ཕྱི་ལོ་ ༢༠༡༧ ཟླ་ ༧ ཚེས་ ༢༤ རེས་གཟའ་ལྷག་པ།
༄༅། །ཕྱི་ལོ་ ༢༠༡༩ ཟླ་ ༧ ཚེས་ ༡༨ ནས་ ༢༠ བར་ཉིན་གྲངས་གསུམ་གྱི་རིང་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་གོ་སྒྲིག་དང་ཨ་རི་རོགས་ཚོགས་ཀྱིས་དཔལ་འབྱོར་མཐུན་འགྱུར་འོག་རྒྱ་གར་ལྷོ་ཕྱོགས་སྦེལ་ཀོབ་སྐྱེ་ལྡན་སོ་ནམ་ཉམས་ཞིབ་དང་སྦྱོང་བརྡར་ཁང་དུ་སོ་ནམ་གཞིས་ཆགས་གཙོ་ཆེ་བ་ཁག་གི་སོ་ནམ་སློབ་སྟོན་པ་རྣམས་ལ་བཙན་བྱོལ་བོད་མིའི་གཞིས་ཆགས་ཁག་ཏུ་སོ་ནམ་ལས་གཞི་གོང་སྤེལ་གཏོང་ཐབས་སུ་འཆར་གཞི་དང་ཐབས་བྱུས་སྐོར་གྱི་ཟབ་སྦྱོང་དང་བགྲོ་གླེང་ཚོགས་འདུ་ཚོགས་གནང་འདུག
དེ་ཡང་ནང་སྲིད་སོ་ནམ་ཚན་པའི་འགན་འཛིན་དྲུང་གཞོན་དོན་གྲུབ་ཚེ་རིང་ལགས་ཀྱིས་ལས་རིམ་འདི་རིགས་མུ་མཐུད་གོ་སྒྲིག་གནང་དགོས་དོན་གཙོ་བོ་ནི། རང་རེའི་ཞིང་པ་ཚོའི་ཁྲོད་ཞིང་ལས་དང་འབྲེལ་བའི་དཀའ་ངལ་ཁག་སེལ་ཐབས་སྤྱི་དང་། ལྷག་པར་དེང་དུས་ཞིང་ལས་ཀྱི་ཐབས་བྱུས་སྐོར་གོ་རྟོགས་གོང་སྤེལ་བཏང་བ་བརྒྱུད། ཞིང་པ་ཚོར་དངོས་སུ་ཕན་རླབས་བསྐྲུན་རྒྱུ་དང་། དེས་ཡོང་འབབ་དང་ཁེ་འབབ་ཡག་པོ་བྱུང་སྟེ་ཞིང་ལས་ནི་འཚོ་ཐབས་ལས་རིགས་ཤིག་ལ་བསྒྱུར་ཐབས་སུ་ཡིན་ཞེས་གསུང་།
ལས་རིམ་འདིའི་ཆེད་ལས་པ་རྣམས་ནས་ཁྲོམ་རར་རྒྱུགས་ཆེ་བའི་སྟོན་ཐོག་ཁག་ངོ་སྤྲོད་སོགས་དང་། ཞིང་ཆུ་འདྲེན་གཏོང་གི་ཐབས་ལམ། སྟབས་བདེའི་ལག་ཐོག་ཁ་པར་ཐོག་བཀོལ་སྤྱོད་མཉེན་ཆས་བེད་སྤྱོད་ཀྱི་ལམ་ནས་ཞིང་ལས་གཉེར་ཕྱོགས། དེ་བཞིན་ Jatropha cultivation ཞེས་པའི་སྟོན་ཐོག་འདེབས་ལས་དང་ལག་བསྟར་གནང་ཕྱོགས་ཀྱི་ཐབས་བྱུས། བོད་པའི་ཞིང་ལས་འགྲོ་སྟངས་དང་འབྲེལ་བའི་འཕྲུལ་ཆས་བེད་སྤྱོད་དང་ཡར་རྒྱས་གཏོང་ཕྱོགས། ཚོང་ཆེ་འབྲིང་ཆུང་གསུམ་ལ་དཔགས་པའི་ཕྱུགས་གསོ་ཁང་གཉེར་ཕྱོགས། ཟས་བཅུད་ལྡན་པའི་ཨ་ཤོམ་སྤུད་དག་ངོ་སྤྲོད།
དེ་བཞིན་ཚལ་ཞིང་རིགས་ནད་འབུ་ལས་སྐྱོབས་ཐབས་སོགས་ཀྱི་ཐབས་བྱུས་ཁག་ངོ་སྤྲོད་དང་སློབ་སྟོན་སོགས་ཀྱི་ལམ་ནས་བཙན་བྱོལ་བོད་མིའི་སོ་ནམ་ལས་དོན་ཡར་རྒྱས་དང་ཚགས་ཚུད་གོང་སྤེལ་གཏོང་ཐབས་གནང་ཡོད།
ལས་རིམ་འདིའི་ནང་སོ་ནམ་སློབ་སྟོན་པ་རྣམས་ནས་མཉམ་ཞུགས་གང་ལེགས་གནང་བའི་ཁར། རྒྱ་གར་ལྷོ་ཕྱོགས་བོད་མིའི་གཞིས་ཆགས་ཁག་གི་ས་གནས་འགོ་འཛིན་རྣམ་པ་དང་། མཉམ་འབྲེལ་ཚོགས་གཙོ་དང་དྲུང་ཆེ་ཡང་མཉམ་ཞུགས་གནང་ཡོད་པ་བཅས། །
