་པ་དང་ཁ་ཆེ་ཆོས་ལུགས་རྗེས་འབྲང་པ་ཚོ་ལྷན་འཛོམས་ཀྱིས་འདི་ལོའི་ལ་དྭགས་ལྡུམ་ར་ཁ་སྡོད་དབྱར་ཆོས་ཆེན་མོའི་དབུ་འབྱེད་མཛད་སྒོ་ཚོགས་ཡོད་པ་དང་། ལོ་ལྟར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དབྱར་ཆོས་ཆེན་མོའི་མཛད་སྒོའི་ཐོག་ཆིབས་སྒྱུར་སྐྱོང་གི་ཡོད་ཀྱང་འདི་ལོ་མགོན་པོ་གང་ཉིད་མཆོག་ཆིབས་སྒྱུར་བསྐྱངས་ཐུབ་མེད། དབུ་འབྱེད་མཛད་སྒོའི་ཐོག་འཆར་འགོད་པ་དང་ཤེས་ཡོན་སློབ་གསོ་པ་གྲགས་ཅན་བསོད་ནམས་དབང་ཕྱུག་ལགས་ཀྱིས་མགོན་པོ་གང་ཉིད་མཆོག་གི་ཐུགས་རྗེ་བཀའ་དྲིན་དྲན་བཞིན་གསུང་དོན།

གོ་ལ་ཧྲིལ་པོ་ཕྱོགས་རིས་ཅན་ཞིག་ལ་འགྲོ་བཞིན་པའི་སྐབས་དང་། ཐ་ན་ལ་དྭགས་ཁུལ་དུའང་ཆོས་ལུགས་ནང་ཁུལ་ཕྱོགས་རིས་བྱེད་བཞིན་པའི་སྐབས། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་ལོ་མང་རིང་སྐུ་ངལ་འཛེམས་མེད་ཀྱིས་ལ་དྭགས་ཁུལ་དུ་ཆོས་ལུགས་ནང་ཁུལ་བར་མཐུན་སྒྲིལ་བྱེད་དགོས་པ་དང་འགྲོ་བ་མི་ཚང་མ་ལུས་སེམས་དང་མྱོང་ཚོར་གྱི་ཆ་ནས་གཅིག་གྱུར་ཡིན་པའི་འདུ་ཤེས་འཛིན་དགོས་པའི་སྐོར་བཀའ་སློབ་ཡང་ཡང་ཕེབས་པ་དེས་ལ་དྭགས་ཁུལ་གྱི་མང་ཚོགས་ཁྲོད་སེམས་འགུལ་ཧ་ཅང་ཐེབས་ཀྱི་ཡོད་པ་མ་ཟད། ཆོས་ལུགས་ནང་ཁུལ་དང་མི་རིགས་མཐུན་སྒྲིལ་ཡོང་བར་རླབས་ཆེན་གྱི་ཕན་ཐོགས་བྱུང་དང་འབྱུང་བཞིན་ཡོད། ལྡུམ་ར་ཁུལ་གྱི་ཁ་ཆེ་བ་ཚོས་ནང་པའི་དགོན་པ་དང་ཕོ་བྲང་གསར་རྒྱག་སོགས་ཀྱི་ཆེད་དང་བླངས་ཀྱིས་ཞལ་འདེབས་དང་རོགས་རམ་གནང་ཡོད་པ་མ་ཟད། ཐ་ན་དེ་རིང་གི་དབྱར་ཆོས་ཆེན་མོའི་མཛད་སྒོའི་ཐོག་ཁ་ཆེའི་ཆོས་དཔོན་མོ་ཧ་མ་དི་ཨི་ཁི་བྷལ་ Mullah Mohammad Iqbal ལགས་ཀྱང་ཕེབས་ཡོད། མགོན་པོ་གང་ཉིད་མཆོག་གི་ཆོས་ལུགས་ནང་ཁུལ་བར་མཐུན་སྒྲིལ་བྱེད་དགོས་པའི་བཀའ་སློབ་ཡང་ཡང་ཕེབས་པ་དང་དེ་རིང་གི་མཛད་སྒོའི་ཐོག་ཁ་ཆེའི་ཆོས་དཔོན་ཞིག་ཕེབས་པ་དེས་ཐེངས་འདིའི་མཛད་སྒོ་ལྟ་ན་སྡུག་པ་ཞིག་བསྐྲུན་སོང་།

མགོན་པོ་གང་ཉིད་མཆོག་ལ་ལ་དྭགས་ཀྱི་གྲོང་གསེབ་ཆུང་ཆུང་འདི་ནས་ང་བསོད་ནམས་དབང་ཕྱུག་དང་གྲོང་གསེབ་ཀྱི་མི་མང་གྲངས་ ༣༠༠ ཙམ་འདུ་འཛོམས་ཐོག་བཀའ་དྲིན་ཤིན་ཏུ་ཆེ་ཞུ་རྒྱུ་ཡིན།  སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་དེ་རིང་ང་ཚོ་ལྷན་དུ་འདིར་བཞུགས་མེད་ཀྱང་། ང་ཚོས་མགོན་པོ་གང་ཉིད་མཆོག་སྐུ་ཚེ་བསྐལ་བརྒྱར་བརྟན་པའི་སྨོན་འདུན་ཤུགས་དྲག་ཞུ་རྒྱུ་ཡིན། ཞེས་གསུངས། །