ཕྱི་ལོ་ ༢༠༡༩ ཟླ་ ༧ ཚེས་ ༨ རེེས་གཟའ་ཟླ་བ།

༄༅། །བོད་མིའི་སྒྲིག་འཛུགས་ཀྱི་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་ཉེ་ཧོང་དུ་གཞུང་འབྲེལ་ཕྱོགས་ཕེབས་གནང་བཞིན་ཡོད་པ་ལྟར། ཕྱི་ལོ་ ༢༠༡༩ ཟླ་ ༧ ཚེས་ ༥ རེས་གཟའ་པ་སངས་ཉིན་ཉི་ཧོང་དུ་རྟེན་གཞི་བྱས་པའི་གྷོ་གྷོ་ཀུ་ཅི་ Gokokuji དགོན་པར་གནས་གཟིགས་དང་འབྲེལ་སྨོན་ལམ་གསུང་འདོན་གནང་འདུག  དེ་ཡང་གྷོ་གྷོ་ཀུ་ཅི་དགོན་པ་ནི་ཕྱི་ལོ་ ༡༦༨༡ ལོར་གསར་འཛུགས་གནང་བ་ཞིག་ཡིན་པ་མ་ཟད།  བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགོན་པ་དེར་ཐེངས་གཉིས་གནས་གཟིགས་མཛད་འདུག   སྐབས་དེར་བཀའ་བློན་མཆོག་གིས་གྷོ་གྷོ་ཀུ་ཅི་དགོན་པའི་མཁན་པོ་དང་ཐུག་འཕྲད་ཀྱིས་དགོན་པ་དེས། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་དད་གུས་གཡོ་མེད་ཐོག་བོད་ཀྱི་ཐུན་མིན་ཆོས་དང་རིག་གཞུང་ལ་རྒྱབ་སྐྱོར་ཤུགས་ཆེ་གནང་དང་གནང་མུས་ལ་ཡི་རངས་བསྔགས་བརྗོད་དང་སྦྲགས། ཐུགས་རྗེ་ཆེ་ཞུས་འདུག

གཞན་ཡང་བཀའ་བློན་མཆོག་གིས་ད་ལྟའི་བོད་ནང་རྒྱ་ནག་གཞུང་གིས་བོད་ཀྱི་ཐུན་མིན་སྐད་ཡིག་དང་རིག་གནས། ནང་ཆོས་བཅས་ཉམས་རྒུད་དུ་གཏོང་བཞིན་པའི་ཛ་དྲག་གནས་སྟངས་སྐོར་ངོ་སྤྲོད་དང་། ད་ལྟའི་བོད་ནང་གི་གནས་སྟངས་ནི་དེ་སྔ་མའོ་ཙེ་ཏུང་ཡོད་པའི་སྐབས་ཀྱི་གནས་སྟངས་ལས་སྡུག་པ་ཡོད་སྐོར། རྒྱ་ནག་གཞུང་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་ནང་པའི་བླ་སྤྲུལ་རྣམ་པའི་སྐུ་པར་སྒྲིག་བཤོམ་དང་མི་ཆོག་པ་དང་།  ཕྱག་མཆོད་འབུལ་རིགས་རྩ་བ་ནས་བྱེད་མི་ཆོག་པ་མ་ཟད། དེ་ལས་ལྡོག་སྟེ་རྒྱ་ནག་དམར་ཤོག་ཚོགས་པའི་འགོ་ཁྲིད་ཚོའི་འདྲ་པར་མཆོད་གཤོམ་སྟེང་བསྒྲིགས་ནས་དེར་བོད་མི་ནང་པ་ཚོས་ཕྱག་མཆོད་འབུལ་བྱེད་དགོས་པའི་བཙན་བཀའ་བཏང་དང་གཏོང་བཞིན་ཡོད་སྐོར་གསུངས།  དེ་བཞིན་རྒྱ་ནག་གཞུང་གི་བོད་ཐོག་ལག་བསྟར་བྱེད་བཞིན་པའི་དམ་བསྒྲགས་ཅན་གྱི་སྲིད་བྱུས་དེས་རྒྱལ་སྤྱིའི་ཁྱོན་དུ་རྒྱ་ནག་ཡུལ་གྱི་ཆེ་མཐོང་ལ་དོ་ཕོག་དང་གནོད་སྐྱོན་ཚབས་ཆེ་བཟོ་རྒྱུ་དང་།  བོད་མིའི་འཐབ་རྩོད་ནི་དྲང་བདེན་དང་ཞི་བའི་ལམ་ནས་ཡིན་སྐོར་སོགས་གསུང་པར་མཁན་པོས་ད་ལྟའི་བོད་ནང་གི་ཛ་དྲག་གནས་སྟངས་ཐོག་སེམས་འཚབ་ཤུགས་ཆེ་གནང་བ་དང་སྦྲགས་བཟང་ཕྱོགས་ཀྱི་འགྱུར་བ་ཏན་ཏན་ཡོང་སྐོར་གསུངས།

དེ་རྗེས་བཀའ་བློན་མཆོག་ཉི་ཧོང་གྲོས་ཚོགས་སུ་ཆེད་ཕེབས་ཀྱིས་ཉི་ཧོང་གི་དེ་སྔའི་ཤེས་རིག་བློན་ཆེན་དང་། ཉི་ཧོང་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་ཤི་མོ་མུ་ར་ Shimomura Hakubun མཆོག་དང་ཐུག་འཕྲད་གནང་ཡོད། སྐབས་དེར་གྲོས་ཚོགས་འཐུས་མི་ཁོང་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནི་འཛམ་གླིང་ནང་གུས་བཀུར་ཧ་ཅང་ཞུ་ཡུལ་གྱི་འཚེ་མེད་ཞི་བའི་འཐབ་ལམ་གྱི་མཚོན་རྟགས་ཤིག་ཡིན་པ་དང་།  མགོན་པོ་མཆོག་༸སྐུ་ཚེ་ཡུན་དུ་གནས་པ་དང་། འཛམ་གླིང་ཁྱོན་དུ་མུ་མཐུད་བྱམས་བརྩེ་གོང་སྤེལ་གྱི་མཛད་འཕྲིན་བསྐྱང་ཐུབ་པའི་སྨོན་ལམ་ཡོད་སྐོར་གསུངས། དེ་བཞིན་ཁོང་གིས་ཉི་ཧོང་གཞུང་གིས་བོད་མིའི་བདེ་དོན་ཆེད་ཁ་ཞེ་གཉིས་མེད་ཀྱི་རྒྱབ་སྐྱོར་གནང་དང་གནང་མུས་སྐོར་གསུངས།

སྐབས་དེར་ཆོས་རིག་བཀའ་བློན་མཆོག་གིས་ཤི་མོ་མུ་ར་མཆོག་ལ། ད་ལྟ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་༸སྐུའི་འཕྲོས་བཞེས་ཧ་ཅང་ཡག་པོ་ཡོད་པ་དང་།  བཀའ་བློན་མཆོག་ནས་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༡༡༠ བར་༸སྐུ་འཚོ་བཞུགས་མཛད་རྒྱུར་ཡིད་ཆེས་ཞུ་བཞིན་ཡོད་སྐོར་གསུངས་པ་དང་སྦྲགས། དཀའ་ངལ་ཆེ་བའི་དུས་སྐབས་འདིར་བོད་མི་ཚོས་མཉམ་རུབ་ཀྱི་ནུས་པ་སྤུངས་དགོས་གལ་གསུངས། 

 མཐར་བཀའ་བློན་མཆོག་ཉི་ཧོང་འཕྲུལ་རིག་བསྟི་གནས་ཁང་གྲགས་ཅན་ Chiba Institute of Technology དང་གྲོང་ཁྱེར་ཀ་ཞི་ཝའི་ Kashiwa ནང་རྟེན་གཞི་བྱས་པའི་རེ་ཏ་ཀུ་མཐོ་སློབ་ཁང་ Reitaku University དུ་འཚམས་གཟིགས་ཀྱིས་གསུང་དོན།  “ཉི་བོད་གཉིས་དབར་རིག་གཞུང་དང་སྐད་ཡིག ནང་ཆོས་ཐད་གོ་བསྡུར་སྦྱང་བཤད་ཀྱི་ལས་རིམ་དེ་གལ་ཆེན་པོ་རེད།  ཉི་ཧོང་གཞུང་མང་གཉིས་ནས་བོད་མི་སློབ་ཕྲུག་རྣམས་ཀྱི་ཤེས་ཡོན་ཐད་རྒྱབ་སྐྱོར་ཤུགས་ཆེར་གནང་བར་ཐུགས་རྗེ་ཆེ་ཞུ་རྒྱུ་ཡིན།” སྐབས་དེར་ཉི་ཧོང་སྐུ་ཚབ་དོན་གཅོད་དང་ལས་བྱེད་བཅར་ཡོད་པ་བཅས། །