ཕྱི་ལོ་ ༢༠༡༩ ཟླ་ ༧ ཚེས་ ༨ རེས་གཟའ་ཟླ་བ།
༄༅། །འདི་གར་ཐེ་ཝན་བོད་ཀྱི་སྐུ་ཚབ་དོན་ཁང་ནས་བཏང་གནས་ནང་འཁོད་དོན། བོད་མིའི་བླ་ན་མེད་པའི་དབུ་འཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་གྲངས་ ༨༤ ལ་ཕེབས་པའི་༸སྐུའི་འཁྲུངས་སྐར་དུས་ཆེན་ཐེ་ཝན་རྒྱལ་ས་ཐེ་པེ་གྲོང་ཁྱེར་ནང་སྲུང་བརྩི་གཟབ་རྒྱས་ཞུས་ཡོད།
དེ་ཡང་ཐེ་ཝན་བོད་ཀྱི་སྐུ་ཚབ་དོན་ཁང་གི་གོ་སྒྲིག་འོག་ཕྱི་ཟླ་ ༧ ཚེས་ ༦ སྔ་དྲོ་ཆུ་ཚོད་བཅུ་པའི་ཐོག་ཐེ་པེ་ཅེན་ཐེན་གཞོན་ནུའི་ཚོམས་ཆེན་ཁང་ནང་༸སྐུའི་འཁྲུངས་སྐར་དུས་ཆེན་གྱི་མཛད་སྒོ་དབུ་འཛུགས་བསྐྱངས། ཐོག་མར་༸རྒྱལ་བའི་སྐུ་པར་མཐོང་གྲོལ་རིན་པོ་ཆེ་སྐུ་ཚབ་དོན་གཅོད་དང་། ཐེ་ཝན་གཞུང་གི་དཔོན་རིགས་སོགས་སྐུ་མགྲོན་རྣམས་ཀྱིས་སྤོས་སྣེས་སྔུན་བསུས་ཏེ་བཞུགས་ཁྲི་རིན་པོ་ཆེའི་ཐོག་གདན་ཞུ་དང་དཀར་གཙང་མཇལ་དར་སྒྲོན་འབུལ་ཞུས་རྗེས། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་། དཔལ་ལྡན་སྲིད་སྐྱོང་བློ་བཟང་སེངྒེ་མཆོག་ལ་ཇི་ལྟར་གསོལ་བ་བཏབ་པ་བཞིན་ཆེད་དུ་༸སྐུའི་འཁྲུངས་སྐར་དུས་ཆེན་དང་འབྲེལ་བའི་ཐེ་ཝན་མི་མང་ལ་སྩལ་བའི་བཀའ་སློབ་བརྙན་འཕྲིན་གཟིགས་འབུལ་དང་། དེ་བཞིན་ཐེ་ཝན་དོན་ཁང་བཙུགས་ནས་ལོ་ ༢༠ འཁོར་བའི་འདས་དོན་དང་། བོད་མི་བཙན་བྱོལ་དུ་གྱར་ནས་ལོ་ ༦༠ འཁོར་བའི་བརྙན་ཐུང་ཁག་གཉིས་གཟིགས་འབུལ་ཞུས།
དེ་རྗེས་ཐེ་ཝན་དོན་ཁང་གི་འགན་འཛིན་ལྷན་ཚོགས་ཚོགས་མི་ལྕམ་ཧོང་རུའེ་རའོ་ལགས་དང་། ཐེ་ཝན་རྒྱལ་སྤྱིའི་བོད་བརྒྱུད་ནང་བསྟན་མཐུན་ཚོགས་ཀྱི་ཚོགས་གཙོ་ལྕམ་ཧའེ་མེའི་ཀྲའོ་ལགས། ཐེ་སྡོད་བོད་རིགས་ཚོགས་པའི་ཚོགས་གཙོ་བསྟན་འཛིན་རྣམ་དག་ལགས་བཅས་ཀྱི་གསུང་བཤད་སྒྲུབ་རྗེས། དོན་གཅོད་ཟླ་བ་ཚེ་རིང་ལགས་ཀྱིས་གསུང་བཤད་ཀྱི་མཐའ་མར་ཉེ་སྔོན་༸གོང་ས་མཆོག་ལྡི་ལིར་སྐུའི་འཕྲོད་བཞེས་བརྟག་དཔྱད་དང་ད་ཆ་སྐུ་ཁམས་གསལ་དྭངས་ཡིན་པའི་ངོ་སྤྲོད་གནང་སྐབས། ཚོགས་བཅར་ཡོངས་ནས་ལག་གཉིས་དགའ་སྤྲོའི་ཐལ་མོ་བརྡབ།
ཐེངས་འདིར་གངས་ལྗོངས་དཔེ་སྐྲུན་ཁང་ནས་༸སྐུའི་འཁྲུངས་སྐར་དུས་ཆེན་གྱི་ལེགས་སྐྱེས་ཆེད་༸གོང་ས་མཆོག་གི་མཛད་རྣམ་ཕྱག་དེབ་ཁག་གཉིས་དབུ་འབྱེད་གནང་བ་ནི། བོད་མི་མང་སྤྱི་འཐུས་ཚེ་རིང་ལྷ་མོ་ལགས་ཀྱིས་བོད་ཡིག་ནས་རྒྱ་ཡིག་ཐོག་ཡིག་སྒྱུར་གནང་བ་༸གོང་ས་མཆོག་གི་མཛད་རྣམ་ངོས་ཀྱི་ཡུལ་དང་། ངོས་ཀྱི་མི་མང་ཞེས་པ་ཐེ་ཝན་དགེ་ཆེ་སྐུ་ཞབས་ལིའི་ལགས་ནས་དབུ་འབྱེད་དང་ངོ་སྤྲོད། ཐེ་ཝན་དུས་བབ་ཚགས་ཤོག་གི་གསར་འགོད་པ་དང་པར་པ་གཅིག་ལྕོགས་སྐུ་ཞབས་ཀྲེང་ལགས་ཀྱིས་ལོ་མང་རིང་༸གོང་ས་མཆོག་ཡུལ་གྲུ་གང་སར་ཆིབས་སྒྱུར་སྐབས་སྒྲོན་པའི་སྐུ་པར་ཕྱོགས་སྒྲིག་གི་བརྙན་དེབ་སྤུས་ལེགས་ཤིག་དོན་གཅོད་ཟླ་བ་ཚེ་རིང་ལགས་ཀྱིས་དབུ་འབྱེད་དང་ངོ་སྤྲོད་བཅས་གནང་གྲུབ་མཚམས་ནང་ཆོས་འཛིན་གྲྭའི་སློབ་མ་དང་། ཐེ་ཝན་གཞོན་སྐྱེས་སོགས་ནས་ཞབས་གཞས་འཁྲབ་སྟོན་བཅས་སྔ་དྲོའི་ལས་རིམ་ཁག་གྲུབ་བསྟུན་ཚོགས་བཅར་ཡོངས་ནས་༸རྒྱལ་བའི་བཞུགས་ཁྲི་རིན་པོ་ཆེར་དཀར་གཙང་མཇལ་དར་སྒྲོན་འབུལ་དང་། ཉིན་གུང་དཀར་ཟས་རྒྱས་པ་འདེགས་འབུལ་ཞུས།
ཉིན་རྒྱབ་ཆུ་ཚོད་གཅིག་རིང་༸རྒྱལ་བའི་ཞབས་བརྟན་གསོག་སྒྲུབ་རྗེས་མཛད་སྒོ་དང་སྨོན་ལམ་བཅས་ལེགས་པར་མཇུག་སྒྲིལ། དེ་ཉིན་འདི་ག་དོན་ཁང་ནས་གདན་ཞུ་གནང་བའི་སྐུ་མགྲོན་རྣམ་པ་དང་། དགེ་འདུན་ཞལ་གྲངས་བརྒྱ་སྐོར་ཙམ། བོད་དོན་རྒྱབ་སྐྱོར་གྱི་ལག་དེབ་སྔོན་པོའི་ཚོགས་མི། ཐེ་སྡོད་བོད་མི་སོགས་མི་གྲངས་སུམ་བརྒྱ་ལྷག་གིས་དགའ་དད་སྤྲོ་གསུམ་ངང་༸རྒྱལ་བའི་འཁྲུངས་སྐར་དུས་ཆེན་སྲུང་བརྩི་གཟབ་རྒྱས་ཞུས།
