ཕྱི་ལོ་ ༢༠༡༩ ཟླ་ ༧ ཚེས་ ༡༢ རེས་གཟའ་པ་སངས།  

༄༅། །ཕྱི་ལོ་ ༢༠༡༩ ཟླ་ ༧ ཚེས་ ༡༡ རེས་གཟའ་ཕུར་བུའི་ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་ཨི་ཊ་ལིའི་ལྷོ་ཊི་རོལ་ South Tyrol རང་སྐྱོང་མངའ་ཁུལ་གྱི་རྒྱལ་ས་བྷོལ་ཛ་ནོར་ Bolzano ཕེབས་འབྱོར་བྱུང་མཚམས། ཁུལ་དེའི་མངའ་སྡེའི་སྲིད་སྐྱོང་སྐུ་ཞབས་ཨར་ནོ་ཀོམ་པ་ཆར་ Mr. Arno Kompatscher མཆོག་དང་མཇལ་འཕྲད་གནང་འདུག 

དེ་ཡང་ཨི་ཊ་ལིའི་ལྷོ་ཊི་རོལ་ South Tyrol ཞེས་པ་ནི་ཕྱི་ལོ་ ༡༩༧༢ ལོར་རང་སྐྱོང་མངའ་ཁུལ་གྱི་གནས་བབ་ཐོབ་པ་ཞིག་ཡིན་འདུག 

སྐབས་དེར་དཔལ་ལྡན་སྲིད་སྐྱོང་མཆོག་གིས་རྒྱ་ནག་གཞུང་གིས་ཨི་ཊ་ལིའི་ལྷོ་ཊི་རོལ་རང་སྐྱོང་མངའ་ཁུལ་གོང་འཕེལ་གྱི་གནས་བབ་ལ་མིག་དཔེ་བཟུང་ནས་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ཀྱི་སྒྲོམ་གཞིའི་འོག་བོད་རིགས་ཡོངས་ལ་རང་སྐྱོང་གི་གནས་བབ་ཚད་ལྡན་ཞིག་སྤྲད་དགོས། ཞེས་གསུངས། 

ད་ལྟའི་ཆར་འཛམ་གླིང་གི་འགོ་ཁྲིད་རྣམས་ཀྱི་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་མཆོག་དང་ལྷན་དུ་ཐུག་འཕྲད་བྱ་རྒྱུ་གཡོལ་ཐབས་བྱེད་བཞིན་པའི་སྐབས་འདིར། ལྷོ་ཊི་རོལ་མངའ་སྡེའི་སྲིད་སྐྱོང་མཆོག་གིས་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་དང་མཇལ་འཕྲད་གནང་བ་མ་ཟད།  བོད་མི་ཚོར་མིང་དོན་མཚུངས་པའི་རང་སྐྱོང་གི་གནས་བབ་ཐོབ་ཆེད་མངོན་གསལ་དོད་པོའི་རྒྱབ་སྐྱོར་གནང་འདུག  

སྤྱིར་འཛམ་གླིང་གི་ས་ཁྲའི་སྟེང་བོད་རང་སྐྱོང་ལྗོངས་ཞེས་བསྟན་པ་མ་གཏོགས།  དོན་དངོས་རྒྱ་ནག་གཞུང་གིས་དམ་བསྒྲགས་ཧ་ཅང་འོག་ཡོད་པ་ལས་མིང་དོན་མཚུངས་པ་ཞིག་རྩ་བ་ནས་མེད།  

གཞན་ཡང་དཔལ་ལྡན་སྲིད་སྐྱོང་མཆོག་གིས་བྷོལ་ཛ་ནོའི་ཡུ་རོབ་ཀྱི་ཤེས་ཡོན་བསྟི་གནས་ཁང་ European Academy of Bolzano,(EURAC) གི་ཉམས་ཞིབ་པ་དང་ལས༌བྱེད། སློབ་ཕྲུག་བཅས་ལ་འཛམ་གླིང་རྒྱལ་ཁབ་ཚོས་རྒྱ་ནག་དང་འབྲེལ་བ་གནང་སྐབས།  ལོ་རྒྱུས་ཐོག་བོད་ལ་གང་བྱུང་བ་དེ་དག་ལས་བློ་སྐྱེད་མང་པོ་ཞིག་ལེན་ཐུབ་རྒྱུ་དང་།  ལྷག་པར་ཉེ་ལམ་ཨི་ཊ་ལི་སྲིད་གཞུང་གིས་རྒྱ་ནག་གཞུང་དང་ལྷན།  རྒྱུད་གཅིག་ལམ་གཅིག་ཟེར་བའི་ཚོང་འབྲེལ་གན་རྒྱར་མིང་རྟགས་བཀོད་ཡོད་པ་སྟབས།  བོད་ལ་གང་བྱུང་བ་དེ་དག་ལ་དགོངས་བཞེས་ཐོག་ཡིད་གཟབ་གནང་གལ་ཆེ་སྐོར་གསུང་དོན། “ང་རང་འདིར་ཁྱེད་ཚོར།  བོད་དོན་རྒྱབ་སྐྱོར་མུ་མཐུད་གནང་རོགས། ཞེས་འབོད་སྐུལ་ཞུ་ཆེད་ཡོང་བ་ཡིན།  འོན་ཀྱང་ཁྱེད་ཚོས་ཀྱང་རྒྱ་ནག་དང་ལྷན་ཚོང་གི་འབྲེལ་ལམ་གསར་པ་ཞིག་འགོ་འཛུགས་གནང་ཡོད་སྟབས།  ངས་ཁྱེད་ཚོར་ངེས་པར་ཡིད་གཟབ་གནང་རོགས་ཞེས་ཞུ་རྒྱུ་ཡིན། ཞེས་སོགས་གསུང་།

སྤྱིར་ཤེས་ཡོན་བསྟི་གནས་ཁང་དེ་དང་བོད་མིའི་སྒྲིག་འཛུགས་དབར་ཤེས་ཡོན་བརྗེ་ལེན་གྱི་ལས་འགུལ་སྤེལ་རེས་གནང་ནས་ད་བར་ལོ་ངོ་ ༢༥ ཕྱིན་འདུག་པ་བཅས། །