ཕྱི་ལོ་ ༢༠༡༩ ཟླ་ ༧ ཚེས་ ༡༥ རེས་གཟའ་ཟླ་བ།

༄༅། །འདི་གར་བོད་མིའི་སྒྲིག་འཛུགས་བདེ་སྲུང་ལས་ཁུངས་ནས་བཏང་གནས་ནང་འཁོད་དོན། བོད་མིའི་སྒྲིག་འཛུགས་ཀྱི་བདེ་སྲུང་བཀའ་བློན་བླ་བྲང་འཕགས་པ་ཚེ་རིང་མཆོག་རྒྱ་གར་བྱང་ཤར་ཁུལ་དུ་གཞུང་འབྲེལ་ཕྱོགས་ཕེབས་གནང་བཞིན་པ་ལྟར། འདི་ཟླའི་ཚེས་ ༡༡ ཉིན་གྱི་དགོང་དྲོ་ཆུ་ཚོད་ ༦།༣༠ ཙམ་ལ་འབྲས་ལྗོངས་སྒང་ཏོག་བོད་ཀྱི་གསོལ་མགྲོན་ཁང་དུ་ཕེབས་འབྱོར་སྐབས་ས་གནས་འགོ་འཛིན་དང་ས་འཐུས་ཚོགས་གཙོ་གཙོས་ཚོགས་པ་དྲུག་གི་མཐུས་མི་བཅས་ནས་ཕེབས་བསུའི་སྣེ་ལེན་གཟབ་རྒྱས་ཞུས།

ཕྱི་ཚེས་ ༡༢ ཉིན་གྱི་སྔ་དྲོ་ཆུ་ཚོད་ ༧།༣༠ ཙམ་ལ་སྒང་ཏོག་ས་གནས་འགོ་འཛིན་མི་འགྱུར་གཡུ་སྒྲོན་ལགས་དང་ལྷན་གཏིང་སྐྱེས་དགོན་བྱང་ཨོ་རྒྱན་མདོ་སྔགས་ཆོས་འཁོར་གླིང་དང་། བཙུན་དགོན་ཨོ་རྒྱན་ཆོས་འཁོར་གླིང་། གྲོ་མོ་བཀའ་དགོན་ཚེ་མཆོག་གླིང་། དཔལ་ས་ངོར་ཆོས་ཚོགས། སེར་བྱེས་འགྲོ་ཕན་གླིང་དགོན་པ་བཅས་སུ་འཚམས་གཟིགས་གནང་སྐབས་དགོན་པ་སོ་སོའི་ལས་སྣེ་རྣམས་ཀྱིས་སྣེ་ལེན་ཟབ་རྒྱས་ཞུས།

དེ་ནས་ཉིན་རྒྱབ་ཆུ་ཚོད་ ༢ པའི་ཐོག་ཆོལ་གསུམ་ཚོགས་ཁང་དུ་ས་གནས་འཐུས་ཚོགས་ཀྱི་ཚོགས་གཙོ་དང་། ས་གནས་འགོ་འཛིན། ཚོགས་པ་དྲུག་གི་ཚོགས་གཙོ། ས་ཁུལ་མི་འཐུས། སྐྱིད་སྡུག་གཉེར་པ། མི་མང་བཅས་ལ་སྤྱི་ནོར་༧གོང་ས་༧སྐྱབས་མགོན་ཆེན་པོའི་སྐུ་ཕྱྭ་དང་། བོད་ནང་གི་ད་ལྟའི་ཛ་དྲག་གནས་སྟངས། བདེ་སྲུང་ལས་ཁུངས་ཀྱི་ལས་དོན་། དེ་བཞིན་བོད་མིའི་སྒྲིག་འཛུགས་བཀའ་ཤག་གི་ལྔ་དང་ལྔ་བཅུའི་འཆར་སྣང་། གཞན་ཡང་ལྷན་ཁང་ཁག་གི་ལས་དོན་སོགས་སྐོར་གསུང་བཤད་གནང་རྗེས་མི་མང་གི་དྲི་བ་ཁག་ལ་བཀའ་ལན་བཅས་གནང་། 

ཕྱོགས་མཚུངས་ཕྱི་ཚེས་ ༡༣ ཉིན་གྱི་སྔ་དྲོ་ཚོུད་ ༩ ཐོག་གུ་རུ་སྐུ་འབུམ་གསང་ཆོས་དགོན་པ་དང་། རུམ་བཏེག་དཔལ་ཀརྨ་པའི་གཙུག་ལག་བཤད་སྒྲུབ་ཆོས་འཁོར་གླིང་དུ་འཚམས་གཟིགས་གནང་། ཉིན་རྒྱབ་བཙུན་དགོན་མཁའ་སྤྱོད་པདྨ་འོད་གླིང་དང་། དཔལ་ཀརྨ་ཟུར་མང་བཤད་སྒྲུབ་ཆོས་འཁོར་གླིང་བཅས་སུ་འཚམས་གཟིགས་གནང་སྟེ་དགོང་དྲོ་ཆུ་ཚོད་  ༤ ཙམ་ལ་སྒང་ཏོག་ཕེབས་འབྱོར་གནང་། 

དེ་རྗེས་དགོང་དྲོ་ཆུ་ཚོད་  ༦ པའི་ཐོག་ཚོགས་པ་དྲུག་ནས་སྒང་ཏོག་བོད་ཀྱི་མགྲོན་ཁང་དུ་དགོང་ཚིགས་འདེགས་འབུལ་གནང་ཏེ་འཚམས་གཟིགས་ལེགས་གྲུབ་ཀྱིས་ཕྱི་ཚེས་ ༡༤ ཉིན་གྱི་སྔ་དྲོ་ཚོུད་ ༧ པར་སྒང་ཏོག་ནས་ར་སྦང་ཀུན་ཕན་གླིང་བོད་མིའི་གཞིས་ཆགས་སུ་འཚམས་གཟིགས་སླད་ཕེབས་ཐོན་གནང་ཡོད་པ་བཅས། །