ཕྱི་ལོ་ ༢༠༡༩ ཟླ་ ༧ ཚེས་ ༢༤ རེས་གཟའ་ལྷག་པ། 

༄༅། །ཕྱི་ལོ་ ༢༠༡༩ ཟླ་ ༧ ཚེས་ ༢༢ ནས་ ༢༨ བར་ཉིན་གྲངས་བདུན་རིང་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་གོ་སྒྲིག་དང་ཨ་རི་རོགས་ཚོགས་ཀྱི་མཐུན་འགྱུར་འོག་རྡ་ས་ཉེ་འགྲམ་དུ་ཡོད་པའི་འཛིན་སྐྱོང་སྦྱོང་བརྡར་ཁང་དུ་འཕྲོད་བསྟེན་ཁྱབ་ཁོངས་སྨན་ཁང་ཁག་གི་སྨན་ཞབས་པ་དང་འཕྲོད་ལས་པ་རྣམས་ལ་འཕྲོད་བསྟེན་གྲངས་ཐོ་དང་། ཊི་སྦི། སྐོར་བསྐྱོད་འཕྲོད་བསྟེན་སློབ་གསོ་བཅས་ཀྱི་ལོ་འཁོར་ཚོགས་འདུ་དང་ཟབ་སྦྱོང་ཞིག་འགོ་འཛུགས་གནང་འདུག 

དེ་ཡང་ཕྱི་ཚེས་  ༢༢ ཉིན་གྱི་སྔ་དྲོར་ཟབ་སྦྱོང་དབུ་འབྱེད་ཀྱི་མཛད་སྒོར་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་མཆོག་དང་། དྲུང་ཆེ་དཔལ་ལྡན་དོན་གྲུབ་ལགས། ཟབ་ཁྲིད་པ་ཀ་ནྦ་སྦན་ཊ་ Mr. Kanav Banta  ལགས་དང་ སུ་རེཤ་ཀུ་མར་ Suresh Kumar ལགས།  སུ་བྷཤ་ཅནྜ་ Mr. Subhash Chand ལགས།  སྨན་པ་བློ་བཟང་ཚེ་རིང་ལགས། བི་ཀས་ཌ་གུར་ Mr. Vikas Dagur ལགས།  ཟུང་དྲུང་ཚེ་རིང་གཡུ་སྒྲོན་ལགས་ཀྱིས་གཙོས་འབྲེལ་ཡོད་ལས་བྱེད་རྣམ་པ། རྒྱ་གར་དང་བལ་ཡུལ་ནང་གི་ས་གནས་འཕྲོད་བསྟེན་ཡན་ལག་སྨན་ཁང་ཁག་གི་སྨན་ཞབས་པ་དང་འཕྲོད་ལས་པ་ཁྱོན་མི་གྲངས་ ༤༥ བཅས་ཚང་འཛོམས་ཀྱིས་ཐོག་མར་སྐུ་མགྲོན་གཙོ་བོ་མཆོག་གིས། སྨན་ཞབས་པ་དང་འཕྲོད་ལས་པ་རྣམས་ནི་རང་རེའི་སྤྱི་ཚོགས་ནང་མང་ཚོགས་ཀྱི་འཕྲོད་བསྟེན་སླད་ཞབས་འདེགས་ཞུ་བཞིན་པར་བསྔགས་བརྗོད་དང་སྦྲགས་ལས་འགན་དེ་ནི་ཧ་ཅང་གལ་ཆེན་པོ་ཞིག་ཡིན་སྐོར་དང་། འཕྲོད་བསྟེན་གྱི་གྲངས་ཐོ་དང་ཊི་སྦི། སྐོར་བསྐྱོད་འཕྲོད་བསྟེན་སློབ་གསོ་བཅས་ཀྱི་ལོ་འཁོར་ཚོགས་འདུ་དང་ཟབ་སྦྱོང་གི་གལ་གནད་སྐོར། 

འཕྲོད་བསྟེན་གྲངས་ཐོ་ལས་གཞི་ནི་གལ་འགང་ཆེ་བའི་གྲངས་ཐོ་ཉར་ཚགས་བརྒྱུད་འཕྲོད་བསྟེན་གྱི་གནས་སྟངས་ཡག་པོ་དང། རྟོགས་ཞིབ་གང་འདྲ་བྱེད་དགོས་ཡོད་མེད། འཕྲོད་བསྟེན་གྱི་གནས་སྟངས་ཡར་རྒྱས་གཏོང་ཕྱོགས་ཐོག་འཆར་གཞི་སྒྲིག་རྒྱུ་སོགས་ཀྱི་ཐོག་ཕན་ཐོགས་ཆེན་པོ་ཡོད་སྐོར་དང་། དེ་བཞིན་ཊི་སྦི་ནད་གཞི་རྩ་མེད་བཟོ་རྒྱུ་ཐོག་ཤུགས་སྣོན་ངེས་པར་རྒྱག་དགོས་ཀྱི་ཡོད་པ། བོད་པའི་སྤྱི་ཚོགས་ནང་ད་ལྟའང་ཊི་སྦི་ནད་གཞི་ཁྱབ་དལ་འགྲོ་བཞིན་ཡོད་སྐོར་དང་། སྐོར་སྐྱོད་འཕྲོད་བསྟེན་སློབ་གསོ་ལས་གཞིའི་བརྒྱུད་དུད་ཚང་སོ་སོའི་ནང་གི་ནང་མིའི་གྲངས་ཐོ་དང་ནང་མིའི་གནས་སྟངས་རྒྱུས་ལོན་བྱེད་ཕྱོགས།

དེ་བཞིན་གཞིས་ཆགས་ཁག་ནང་མང་ཚོགས་ཀྱི་འཕྲོད་བསྟེན་གནས་སྟངས་དང་སྟངས་འཛིན་གནང་ཕྱོགས་ཐོག་ལ་གོ་རྟོགས་གང་མང་སྤེལ་ཐུབ་ཀྱི་ཡོད་སྐོར།  གཞན་ཡང་ཟླ་འདིའི་ཕྱི་ཚེས་ ༢༩ ཉིན་གསོ་རིག་སྐོར་རྒྱུས་སྟོན་ཞིག་འཚོགས་རྒྱུ་ཡིན། ཞེས་དང་།  ཚོགས་བཅར་བ་རྣམས་ནས་ཚོགས་འདུའི་དུས་ཚོད་ཆུད་ཟོས་སུ་མི་གཏོང་བར་གོ་སྐབས་དམ་འཛིན་གྱིས་གོ་བསྡུར་ལྷུག་པོ་གནང་དགོས་སྐོར་སོགས་ཀྱི་གསུང་བཤད་གནང་ཡོད། 

མཐར་འཕྲོད་བསྟེན་ཟུང་དྲུང་ཚེ་རིང་གཡུ་སྒྲོན་ལགས་ཀྱིས་ཐུགས་རྗེ་ཆེ་ཞུ་གསུང་བཤད་གནང་སྟེ་དབུ་འབྱེད་མཛད་སྒོ་གྲོལ་ཡོད་པ་བཅས། །