ཕྱི་ལོ་ ༢༠༡༩ ཟླ་ ༧ ཚེས་ ༨ རེས་གཟའ་ཟླ་བ།

༄༅། །བོད་རྒྱལ་ལོ་ ༢༡༤༦ ཕྱི་ལོ་ ༢༠༡༩ ཟླ་ ༧ ཚེས་ ༦ ཉིན་བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་ལོ་ ༨༤ ལ་ཕེབས་པའི་༧སྐུའི་འཁྲུངས་སྐར་དུས་ཆེན་དང་བསྟུན། རྒྱ་གར་གྱི་རྒྱལ་ས་ལྡི་ལིར་རྟེན་གཞི་བྱས་པའི་རྒྱ་གར་རིག་གཞུང་བསྟི་གནས་ཁང་ India Habitat Centre དུ་གོང་ཚེས་ཉིན་གྱི་དགོང་དྲོ་ལྡི་ལི་སྐུ་ཚབ་དོན་གཅོད་ཁང་གིས་གོ་སྒྲིག་ཞུས་ཏེ་རྒྱ་གར་སྐུ་མགྲོན་གྱིས་གཙོས་རྒྱ་གར་རྒྱལ་ས་ལྡི་ལིར་ཡོད་པའི་གཞུང་ཚབ་ཀྱི་སྐུ་ཚབ་རྣམས་དང་། རྒྱ་གར་གྱི་དཔོན་རིགས་ཟུར་པ་རྣམ་པ། གནད་ཡོད་མི་སྣ། རྒྱ་གར་བོད་དོན་རྒྱབ་སྐྱོར་ཚོགས་པའི་ཚོགས་མི། དེ་བཞིན་གསར་འགོད་པ་དང་བོད་པའི་སྐུ་མགྲོན་སོགས་ཁྱོན་མི་གྲངས་ ༢༥༠ ལྷག་ལ་དགོང་དྲོའི་གསོལ་ཚིགས་སྟབས་བདེ་ཞིག་འདེགས་འབུལ་ཞུས་ཡོད། སྐབས་དེར་ལྡི་ལི་སྐུ་ཚབ་དོན་གཅོད་འབྲོང་ཆུང་དངོས་གྲུབ་ལགས་ཀྱིས་སྐུ་མགྲོན་རྣམ་པ་རེ་རེ་བཞིན་ཕེབས་བསུའི་ཞུས་གནང་ཡོད།

མཛད་སྒོའི་ཐོག་མར་ལྡི་ལི་བསམ་ཡས་གླིང་གི་དགེ་འདུན་པ་ཁག་གཅིག་གིས་སྨོན་ལམ་གསུང་འདོན་གནང་གྲུབ་མཚམས་ལྡི་ལི་དོན་ཁང་གི་དྲུང་ཆེ་ཀརྨ་ཆོས་དབྱིངས་ལགས་ཀྱིས་ཕེབས་བསུའི་གསུང་བཤད་དང་འབྲེལ་སྐུ་མགྲོན་རྣམས་ཆེད་ཕེབས་གནང་བར་སྙིང་ཐག་པ་ནས་ཐུགས་རྗེ་ཆེ་ཞུས་ཡོད།

དེ་ནས་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་དུས་ཆེན་དང་འབྲེལ་ངོ་སྤྲོད་གསུང་བཤད་གཟབ་རྒྱས་གནང་ཡོད་པ་མ་ཟད། སྐུ་མགྲོན་རྣམས་ཆེད་ཕེབས་གནང་བར་ཐུགས་རྗེ་ཆེ་ཡང་ཞུས་གནང་ཡོད། 

སྐབས་དེར་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་ཟུར་པ་མཁན་པོ་བསོད་ནམས་བསྟན་འཕེལ་ལགས་དང་། སྤྱི་འཐུས་དགེ་བཤེས་ཀུན་དགའ་བསོད་སྟོབས་ལགས། བཀའ་ཟུར་རྒྱ་རི་སྒྲོལ་མ་ལགས། ཉི་ཧོང་སྐུ་ཚབ་དོན་གཅོད་ཟུར་པ་རྒྱ་རི་པདྨ་རྒྱལ་པོ་ལགས་བཅས་ཆེད་ཕེབས་གནང་ཡོད་པ་བཅས། །