ཕྱི་ལོ་ ༢༠༡༩ ཟླ་ ༧ ཚེས་ ༡༢ རེས་གཟའ་ཕུར་བུ།

༄༅། །འདི་གར་བདེ་སྲུང་ལས་ཁུངས་ནས་བཏང་གནས་ནང་འཁོད་དོན།  བོད་མིའི་སྒྲིག་འཛུགས་ཀྱི་བདེ་སྲུང་བཀའ་བློན་བླ་བྲང་འཕགས་པ་ཚེ་རིང་མཆོག་འདི་ཟླའི་ཚེས་ ༡༠ ཉིན་གྱི་སྔ་དྲོ་ཆུ་ཚོད་ ༨།༣༠ ཙམ་ལ་རྡོར་གླིང་ས་གནས་འགོ་འཛིན་མིག་དམར་རྡོ་རྗེ་ལགས་དང་ལྷན་བསུ་ན་མདའ་ཕེབས་ཐོན་གྱིས་བཀའ་བརྒྱུད་བསམ་གྲུབ་དར་རྒྱས་གླིང་དགོན་པར་གནས་གཟིགས་གནང་།

དེ་ནས་བཀྲིས་གླིང་བོད་མིའི་གཞིས་ཆགས་སུ་ཕེབས་འབྱོར་སྐབས་གཉམ་འབྲེལ་ཚོགས་གཙོ་དང་དྲུང་ཆེ་། སློབ་གྲྭའི་སློབ་སྤྱི།  ཕ་མའི་ལྷན་ཚོགས་། གཞིས་ཆགས་ཀྱི་ལས་བྱེད་། མི་མང་བཅས་ནས་ཕེབས་བསུའི་སྣེ་ལེན་ཞུས་རྗེས་གཞིས་ཆགས་ཀྱི་ལས་ཁུངས་དང་། མཉམ་འབྲེལ་། སཾ་བྷོ་ཌ་སློབ་གྲྭ་བཅས་སུ་འཚམས་གཟིགས་གནང་། 

ཉིན་རྒྱབ་ཆུ་ཚོད་ ༢ ཐོག་མཉམ་འབྲེལ་ཚོགས་ཁང་དུ་མི་མང་ལ་བདེ་སྲུང་ལས་ཁུངས་ཀྱི་ལས་དོན་དང་འབྲེལ་༧རྒྱལ་བའི་སྐུ་ཕྱྭའི་སྐོར་དང་། བོད་མིའི་སྒྲིག་འཛུགས་ཀྱི་ལྷན་ཁང་ཁག་གི་ལས་དོན་ངོ་སྤྲོད། ལྷག་པར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དྲིན་དྲན་པའི་ཐོག་ནས་རང་རེའི་ལས་འགན་ཞུ་སྒོ་གང་ལེགས་བསྒྲུབ་དགོས་པའི་འབོད་སྐུལ་གནང་བ་དང་། རིང་མིན་བཞུགས་སྒར་རྡ་རམ་ས་ལར་འཚོགས་རྒྱུའི་དམིགས་བསལ་ཚོགས་ཆེན་གྱི་གལ་གནད་སོགས་ཀྱི་སྐོར་གསུང་བཤད་གནང་།

ཕྱོགས་མཚུངས་ཕྱི་ཚེས་ ༡༡ ཉིན་གྱི་སྔ་དྲོ་ཚོུད་ ༩ ཐོག་རྡོ་གླིང་འཇམ་དབྱངས་བོད་ཀྱི་རིག་གཞུང་གཅེས་འཛིན་ཁང་གི་འགན་འཛིན་ལྷན་ཚོགས་ཀྱི་ཚོགས་མི་རྣམས་ནས་སྣེ་ལེན་ཞུས་ཏེ་འགྲེམས་སྟོན་ཁང་དང་། འཛིན་ཁང་། དཔེ་མཛོད་ཁང་བཅས་སུ་གཟིགས་ཞིབ་གནང་རྗེས་འགན་ལྷན་ཚོགས་ཀྱི་ཚོགས་གཞོན་གྱིས་རིག་གཞུང་གཅེས་འཛིན་ཁང་གི་དམིགས་ཡུལ་དང་། སྤྱི་ཚོགས་ཞབས་ཞུ་སོགས་སྤྱི་ཡོངས་ཀྱི་གནས་སྟངས་ངོ་སྤྲོད་ཞུས་པར་བཀའ་བློན་མཆོག་གིས་བསྔགས་བརྗོད་གནང་།

དེ་ནས་ས་གནས་འགོ་འཛིན་ལས་ཁུངས་དང་། རང་མཚོ་བཟོ་གྲྭའི་ཡན་ལག་སྨན་ཁང་དང་དཔར་ཁང་ལ་གཟིགས་སྐོར་གནང་གྲུབ་མཚམས་རྡོ་གླིང་ཉེ་འཁོར་རང་འཚོ་བཟོ་གྲྭར་ཕེབས་འབྱོར་སྐབས་འགན་འཛིན་གྱིས་ཕེབས་བསུའི་སྣེ་ལེན་ཞུས་ཏེ་ལས་ཁུངས་དང་། འགྲེམས་སྟོན་ཁང་། རུམ་ཐག་བཟོ་གྲྭ་བཅས་ལ་འཚམས་གཟིགས་གནང་རྗེས་ཉིན་རྒྱབ་ཚོུད་ ༡།༣༠ ཙམ་ལ་རྡོར་གླིང་ནས་སྒང་ཏོག་ས་གནས་སུ་ཕེབས་ཐོན་གནང་ཡོད་པ་བཅས། །