ཕྱི་ལོ་ ༢༠༡༩ ཟླ་ ༧ ཚེས་ ༣༡ རེས་གཟའ་ལྷག་པ།

༄༅། །འདི་གར་སྦེང་ལོར་ལྷོ་སྤྱི་ལས་ཁུངས་ནས་བཏང་གནས་ནང་འཁོད་དོན། རྒྱ་གར་ལྷོ་ཕྱོགས་ཀར་ན་ཊ་ཀ་མངའ་སྡེའི་གཞུང་ཉེ་དུས་འཕོ་འགྱུར་གྱིས་སྐུ་ཞབས་ཡ་དི་ཡུ་རབ་པ་ B.S. Yediyurappa  མཆོག་སླར་ཡང་ཀར་ན་ཊ་ཀ་མངའ་སྡེའི་སྤྱི་ཁྱབ་བློན་ཆེན་དུ་བསྐོ་བཞག་གནང་བར། ཕྱི་ལོ་ ༢༠༡༩ ཟླ་ ༧ ཚེས་ ༣༠ ཉིན་ལྷོ་སྤྱི་ཆོས་འཕེལ་ཐུབ་བསྟན་ལགས་ཀྱིས་རྒྱ་གར་ལྷོ་ཕྱོགས་བོད་མིའི་གཞིས་ཆགས་ཁག་ལྔའི་མགྲིན་ཚབ་གནང་སྟེ་མངའ་སྡེའི་སྤྱི་ཁྱབ་བློན་ཆེན་གསར་པ་མཆོག་དང་མཇལ་འཕྲད་ཞུས་ཏེ་རྒྱ་གར་ལྷོ་ཕྱོགས་ཁུལ་གནས་སྡོད་བོད་མི་ཡོངས་ཀྱི་ཚབ་ཞུས་ཏེ་དགའ་བསུའི་འཚམས་འདྲི་དང༌། མ་འོངས་ལས་དོན་གང་ཅིའི་ཐད་བྱ་བ་ལམ་ལྷོང་ཡོང་བས་སྨོན་འདུན་ཞུས། ཕྱོགས་མཚུངས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དགའ་བསུའི་འཚམས་འཕྲིན་དང་། བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་དང་བོད་མི་མང་སྤྱི་འཐུས་ཚོགས་གཙོ་བཅས་སོ་སོ་ནས་འཚམས་འདྲི་ཕྱག་བྲིས་མངའ་སྡེའི་སྤྱི་ཁྱབ་བློན་ཆེན་མཆོག་ལ་སྤྱན་འབུལ་ཞུས།

སྤྱིར་ཀར་ན་ཊ་ཀ་མངའ་སྡེའི་གཞུང་མང་གཉིས་ནི་རྒྱ་གར་ལྷོ་ཕྱོགས་ཁུལ་གྱི་བོད་མི་རྣམས་ལ་དམིགས་བསལ་གྱི་བཀའ་དྲིན་ཆེན་པོ་ཡིན་པ་དང༌། ལྷག་དོན་དུ་ལྷོ་ཕྱོགས་གཞིས་ཆགས་ཁག་ནང་ཆུ་དང་གློག་ལམ་གསུམ་གྱིས་གཙོས་མངའ་གཞུང་ནས་བོད་མི་རྣམས་ལ་ཡུལ་མི་སྤྱི་མཚུངས་ལྟར་མཐུན་འགྱུར་རོགས་རམ་གནང་དང་གནང་མུས་ཡིན། སྤྱི་ཁྱབ་བློན་ཆེན་གསར་པ་མཆོག་གིས་མ་འོངས་པར་མུ་མཐུད་བོད་མི་རྣམས་ལ་མངའ་སྡེའི་གཞུང་ནས་རོགས་རམ་གང་ཐུབ་གནང་རྒྱུའི་ཞལ་བཞེས་གནང་ཡོད་པ་བཅས། །