ཕྱི་ལོ་ ༢༠༡༩ ཟླ་ ༧ ཚེས་ ༣༠ རེས་གཟའ་མིག་དམར།
༄༅། །ཨེ་ཤི་ཡ་རང་དབང་རླུང་འཕྲིན་ཁང་གིས་གནས་ཚུལ་སྤེལ་བ་ལྟར་ན། རྒྱ་ནག་གཞུང་གིས་དབྱེ་བའི་སི་ཁྲོན་ཞིང་ཆེན་དཀར་མཛེས་ཁུལ་དཔལ་ཡུལ་རྫོང་དུ། འདི་ལོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུའི་འཁྲུངས་སྐར་སྐབས་བསང་གསོལ་གཏོང་མཁན་དང་། རྒྱལ་ཁབ་ཀྱི་ལས་འཆར་རྣམ་གྲངས་ཁོངས་གསར་བཟོ་བྱས་པའི་ཁང་པའི་ནང་དུ་༸གོང་ས་མཆོག་གི་སྐུ་པར་སྒྲིག་བཤམས་བྱས་ཡོད་མཁན་གྱི་ཁྲོ་སྨད་དང་གནའ་ཐ་སྡེ་བའི་མང་ཚོགས་ལ་རྒྱ་ནག་གཞུང་གི་དམག་མིས་རྡུང་རྡེག་དང་འཛིན་བཟུང་བྱས་ཡོད་སྐོར་ཨེ་ཤི་ཡ་རང་དབང་རླུང་འཕྲིན་ཁང་ལ་གནས་ཚུལ་མཁོ་སྤྲོད་གནང་དོན་ལྟར་ན། ད་ཆ་དཔལ་ཡུལ་རྫོང་ཁྲོམ་དགེ་ར་འམ་ཁྲོ་སྨད་དང་། གནའ་ཐ་ཡུལ་ཚོ་གཉིས་ཀྱི་སྡེ་བའི་ནང་དུ་ད་ལོར་མགོན་པ་གང་ཉིད་མཆོག་སྐུའི་འཁྲུངས་སྐར་སྐབས་བསང་གསོལ་བཏང་སོང་ཟེར་ནས་སྡེ་བའི་མི་ཁ་ཤས་འཛིན་བཟུང་བཙན་ཁྲིད་བྱས་ནས་དམ་བསྒྲགས་ཆེན་པོ་བྱས་ཡོད་པ་དང་། ལྷག་པར་དུ་རྒྱ་གཞུང་གིས་རོགས་སྐྱོར་ལས་འཆར་རྣམ་གྲངས་སྤྲད་ནས་གསར་རྒྱག་བྱས་པའི་ཁང་པའི་ནང་དུ་གནས་སྤོར་བྱས་ཡོད་པའི་མང་ཚོགས་ཀྱིས་རང་ཁྱིམ་དུ་༸གོང་ས་མཆོག་གི་སྐུ་པར་སྒྲིག་བཤམས་བྱས་ཡོད་པ་ཡུལ་གྱི་འགོ་ཁྲིད་རྣམས་ལྟ་སྐོར་དུ་ཡོང་ནས་མཐོང་སྟེ། རྒྱལ་ཁབ་ཀྱི་ལས་བྱེད་དང་ལྷན་དུ་སྟོད་གོས་ནག་པོ་གྱོན་ཡོད་མཁན་གྱི་དམག་མི་སླེབས་ནས་སྐུ་པར་ཚང་མ་མར་ལེན་དུ་བཅུག་ནས་གཞུང་བཞེས་བཏང་བ་མ་ཟད། སྐུ་པར་སྒྲིག་བཤམས་བྱེད་མཁན་གྱི་མང་ཚོགས་རྣམས་ལ་འགྲམ་ལྕག་གཞུས་ནས་གཅར་རྡུང་བྱས་ཡོད་འདུག གཞན་ཡང་ཁོང་གིས་རྒྱ་ནག་གཞུང་གིས་འབྲོག་པ་གྲོང་སྡེ་ཅན་དུ་བསྒྱུར་བ་ཞེས་མིང་ཐོག་ནས་འཛུགས་སྐྲུན་བྱས་པའི་ཁང་པའི་ནང་སྡོད་མཁན་གྱི་མང་ཚོགས་ལ་དེ་ལྟར་གཅར་རྡུང་བཏང་ཡོད་པ་རེད་མ་གཏོགས་རྒྱལ་ཁབ་ཀྱི་ལས་བའི་ཁང་བའི་ནང་སྡོད་མེད་མཁན་མང་ཚོགས་ལ་བསྔོག་བཤེར་དང་རྡུང་རྡེག་བཏང་མེད་པ་འདི་ག་རླུང་འཕྲིན་ཁང་འགྲེལ་བརྗོད་གནང་བྱུང་། ཁང་པ་དེ་དག་ལ་རྒྱ་སྒོར་ཁྲི་བརྒྱད་ནས་བཅུ་གཅིག་བར་གྱི་འགྲོ་སོང་བཏང་ནས་ལས་ཡོད་པ་དང་། རྗེས་སུ་མང་ཚོགས་རྣམས་ནང་དུ་གནས་སྤོར་དུ་བཅུག་པ་རེད་འདུག
ད་ལྟའི་ཆར་རྒྱ་ནག་གཞུང་གིས་ནག་འཇོམས་ངལ་སེལ་གྱི་ལས་འགུལ་སྤེལ་ནས་དམ་བསྒྲགས་ཆེན་པོ་བྱེད་བཞིན་ཡོད་པ་བཅས། །
