ཕྱི་ལོ་ ༢༠༡༩ ཟླ་ ༧ ཚེས་ ༡༢ རེས་གཟའ་པ་སངས།
༄༅། །ཕྱི་ལོ་ ༢༠༡༩ ཟླ་ ༧ ཚེས་ ༡༢ རེས་གཟའ་པ་སངས་ཉིན་བོད་མིའི་སྒྲིག་འཛུགས་ཀྱི་བོད་མིའི་ཁྱད་ལས་དང་བླངས་ཞབས་ཞུ་ཚན་པ་བརྒྱུད་བོད་མིའི་སྒྲིག་འཛུགས་ཀྱི་ལྷན་ཁང་ཁག་ཏུ་དང་བླངས་ཞབས་ཞུ་སླད་བཅར་བའི་མི་གྲངས་ ༢༣ ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་༸རྒྱལ་བའི་ཕོ་བྲང་དུ་མཇལ་ཁ་དང་བཀའ་སློབ་སྩལ་དོན། བོད་པའི་སྤྱི་ཚོགས་ལ་ཞབས་འདེགས་ཞུ་རྒྱུ་ཧ་ཅང་གལ་ཆེན་པོ་འདུག ད་བར་བོད་པ་ཚོས་ཧ་ཅང་གྱོང་པོ་བྱས་ནས་བསྡད་པ་རེད། ད་དུང་ཡིན་ཡང་བོད་ཀྱི་ཆོས་དང་རིག་གཞུང་། མི་རིགས་ཀྱི་ཞེན་ཁོག་དེ་དག་རྩ་བར་བཟུང་ནས་རྒྱ་མིས་ཇི་ཙམ་དབང་ཡོད་བཤད་ཀྱང་། ང་ཚོ་བོད་པའི་སེམས་ཤུགས་ནམ་ཡང་བརླགས་མེད།
དེར་བརྟེན་མུ་མཐུད་འབད་བརྩོན་བྱེད་དགོས། རྒྱ་ནག་ནང་རིམ་བཞིན་འགྱུར་བ་འགྲོ་བཞིན་ཡོད། རྒྱ་མིའི་དཔོན་རིགས་ཚོའི་ནང་དུའང་ད་བར་རྒྱ་མིས་བོད་ཐོག་འཛིན་པའི་སྲིད་བྱུས་དེས་གྲུབ་འབྲས་ཐོན་གྱི་མི་འདུག ད་ཆ་བོད་པའི་ཐོག་སྲིད་བྱུས་འཛིན་རྒྱུ་དེ་དངོས་ཡོད་གནས་ཚུལ་དང་མཐུན་པའི་སྲིད་བྱུས་གསར་པ་ཞིག་འཛིན་དགོས་ཀྱི་འདུག་ཅེས་པའི་སྐད་ཆ་བཤད་ཀྱི་འདུག གཙོ་ཆེ་ཤོས་གཞིས་ལུས་རྒྱ་ཆེའི་མི་མང་གིས་སེམས་ཤུགས་འགྱུར་བ་ཁྱོན་ནས་མེད་པར་བསྡད་པ་རེད། འདི་ལྐུགས་པའི་ཞེན་ཁོག་མ་རེད།
ང་ཚོ་བོད་ཀྱི་ཆོས་དང་རིག་གཞུང་འདི་འཛམ་གླིང་ལ་ངོམ་ཆོག་པ་ཞིག་དང་འཛམ་གླིང་ལ་ཕན་ཐོགས་ཡོད་པ་ཞིག་ཆགས་འདུག དེར་བརྟེན་བོད་མི་རིགས་ཀྱི་སོ་སོའི་རིག་གཞུང་སོགས་ལ་ཞེན་ཁོག་དང་སྤོབས་པ་བྱེད་རྒྱུ་འདི་རྒྱུ་མཚན་དང་ལྡན་པ་ཞིག་རེད། ཁྱེད་རང་ཚོ་སེམས་སྐྱིད་པོ་བྱས་ནས་སྡོད་ཨང་། ལས་ཀ་ཧུར་ཐག་བྱོས་ཤོག་ཨང་། ཞེས་བཀའ་སློབ་སྩལ། །
