ཕྱི་ལོ་ ༢༠༡༩ ཟླ་ ༧ ཚེས་ ༥ རེས་གཟའ་པ་སངས།
༄༅། །ཕྱི་ལོ་ ༢༠༡༩ ཟླ་ ༧ ཚེས་ ༥ ཉིན་བཞུགས་སྒར་རྡ་ས་ཐེག་ཆེན་ཆོས་གླིང་གཙུག་ལག་ཁང་དུ་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ལ་བོད་མིའི་སྒྲིག་འཛུགས་ཀྱི་སྲི་ཞུ་བའི་ལས་བྱེད་ཟུར་པ་ཡོངས་ནས་ཇི་ལྟར་སྔོན་ནས་གསོལ་འདེབས་ཞུས་དོན་ལྟར་བཀའ་བཞེས་བཟང་པོ་སྨིན་སྩལ་ཐོབ་སྟེ། མགོན་པོ་མཆོག་སྐུ་ཚེ་མི་འཇིག་རྡོ་རྗེའི་ཁམས་སུ་བརྟན་ཕྱིར་ཚེ་དཔག་མེད་དྭངས་མ་བཅུད་འདྲེན་གྱི་ཆོ་གའི་སྒོ་ནས་བརྟན་བཞུགས་བསྟར་འབུལ་ཞུས་ཡོད།
དེ་ཡང་གོང་༁ེས་ཉིན་གྱི་སྔ་དྲོ་ཆུ་ཚོད་ ༨།༣༠ ཙམ་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བཞུགས་སྒར་ཕོ་བྲང་ནས་ཆིབས་སྒྱུར་གྱིས་ཕོ་བྲང་སྒོ་ཆེན་དུ་ཕེབས་སྐབས་ཟློས་གར་བ་རྣམས་ནས་རྒྱས་བཤད་འཁྲབ་བཞིན་པར་བཀའ་བློན་ཁྲི་ཟུར་བསྟན་འཛིན་རྣམ་རྒྱལ་མཆོག་དང་། བརྟན་བཞུགས་གྲ་སྒྲིག་ཚོགས་ཆུང་གི་ཚོགས་གཙོ་དགའ་ལྡན་ཕོ་བྲང་གི་དྲུང་ཆེ་ཟུར་པ་བློ་བཟང་སྦྱིན་པ་ལགས། རྣམ་གྲྭའི་དགེ་བསྐོས་གསུམ་ནས་སྤྱན་རྒྱ་སྤོས་འཛིན་དང་བཅས་གཙུག་ལག་ཁང་དུ་གདེན་འདྲེན་ཞུས་པ་དང་། བཞུགས་ཁྲིར་༸ཞབས་སོར་འཁོད་མཚམས་རྣམ་གྲྭ་མཁན་པོ་མཆོག་གིས་མཇལ་དར་རྐྱང་འབུལ་ཞུས། དེ་མཚུངས་ཞལ་འདོན་དབུ་བསྐུལ་བ་དང་གསོལ་འབྲས་རིམ་པར་ཕེབས་པ་དང་། སྔོན་འགྲོ་ཞལ་འདོན་གྱི་རིམ་པ་རྣམས་གསུང་མུར་བརྟན་བཞུགས་གྲ་སྒྲིག་ཚོགས་གཙོ་མཆོག་ནས་མཎྜལ་རྟེན་གསུམ་འདེགས་འབུལ་དང་འབྲེལ་ཚོགས་མི་དང་འབྲེལ་མཐུད་པ་རྣམས་མཇལ་བཅར་ཞུས་རྗེས་གཞུང་ཞབས་བགྲེས་ཡོལ་བ་རྣམ་པ་དང་། ལས་ཟུར་བ་རྣམ་པ་བཅས་ཁྱོན་མི་གྲངས་ ༢༦༠ ལྷག་གིས་གཙོས་བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་དང་བོད་མི་མང་སྤྱི་འཐུས་རྒྱུན་ལས་རྣམ་པ། ལྷན་ཁང་ཁག་གི་དྲུང་ཆེ་ཆུང་རྣམ་པ། རྡ་ས་ཁུལ་གྱི་སེར་སྐྱ་མང་ཚོགས་དང་སློབ་ཕྲུག་རྣམ་པ། དེ་བཞིན་རྒྱ་གར་དང་ཕྱི་རྒྱལ་ཡུལ་གྲུ་ཁག་ནས་བཅར་བའི་དད་ལྡན་སེར་སྐྱ་མི་མང་སྟོང་ཕྲག་བརྒལ་བར་བཀའ་སློབ་སྩལ་དོན།
དེ་རིང་འདིར་གཞུང་ཞབས་ཟུར་པ་ཐུན་མོང་ནས་བརྟན་བཞུགས་ཀྱི་ཆོ་ག་དང་འབྲེལ་བའི་བརྟན་བཞུགས་གསུང་རྒྱུ་འདི་ལྟར་རེད། ཁྱེད་རང་ཚོ་ཚང་མས་དངོས་གནས་དད་པ་དམ་ཚིག་གཡོ་བ་མེད་པར་གདུང་ཤུགས་དྲག་པོ་ཐོག་ནས་ངོས་རང་ཚེ་རིང་པོར་གནས་རྒྱུའི་རེ་འདུན་དང་སྨོན་ལམ་རྒྱག་བཞིན་ཡོད། ཐུགས་རྗེ་ཆེ་ཞེས་ཞུ་རྒྱུ་ཡིན། བཀྲས་མཐོང་བསྟན་འཛིན་རྣམ་རྒྱལ་སྤོས་སྣེ་བྱས་འདུག
ང་ཚོ་ཐོག་མར་མ་སུ་སིར་ཡོད་པའི་སྐབས་བཀྲས་མཐོང་བསྟན་འཛིན་རྣམ་རྒྱལ་གྱི་པཱ་ལགས་ཀྱིས་ཕྲུ་གུ་ཆུང་ཆུང་ཞིག་འཁྲིད་ནས་ཡོང་གི་ཡོད། ང་ཚོའི་མི་ཚེ་འདི་ཕྱོགས་གཅིག་ནས་བསམ་བློ་བཏང་ན་བཙན་བྱོལ་བ་ཆགས་པ་རེད། ཕྱོགས་གཞན་ཞིག་ནས་བསམ་བློ་བཏང་ན་ང་ཚོ་རང་དབང་ལུང་པར་སླེབས་ནས་དེ་སྔའི་ལམ་དང་ལུགས་སྲོལ་གུ་དོག་པོ་བྱས་ནས་འགྲོ་དགོས་རྒྱུ་དེ་དག་ཁྱོན་ནས་མེད་པར། ངོས་ལ་ཆ་མཚོན་ན་རང་དབང་ཐོབ་པ་ལྟ་བུ་རེད། གཞན་དགུན་ཁ་རྩེ་ཕོ་བྲང་དང་། དབྱར་ཁ་ནོར་བུ་གླིང་ཁར་སྡོད་ཀྱི་ཡོད།ཁ་ཤས་ཀྱིས་ཏཱ་ལའི་བླ་མ་གསེར་གྱི་རླུང་ཙི་ནང་ལ་བཞུགས་ཡོད་ཅེས་བཤད་སྲོལ་ཡོད་པ་རེད། སྔ་མོ་དེ་ལྟར་བསྡད་པ་རེད། དཔེ་ཆ་ལྟ་རྒྱུ་རིགས་ཡོངས་འཛིན་རྣམ་པའི་བཀའ་དྲིན་ལ་བརྟེན་ནས་དཔེ་ཆ་ལྟ་རྒྱུ་བྱུང་བ་རེད་མ་གཏོགས་གཞན་དེ་ལྟར་བསྡད་པ་རེད།
དེ་ནས་ང་ཚོ་བཙན་བྱོལ་བ་ཆགས་ནས་ཕྱོགས་གཅིག་ནས་སོ་སོའི་ལུང་པ་བྲལ་བ་རེད། ཕྱོགས་གཅིག་ནས་ང་ཚོ་ཚང་མ་བོད་གངས་ཅན་པའི་ད་ལྟའི་མི་རབས་འདི་བོད་བསྟན་སྲིད་སླད་ཚང་མས་དཀའ་ལས་བརྒྱབ་ཡོད། ངོས་ཀྱིས་འགོ་ཁྲིད་ནས་དེ་རིང་འདིར་ཡོད་པའི་ཁྱེད་རང་ཚོ་གཞུང་ཞབས་རྙིང་པ་རྒན་གྲས་དེ་དག་ཚང་མས་ཧུར་ཐག་འབད་ཐག་བྱས་པ་རེད།
ང་ཚོ་བཙན་བྱོལ་དུ་སླེབས་ནས་ལོ་ ༦༠ ལྷག་ཙམ་ཕྱིན་རྗེས་ད་ལྟ་འཛམ་གླིང་འདིའི་སྟེང་སོ་སོའི་ལུང་པར་རང་དབང་བྲལ་ཡོད་ནའང་ང་ཚོ་འདིར་རྒྱ་གར་ནང་འཕགས་བོད་ཀྱི་འབྲེལ་བ་ཐུན་མོང་མིན་པ་ཞིག་སྔ་མོ་ནས་ཡོད། གང་ལྟར་ང་ཚོ་ཐོག་མར་བཙན་བྱོལ་དུ་སླེབས་པའི་སྐབས་ཆབ་སྲིད་ཐོག་ནས་བཙན་བྱོལ་བ་ཆགས་པ་རེད། ངོས་རང་ཆུང་དུས་སྐབས་ནས་སློབ་གཉེར་བྱེད་རྒྱུའི་གཞུང་དེ་དག་ཚང་མ་རྒྱ་གར་ནས་ཡོང་བ་རེད། ངོས་ཀྱིས་ཡོངས་གྲགས་བརྗོད་བཞིན་པའི་པཎ་གྲུབ་བཅུ་བདུན་གཙོ་བོར་གྱུར་པའི་ནཱ་ལེནྡྲའི་མཁས་པའི་དབང་པོའི་གཞུང་ང་ཚོས་སློབ་སྦྱོང་བྱས་ནས་འཕགས་བོད་གཉིས་ཞེས་ཐུན་མོང་མིན་པའི་འབྲེལ་བ་ཞིག་ཆགས་ཡོད། དེ་ལྟར་ང་ཚོ་བཙན་བྱོལ་དུ་སླེབས་པ་རེད། ངོས་ཀྱིས་ནམ་རྒྱུན་འདི་ལྟར་བརྗོད་ཀྱི་ཡོད།
དེ་སྔ་ང་ཚོ་བོད་ལ་ཡོད་པའི་སྐབས་བོད་ཀྱི་སངས་རྒྱས་པའི་ཆོས་ལ་ lamaism ཞེས་བླ་མའི་ཆོས་ལུགས་རེད་ཅེས་སངས་རྒྱས་པའི་ཆོས་ལུགས་རྣམ་པར་དག་པ་ཞིག་ཡིན་མིན་ཐེ་ཚོམ་བྱེད་མཁན་ཡོད། མུ་སྟེགས་པའི་གསང་སྔགས་དང་འབྲེལ་བ་དེ་འདྲ་ཞིག་མཐོང་བཞིན་ཡོད། རིམ་པས་འཛམ་གླིང་འདིའི་སྟེང་བོད་ཀྱི་སངས་རྒྱས་པའི་ཆོས་འདི་ཁུངས་ཐུབ་པ་ཞིག་དང་། དཔལ་ནཱ་ལེནྡྲའི་ཆོས་བརྒྱུད་དྲི་མ་མེད་པ་ཞིག་ཡིན་པ་མཁས་དབང་མང་པོ་ཞིག་གིས་དེ་ལྟར་མཐོང་བཞིན་འདུག དེར་བརྟེན་ང་ཚོ་བཙན་བྱོལ་བ་ཆགས་ནས་ཕྱོགས་གཅིག་ནས་ཐབས་སྐྱོ་བོ་ཧ་ཅང་རེད། ཕྱོགས་གཅིག་ནས་ང་ཚོར་གོ་སྐབས་ཧ་ཅང་བཟང་པོ་བྱུང་། དེ་ནས་བོད་མི་རང་ཉིད་ལ་ཆ་བཞག་ན་བོད་པའི་རྣམ་དཔྱོད་དང་སྙིང་སྟོབས་ཕལ་ཆེར་མི་འདྲ་བ་རེད་འདུག ང་ཚོའི་བོད་ཡིག་ནང་སྔ་མོ་ལེགས་སྦྱར་གྱི་གཞུང་ནང་ཡོད་པའི་ཟབ་པ་དང་རྒྱ་ཆེ་བའི་ཚད་མའི་རྣམ་གཞག་དེ་ཚོའི་གྲས་ཆ་ཚང་བ་ཞིག་བོད་སྐད་ནང་ང་ཚོས་འགྲེལ་བཤད་རྒྱག་ཐུབ་ཀྱི་ཡོད། བོད་སྐད་ནང་བཤད་ཐུབ་ཀྱི་ཡོད། སྐད་ཡིག་གཞན་གྱི་ནང་མེད། ལེགས་སྦྱར་སྐད་ནི་མཁས་དབང་ཉུང་ཤས་ཀྱིས་བེད་སྤྱོད་བྱས་པ་ལས་མེད། དེར་བརྟེན་ང་ཚོ་བཙན་བྱོལ་དུ་སླེབས་ནས་རྒྱ་གར་གྱི་མཁས་པའི་གནའ་རབས་རིག་གཞུང་དེ་དག་བསྐྱར་གསོ་བྱེད་རྒྱུའི་དུས་ཚོད་སླེབ་ཡོད།
དེ་བཞིན་བོད་ཀྱི་ཆོས་དང་རིག་གཞུང་ཟེར་དུས་འཛམ་གླིང་གི་ཤེས་ལྡན་བློ་གཟུ་བོར་གནས་པ་མང་པོ་ཞིག་གིས་བོད་ཀྱི་ཆོས་དང་རིག་གཞུང་ཟེར་དུས་རྒྱུ་མཚན་ལྡན་པ་དང་། དངོས་ཡོད་གནས་ཚུལ་དང་མཐུན་པ། རྨོངས་དད་བྱས་ནས་འགྲོ་བཞིན་པ་མིན་པ། རྒྱུ་མཚན་ཐོག་ནས་ཤོད་རྒྱུ་ཡོད་པ་ཞིག་ལ་མཐོང་བཞིན་ཡོད། ང་ཚོའི་སངས་རྒྱས་པའི་ཆོས་ཐེག་པ་ཆེ་ཆུང་སྔགས་དང་བཅས་པ་ཆ་ཚང་བ་སངས་རྒྱས་པའི་བསྟན་པ་བོད་ལ་ཡོད་པ་འདི་བོད་ཙམ་མིན་པར་ཕྱོགས་གཅིག་ནས་ནང་པའི་ཡུལ་གྲུ་ཁག་དང་། དེ་ནས་བློ་གཟུ་བོར་གནས་པའི་དེ་སྔ་ནང་པའི་ཆོས་དང་འབྲེལ་བ་མེད་པའི་ནང་གཞི་ནས་འབྲེལ་བ་གསར་པ་སླེབ་རྒྱུ་ཞིག་ཆགས་འདུག
ང་ཚོའི་མི་ཐོག་འདིས་དངོས་གནས་བྱས་རྗེས་བཞག་ཡོད། དེ་རིང་འདིར་ཁྱེད་རང་ཚོ་ལས་བྱེད་བགྲེས་སོང་སྤོ་ལགས་དང་རྨོ་ལགས་འདིར་འདུས་པ་ཡིན་སྟབས། ངོས་ཀྱིས་འདི་ལྟར་དྲན་པ་རེད། ང་ཚོ་སྡིངས་ཆའི་སྟེང་ལྷ་མོ་འཁྲབ་པའི་སྐབས། སྤོ་རྨོ་ཞབས་བྲོ་རྒྱག་ཡོང་གི་ཡོད། ངོས་ཀྱང་སྤོ་ལགས་རེད། ཁྱེད་རང་ཚོ་རྨོ་ལགས་བྱས་ནས་དེ་རིང་ང་ཚོ་ཞབས་བྲོ་རྒྱག་དགོས་རེད། ༼ བཞད་མོ་བཞད། ༽ གང་ལྟར་ང་ཚོ་འདི་དག་དུས་རབས་དཀའ་ངལ་ཅན་སྡུག་ས་ནས་བཤད་པ་ཡིན་ན། བོད་མི་རིགས་རིག་གཞུང་དང་བཅས་པ་ཕལ་ཆེར་ཤུལ་མེད་འགྲོ་རྒྱུའི་མཚམས་དེར་ང་ཚོའི་མི་རབས་འདི་སྐྱེས་པ་རེད།
འཛམ་གླིང་འདིའི་སྟེང་བོད་མི་རིགས་རིག་གཞུང་དང་བཅས་པ་ཁྱད་དུ་འཕགས་པ་ཞིག་ཡོད་པ་འདི་འཛམ་གླིང་འདིའི་སྟེང་མངོན་པ་འདི་ང་ཚོའི་བྱས་རྗེས་རེད། བོད་གངས་ཅན་གྱི་ལྗོངས་འདི་ཁྱེད་རང་ཚོ་ཚང་མས་ཤེས་གསལ་རེད། འཕགས་པ་སྤྱན་རས་གཟིགས་གི་འདུལ་ཞིང་ཞེས་ང་ཚོས་བཤད་ཀྱི་ཡོད་པ་མ་ཟད། སྔོན་བྱུང་གི་ལོ་རྒྱུས་ནང་ལྟ་བ་ཡིན་ན། ཕལ་ཆེར་སྤྱན་རས་གཟིགས་དང་དམིགས་བསལ་གྱི་འབྲེལ་བ་ཡོད་པ་ཞིག་ཆགས་ཡོད། གངས་ཅན་ཞིང་གི་བསྟན་པ་དང་འགྲོ་བའི་དོན་དུ་འཕགས་པ་སྤྱན་རས་གཟིགས་དམིགས་བསལ་གྱིས་ཐུགས་བསྐྱེད་དང་སྨོན་ལམ་ཡོད་པ་ཞིག་ཆགས་ཡོད། ངོས་ཀྱིས་ནམ་རྒྱུན་འུད་ཤོབ་ལྟ་བུར་ངོས་རང་སྤྱན་རས་གཟིགས་ཀྱི་མགྲོན་གཉེར་ཡིན་ཞེས་བཤད་བཞིན་ཡོད། སྤྱན་རས་གཟིགས་ལ་ཕྱག་སྟོང་སྤྱན་སྟོང་ཡོད་པ་རེད་དེ་དངོས་སུ་སྣང་རྒྱུ་མེད་དུས། མི་དང་མི་འབྲེལ་ནས་སྐད་ཆ་བཤད་པ་དང་གོ་བསྡུར་བྱེད་མཁན་ངོས་རང་ཆགས་ཡོད་པས་སྤྱན་རས་གཟིགས་ཀྱི་མགྲོན་གཉེར་ལྟ་བུ་ཡིན་བསམ་པ་དྲན་བཞིན་ཡོད།
དེ་བཞིན་རིག་གནས་གསར་བརྗེ་མ་བྱུང་གོང་ལ་ལྷ་སའི་གཙུག་ལག་ཁང་གི་འཕགས་པ་བཅུ་གཅིག་ཞལ་ངོས་ཀྱི་རྨི་ལམ་དུ་དམིགས་བསལ་ཁྱད་མཚར་ཞིག་བྱུང་བ་རེད། དེ་ལྟ་བུའི་རྐྱེན་བྱས་ཏེ་སྙིང་སྟོབས་མ་ཞུམ་པར་བསྡད། རིག་གནས་གསར་བརྗེའི་རྗེས་སུ་ཐུགས་རྗེ་ཆེན་པོའི་སྐུ་བརྙན་དེ་གཏོར་བཤིག་བཏང་ཡོད་པ་དང་། དེའི་དབུ་དུམ་བུ་ཁ་ཤས་ཤིག་འདིར་འབྱོར་བ་དེར་གཟུངས་གཞུག་ལ་ཕུལ་ནས་ཐུགས་རྗེ་ཆེན་པོའི་སྐུ་འདི་ངོས་ཀྱིས་བཞེངས་པ་རེད། དེ་དུས་ཡང་རྨི་ལམ་དེ་ལྟ་བུ་ཞིག་བྱུང་། དུས་དང་དུས་ལ་སྤྱན་རས་གཟིགས་ཀྱི་བྱིན་རླབས་མིན་འགྲོ་བསམ་པའི་ཚད་མ་ལྟ་བུ་ཡོངགི་འདུག ངོས་རང་འཕགས་པ་སྤྱན་རས་གཟིགས་ཀྱི་མགྲོན་གཉེར་རེད་ཟེར་ན་རབ་བཏགས་དང་ཡུས་བཤད་པ་མིན་བསམ་པ་དྲན་གྱི་འདུག མཁྱེན་སོང་ངམ།
ངོས་རང་འདིར་འཕགས་པ་སྤྱན་རས་གཟིགས་ཀྱི་མགྲོན་གཉེར་ལྟ་བུ་བྱས། ཁྱོད་རང་ཚོས་ལོ་བཅུ་གྲངས་མང་པོར་མཉམ་དུ་དཀའ་ལས་བརྒྱབ་པ་རེད། ཚེ་རབས་ནས་ཚེ་རབས་འཕགས་པ་སྤྱན་རས་གཟིགས་ཀྱིས་རྗེས་སུ་གཟུང་རྒྱུ་ཡིན་པ་བརྒྱ་ཆ་བརྒྱ་ཐམ་པ་ཐག་བཅད་ཆོད་པ་རེད། བློ་བདེ་བོ་བྱོས།
ཤེས་པ་ཕྲ་རགས་གང་ཡིན་ནའང་ཉེར་ལེན་གྱི་རྒྱུ་དགོས་པ་རེད་ཅེས་སྐྱེ་བ་སྔ་ཕྱི་ལུང་ནས་གསུངས་པ་རེད་ཟེར་བ་གཅིག་པུ་མ་ཡིན་པར་དངོས་ཡོད་གནས་ཚུལ་ལ་རིགས་པས་སྒྲུབ་ཡོང་དུས་དངོས་པོ་གང་དང་གང་ལའང་། རིགས་འདྲའི་ཉེར་ལེན་གྱི་རྒྱུ་མེད་ན་དངོས་པོ་དེ་ཆགས་ཐབས་མེད་པ་རིགས་པས་སྒྲུབ་ཐུབ་ཀྱི་འདུག དེར་བརྟེན་ད་ལྟའི་ང་རང་ཚོའི་ཤེས་པའི་རྒྱུན་དེ་རིག་པ་སྔ་མ་སྔ་མ་སྔོན་དུ་སོང་བའི་ཐོག་ནས་ཡོང་བ་དང་། མ་ཡི་མངལ་དུ་ཉིང་མཚམས་སྦྱར་མ་ཐག་པའི་གནས་སྐབས་ཀྱི་ཤེས་པ་དེ་རིགས་འདྲའི་རྒྱུ་སྔོན་ལ་སོང་ནས་བྱུང་བ་རེད་མ་གཏོགས་རྒྱུ་མེེད་རྐྱེན་མེད་ཀྱིས་བྱུང་བ་མིན་པ་རིགས་པས་སྒྲུབ་ཐུབ་ཀྱི་འདུག ང་ཚོས་སྐྱེ་བ་སྔ་ཕྱི་བཤད་ཡོང་གི་ཡོད་པ་རེད། ཚེ་འདི་ལ་འཕགས་པ་སྤྱན་རས་གཟིགས་དང་ཐུན་མོང་མ་ཡིན་པའི་འབྲེལ་བ་ཡོད་པ་ཞིག་བྱུང་བ་ཡིན་པས། ཚེ་རབས་ནས་ཚེ་རབས་འཕགས་པ་སྤྱན་རས་གཟིགས་ཀྱིས་རྗེས་སུ་གཟུང་རྒྱུ་ཞིག་དང་། འཕགས་པ་སྤྱན་རས་གཟིགས་ནི་སྙིང་རྗེའི་ལྷ་རེད། སྤྱན་རས་གཟིགས་ལ་གསོལ་བ་འདེབས་མཁན་དེ་སེམས་པ་བཟང་པོ་བྱས། རིམ་པས་ནུས་ན་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་ལ་བསམ་བློ་ཡག་པོ་ཞིག་བཏང་ནས་རིམ་བཞིན་ཟབ་པ་དང་རྒྱ་ཆེ་བའི་རྟོགས་པའི་ཡོན་ཏན་གོང་ནས་གོང་དུ་འཕེལ་ནས། མཐར་འཕགས་པ་སྤྱན་རས་གཟིགས་ཀྱི་གོ་འཕང་མངོན་དུ་བྱེད་ཐུབ་པ་ཞིག་ངོས་ཀྱིས་ཕལ་ཆེར་འགན་ལེན་བྱས་ཏེ་བཤད་ཐུབ་ཀྱི་རེད། མཁྱེན་སོང་ངམ།
ང་ཚོ་ཚང་མ་དུས་ཚོད་ཁག་པོ་ཞིག་ལ་སླེབས་པ་རེད། ཧུར་ཐག་འབད་ཐག་བྱས་པ་རེད། ང་ཚོ་ཚེ་རབས་ནས་ཚེ་རབས་འཕགས་པ་སྤྱན་རས་གཟིགས་ཀྱི་འབྲལ་མེད་གཉེན་བཞིན་རྗེས་སུ་བཟུང་བའི་ཐོག་ནས་རིམ་གྱིས་ས་ལམ་བགྲོད་ནས་རྣམ་མཁྱེན་རྒྱལ་བའི་གོ་འཕང་ཐོབ་ཐུབ་པ་ཞིག་ལ། རྗེ་བཙུན་མི་ལའི་གསུང་ཞིག་ཏུ། རི་ལ་སྒོམ་པའི་སྒོམ་ཆེན་དང༌། །འཚོ་བ་སྦྱོར་བའི་ཡོན་བདག་གཉིས། །སངས་མཉམ་པོར་རྒྱ་བའི་རྟེན་འབྲེལ་ཡོད། །རྟེན་འབྲེལ་གྱི་སྙིང་པོ་བསྔོ་བ་ཡིན། །ཞེས་འཚང་མཉམ་པོར་རྒྱ་བའི་མདའ་ཡི་སྦྱིན་བདག་དང་ཕུགས་ཀྱི་རྣལ་འབྱོར་བ་ཚོར་ཟང་ཟིང་གི་ཐོག་ནས་འབྲེལ་བ་ཡོད་པ་དེས་ཚེ་རབས་ནས་ཚེ་རབས་འབྲེལ་བ་ཡོང་བའི་རྟེན་འབྲེལ་ཡོད་པ་རེད། རྟེན་འབྲེལ་གྱི་སྙིང་པོ་བསྔོ་བ་ཡིན་གསུངས་པ་རེད། དེར་བརྟེན་ང་ཚོ་ཚང་མས་མི་ཚེ་འདིའི་རིང་བོད་བསྟན་སྲིད་ཀྱི་དོན་དུ་ལྷག་བསམ་རྣམ་དག་གིས་ཞབས་འདེགས་སྒྲུབ་པའི་དགེ་བའི་རྩ་བ་གང་ཡོད་པ་དེ་སྤྱིར་སངས་རྒྱས་ཀྱི་བསྟན་པ་རྒྱས་པ་དང་། ཡང་སྒོས་འཛམ་གླིང་འདིར་དངོས་གནས་ཞི་བདེ་ཡག་པོ་ཞིག་ཡོང་བ་དང་། ཞི་བདེ་ནི་ཕྱི་ལོགས་ནས་མ་ཡིན་པར་སེམས་ནས་འགྲོ་དགོས། ད་ལྟའི་འཛམ་གླིང་འདི་ཆགས་སྡང་གི་གཞན་དབང་ལ་ཕྱིན་ནས་མི་སུ་ཡིན་ཡང་བདེ་སྐྱིད་འདོད་པ་དང་སྡུག་བསྔལ་མི་འདོད་མཁན་ཡིན། འོན་ཀྱང་ཆགས་སྡང་གི་དབང་གིས་མིའི་སྡུག་བསྔལ་མང་པོ་ཞིག་མི་རང་གིས་བཟོས་ནས་ཡོང་གི་ཡོད། དེ་ལྟ་བུའི་ཆགས་སྡང་གི་རླུང་འཚུབ་ལྡང་ནས་ཡོད་པའི་ས་ལ་འཕགས་པ་སྤྱན་རས་གཟིགས་ཀྱི་བྱིན་རླབས་ཀྱིས་རིམ་བཞིན་འཛམ་གླིང་འདིར་བྱམས་བརྩེའི་བློ་ཤུགས་ཆེ་རུ་ཕྱིན་ནས། སྐྱེ་བ་སྔ་ཕྱིའི་སྐད་ཆ་བཤད་མི་དགོས་པར་ཚེ་འདི་ལ་བྱམས་བརྩེ་ལྡན་པའི་འཛམ་བུའི་གླིང་ཞིག་ཡོང་ཐུབ་པ་དང་། དེའི་ཆ་རྐྱེན་སྒྲུབ་པར་ང་ཚོར་ནུས་པ་ཏན་ཏན་ཡོད་པ་རེད།
བོད་མི་བཙན་བྱོལ་བ་ཕྱི་རྒྱལ་ཡུལ་གྲུ་ཁག་ལ་ཡོད་མཁན་ཚོ་ངོ་ཤེས་མཁན་ཚོས་བོད་པ་ཚོ་ཡ་རབས། དྲང་བདེན། སེམས་པ་བཟང་པོ་ཡག་པོ་འདུག་ཅེས་མང་པོས་བཤད་ཀྱི་འདུག དེ་ལྟར་མིག་དཔེ་ཞིག་སྟོན་གྱི་ཡོད་པ་རེད། དེར་བརྟེན་ང་ཚོ་བོད་མི་སྤྱི་བོ་གནམ་བསྟན་ཡོངས་སུ་རྫོགས་པས་ཆེ་ཕྱོགས་ཆུང་ཕྱོགས་ནས་འཛམ་གླིང་འདིར་བྱམས་བརྩེ་གོང་འཕེལ་ཡོང་བར་ཤུགས་ག་ཚོད་ཐུབ་ཐུབ་རྒྱག་ཐུབ་ན་སོ་སོས་ཚོགས་བསགས་པ་དང་། བསྟན་པའི་ཞབས་འདེགས་སྒྲུབ་པ་ཞེས་པའང་དེ་ལྟ་བུའི་ཐོག་ནས་ཡོང་དགོས་པ་རེད། དེ་ནས་འཛམ་གླིང་སྤྱི་ལ་ཕན་ཐོགས་ཆེ་བའང་དེ་ལྟར་རེད། ངོས་ཀྱི་ངོས་ནས་ཆ་བཞག་ན་སེམས་ཅན་ཐམས་ཅད་ཅེས་ང་ཚོ་ཚང་མས་སྨོན་ལམ་བརྒྱག་བཞིན་ཡོད་པ་རེད། ཁ་ཡོད་ལག་ཡོད་ནི་འཛམ་གླིང་འདིར་མི་དུང་ཕྱུར་བདུན་ཅུ་ཞིག་ཡོད་པ་འདི་དག་རེད། འདི་དག་སྐད་ཡིག་མི་འདྲ་བ་ཡིན་ནའང་སྐད་ཆ་བཤད་རྒྱུ་ཡོད་པ་དང་མིའི་བསམ་བློ་ཡོད་པས་ང་ཚོས་འབྲེལ་བ་བྱེད་ཐུབ་པས་མི་དུང་ཕྱུར་བདུན་ཅུའི་ནང་གི་མི་གཅིག་ཡིན་པའི་འདུ་ཤེས་ཀྱི་ཐོག་ནས་ས་ཆ་གང་དུ་ཕྱིན་པ་ཡིན་ནའང་སེམས་པ་བཟང་པོ་དགོས་པ་དང་བྱམས་བརྩེ་ལྡན་པ་བྱེད་དགོས་པ་རྟག་པར་བཤད་ཀྱི་ཡོད། དེ་སྐྱེ་བ་ཕྱི་མའི་སྐད་ཆ་དང་དག་ཞིང་གི་སྐད་ཆ་མ་རེད། ཉིན་རེར་སེམས་སྐྱིད་པོ་ཡོང་བ་དང་མི་ཚང་དེ་སྐྱིད་པོ་ཡོང་བ། སྤྱི་ཚོགས་སྐྱིད་པོ་ཡོང་བ། མཐར་ཐུག་སྤྱི་ཚོགས་བསྡོམས་པའི་འཛམ་གླིང་འདི་ཞི་བདེ་ཡོང་བ་ཞིག་ལ་གཙོ་བོ་སེམས་རྒྱུད་ཞི་བདེའི་རང་བཞིན་ཅན། བྱམས་བརྩེ་ལྡན་པ་ཞིག་བྱེད་རྒྱུ་ངོས་ཀྱིས་རྒྱུན་དུ་བཤད་བཞིན་ཡོད། ཁྱོད་རང་ཚོ་༸རྒྱལ་བ་རིན་པོ་ཆེའི་ཨབ་ཕྲུག་ལྟ་བུ་ཆགས་ཡོད། གོང་དུ་བཤད་པ་ལྟར་༸རྒྱལ་བ་རིན་པོ་ཆེས་སྤོ་ལགས་འཕག་འཚག་རྒྱག་བཞིན་ཡོད་པ་རེད། ཁྱོད་རང་ཚོས་ཀྱང་དེའི་འཁྲིས་ལ་ག་ཚོད་ཐུབ་ཐུབ་ཀྱིས་འཕག་འཚག་བརྒྱབ་ནས་ཤུགས་རྒྱབ་ཤོག མཁྱེན་སོང་ངམ།
གང་ལྟར་སྔ་རྗེས་མ་གཏོགས་ང་ཚོ་ཚང་མ་ཤི་འགྲོ་བ་རེད། ཤི་ཁར་འགྱོད་པ་མེད་པ་ཞིག ང་ཚོ་བཙན་བྱོལ་བྱས་ནས་བསྡད་པའི་རིང་ལ་༸རྒྱལ་བ་རིན་པོ་ཆེའི་མགོ་ཁྲིད་པའི་འོག་ལ་འཕགས་པ་སྤྱན་རས་གཟིགས་ཀྱི་དགོངས་པ་དང་མཐུན་པར་བྱམས་བརྩེ་གོང་སྤེལ་གཏོང་བ་ཞིག་ལ་ཧུར་ཐག་བྱས་པ་ཡིན། དེའི་ཆ་རྐྱེན་གཙོ་བོ་གཅིག་དེ་བོད་མི་རིགས་རིག་གཞུང་དང་བཅས་པ་མུ་མཐུད་ནས་གནས་ཐུབ་པ་ཞིག་གནད་འགག་ཆགས་ཀྱི་ཡོད་པས་གང་ཡོང་ཅི་ཡོང་གིས་ཧུར་ཐག་བྱས་པ་ཡིན། དེའི་དགེ་བའི་མཐུ་ལ་བརྟེན་ནས་ཚེ་རབས་ནས་ཚེ་རབས་འཕགས་པ་སྤྱན་རས་གཟིགས་ཀྱི་རྗེས་སུ་གཟུང་བ་ཞིག་ལ་སྨོན་ལམ་ཡག་པོ་རྒྱོབ། མཁྱེན་སོང་ངམ། ཞེས་བཀའ་སློབ་སྩལ།
དེ་རྗེས་བསུན་བཟློག་གི་ཆོ་ག་ལ་རོལ་མོའི་བྱིན་འབེབས་སྐབས་མཁའ་འགྲོ་མ་རྣམས་གར་སྟབས་བཅས་ནང་དུ་བཏང་སྟེ་སོ་སོའི་མདོག་མཐུན་ཁྲི་དར་སྣེ་བཟུང་སྟེ་བཞུགས་ཁྲིའི་མདུན་དུ་འཁོད་པ་དང་། ཞལ་འདོན་ཚིག་བསྟུན་གྱིས་དབུ་བཞུགས་མཆོག་གིས་དར་སྣེ་གཅོད་བྲེགས་མཛད་པ་དང་། རིམ་བཞིན་མཁའ་འགྲོ་མ་རྣམས་སྐུ་གླུད་ཀྱི་མདུན་དུ་འཁོད། ཡོན་བདག་ནས་སྐུ་གླུད་ལ་སྒྲོན་དར་དང་མཁའ་འགྲོ་འཁོར་བཅས་ལ་ཡོན་དང་། དར། དཀར་སྤྲོ། ཚོགས་བཅས་ཕུལ་ཏེ་ཕྱིར་གཤེགས། བརྟན་བཞུགས་དངོས་གཞིར་སློབ་དཔོན་ལྷར་བསྐྱེད་སོགས་རིམ་བཞིན་གསུངས་ཏེ་རིག་འཛིན་བརྒྱུད་སྐུལ་གྱི་གསུང་ཚིག་ཐ་མ་འཆི་མེད་ཚེ་ཡི་དངོས་གྲུབ་སྩོལ་ཞེས་པའི་མཚམས་སུ་དབུ་བཞུགས་སྐུ་བཞེངས་ཀྱིས་ཚེ་མདའ་སློབ་དཔོན་ལ་ཕུལ་བ་དང་། མཎྜལ་རྒྱས་པའི་མཇུག་ཏུ་དབུ་བཞུགས་མཁན་རིན་པོ་ཆེ་མཆོག་དང་། བཀའ་ཁྲི་ཟུར་པ་བསྟན་འཛིན་རྣམ་རྒྱལ་མཆོག ཁྲིམས་ཞིབ་པ་ཆེ་བ་ཟུར་པ་རྣམ་རྒྱལ་ཚེ་རིང་མཆོག་དང་ངག་དབང་འཕེལ་རྒྱས་མཆོག་བཅས་ནས་ཚོམ་བུ་ཟུར་བཏེགས་འབུལ་བཞེས་དང་མུ་མཐུད་བཞེངས་མུར། ཚིག་བསྟུན་གྱིས་སྐུ་རྟེན། གསུང་རྟེན། ཐུགས་རྟེན། བུམ་པ། ཚེ་ཆང་། ཚེ་རིལ། ཚེ་མདའ། ལས་བཞི་འབྲང་རྒྱས་དབང་། དྲག་པོ། ཞི་བ། རྒྱས་པ་བཅས་དང་། བཀྲ་ཤིས་རྟགས་བརྒྱད། རྒྱལ་སྲིད་སྣ་བདུན། བཀྲ་ཤིས་རྫས་བརྒྱད་བཅས་ཕུལ་ཏེ་དབུ་བཞུགས་མཇལ་ཁ་ཞུས་པ་དང་། མུ་མཐུད་ཁྲིམས་ཞིབ་པ་ཟུར་པ་རྣམ་པ་དང་བཀའ་ཟུར་རྣམ་པ། རང་དབང་ཅན་གྱི་སྡེ་ཚན་ཁག་གི་འགན་འཛིན་ཟུར་པ་རྣམ་པ་སོགས་ནས་མཇལ་ཁ་ཞུས་པ་སོགས་གྲུབ་རྗེས་གཞུང་ཞབས་ཟུར་པའི་བརྟན་བཞུགས་གྲ་སྒྲིག་ཚོགས་ཆུང་ནས་ཆེད་བཟོ་གནང་བའི་༸གོང་ས་མཆོག་གི་བཀའ་དྲིན་རྗེས་དྲན་དང་བསྟོད་དབྱངས་ཀྱི་གཞས་ཤིག་བོད་ཀྱི་ཟློས་གར་ཚོགས་པའི་གདངས་བརྩམས་ཏེ་གཟིགས་འབུལ་ཞུས་པ་དང་། དེ་ནས་མུ་མཐུད་ཞབས་བརྟན་གསོལ་འདེབས་གསུང་འདོན་གནང་རྗེས་བཀའ་སློབ་སྩལ་དོན།
སྔོན་ལ་གཏང་རག་མ་བྱས་གོང་ལ་ངོས་ཀྱིས་ཚིག་གཅིག་བཤད་འདོད་བྱུང་སོང་། ད་གིན་གོང་དུ་འགྲེལ་བཤད་ཞུས་པ་ནང་བཞིན་རེད། བོད་བསྟན་སྲིད་ཀྱི་དོན་དུ་ཞབས་འདེགས་སོ་སོའི་སྒོ་གསུམ་གྱི་ནུས་པ་ཅི་ཡོད་ཀྱི་ཐོག་ནས་སྒྲུབ་མཁན་དེ་དག་འཕགས་པའི་རྗེས་སུ་གཟུང་རྒྱུ་དང་། ཚེ་འདིའི་དབང་དུ་བྱས་པ་ཡིན་ནའང་། ཁྱེད་རང་ཚོ་འདིར་བརྟན་བཞུགས་ཕུལ་མཁན་ཚོ་ཡང་ཚེ་རིང་དུ་གནས་པ་ཞིག་དང་། མི་ཚེ་དོན་ལྡན་པ་ཞིག་ཡོང་བ་ལ་གཙོ་བོ་སོ་སོའི་ཉམས་ལེན་བྱེད་པ་ལ་རག་ལས་པ་རེད། ངོས་ལ་ཆ་བཞག་ན་བརྟན་བཞུགས་ཀྱི་གསོལ་འདེབས་དང་ཚིགས་བཅད་ཀྱི་ནང་དུ་ཡོད་པ་བཞིན་ཚེ་ཁྲིད་བརྒྱུད་པའི་བླ་མ་དག་གསལ་བཏབ་ནས་འདུན་པ་གཏོང་བ་དང་། སེམས་ཤུགས་བསྐྱེད་པ་རྟག་ཏུ་བྱེད་བཞིན་ཡོད་པ་དེ་རིང་འདིར་ཡང་བྱས་པ་ཡིན། འཁྲུལ་ཞིག་རིན་པོ་ཆེས་ངོས་ཀྱི་རྩ་བའི་བླ་མའི་གྲས་རེད། རིན་པོ་ཆེས་ཐང་སྟོང་རྒྱལ་པོའི་སྐུ་ཚེ་ནང་བཞིན་བཞུགས་དགོས་པ་རེད་ཅེས་གསུངས་ཀྱི་ཡོད། ཐང་སྟོང་རྒྱལ་པོ་དགུང་ལོ་བརྒྱ་དང་ཉི་ཤུ་རྩ་ལྔར་བཞུགས་པ་རེད། དེ་ཧ་ཅང་ཁག་པོ་རེད། དེ་ནས་ངོས་ཀྱིས་ངོ་ཤེས་པའི་བྱ་བྲལ་བ་ཡག་པོ་དེ་འདྲ་ཡོད། ཁོང་ཚོ་ཁ་ཤས་ཀྱིས་པཎ་ཆེན་བློ་བཟང་ཆོས་རྒྱན་དགུང་ལོ་བརྒྱ་དང་བརྒྱད་ལ་བཞུགས་པ་རེད། དེ་འདྲའི་རེ་འདུན་ཞུ་གི་ཡོད། བརྒྱ་དང་བརྒྱད་གང་འདྲ་ཡོད་མེད་མི་ཤེས་ཏེ་གང་ལྟར་ལོ་དགུ་བཅུ་གོ་གྲངས་ཤིག་དང་། བརྒྱ་སྐོར་ཞིག་ཕལ་ཆེར་སྡོད་ཀྱི་རེད་བསམ་གྱི་འདུག དེ་ངོས་ཀྱིས་འདི་རུ་རྟག་དཔྱད་བྱེད་ཀྱི་ཡོད་པས་ཕལ་ཆེར་ལོ་དགུ་བཅུ་གོ་གྲངས་བརྒྱ་ཡས་མས་ཤིག་སྡོད་ཐུབ་པའི་བཟོ་ལྟ་འདུག
ངོས་ཀྱི་ངོས་ནས་ཚེ་རབས་ནས་ཚེ་རབས་བསྟན་པ་དང་འགྲོ་བ་ལ་ཕན་པ་ཞིག་གི་སྨོན་ལམ་རྒྱག་བཞིན་ཡོད་པ་རེད། ཇི་སྲིད་ནམ་མཁའ་གནས་པ་དང༌། །འགྲོ་བ་ཇི་སྲིད་གནས་གྱུར་པ། །དེ་སྲིད་བདག་ནི་གནས་གྱུར་ནས། །འགྲོ་བའི་སྡུག་བསྔལ་སེལ་བར་ཤོག །ཅེས་སྨོན་ལམ་འདི་རྒྱག་གི་ཡོད། ད་ལྟ་ཁ་ཡོད་ལག་ཡོད་ཀྱིས་སྨོན་ལམ་གཅིག་པུ་མ་ཡིན་པར་དངོས་ཡོད་གནས་ཚུལ་ལ་བོད་འབངས་གཙོ་བོར་གྱུར་པའི་སེམས་ཅན་མང་པོར་ཕན་གྱི་འདུག་པས་ཇི་ཙམ་ཚེ་གནས་པ་བྱུང་ན་དེའི་ཚོད་ཀྱིས་བོད་མི་གཙོ་བོར་གྱུར་པའི་མི་གང་ལ་གང་འཚམ་ཞིག་ལ་ཕན་ཐོགས་ཡོང་བ་ཞིག་དང་། དེ་དང་ཆབས་ཅིག་བསྟན་པ་རྒྱས་པ་དང་བསྟན་པའི་ཞབས་འདེགས་སྒྲུབ་པ་ཞིག་ལ། བསྟན་པ་རིན་ཆེན་མཆོག་གིས་མ་ཁྱབ་པའམ། །ཁྱབ་ཀྱང་ཉམས་པར་གྱུར་པའི་ཕྱོགས་དེར་ནི། །སྙིང་རྗེ་ཆེན་པོས་ཡིད་རབ་བསྐྱོད་པ་ཡིས། །ཕན་བདེའི་གཏེར་དེ་གསལ་བར་བྱེད་པར་ཤོག །ཅེས་ཐུགས་སྨོན་གནང་བ་བཞིན། ཁ་ཡོད་ལག་ཡོད་ཀྱིས་བསྟན་པ་དང་འགྲོ་བའི་དོན་བྱེད་རྒྱུ་ཡོད་པ་འདི་ཕན་པ་དང་འདུན་པ་ཤུགས་ཆེན་པོ་གཏོང་བ་ལ་ལྷོད་གཡེང་ཕྱིན་ནས་ཚེ་རབས་གཞན་དང་གཞན་བཤད་ཀྱིན་བསྡད་ན་སྟོང་པ་རེད་འདུག ད་ལྟ་འདི་ཁ་ཡོད་ལག་ཡོད་རེད། དེར་བརྟེན་ལོ་བརྒྱ་སྐོར་ཞིག་སྡོད་ཐུབ་པར་སྨོན་ལམ་རྒྱག་གི་ཡོད་ལ་ཕལ་ཆེར་སྡོད་ཐུབ་ཀྱི་རེད་བསམ་པ་དྲན་གྱི་འདུག འདི་ནི་ཁྱོད་རང་ཚོས་གསོལ་འདེབས་གནང་བའི་ལན་ཡིན། ད་གཏང་རག་ཕུལ་ཤོག་ཅེས་བཀའ་སློབ་སྩལ། །
