ཕྱི་ལོ་ ༢༠༡༩ ཟླ་ ༧ ཚེས་ ༨ རེས་གཟའ་ཟླ་བ།
༄༅། །ཕྱི་ལོ་ ༢༠༡༩ ཟླ་ ༦ ཚེས་ ༢ ནས་ ༦ བར་ཉིན་གྲངས་ལྔའི་རིང་རྡ་ས་གངས་སྐྱིད་སིལ་སྤོལ་རྩེད་ཐང་དུ་བོད་མིའི་སྒྲིག་འཛུགས་ཀྱི་འཕྲོད་བསྟེན་ལས་ཁུངས་དང་། བོད་རྒྱལ་ཡོངས་རྩེད་རིགས་ཚོགས་ཆུང་ཐུན་མོང་གི་གོ་སྒྲིག་དང་། ༸གོང་ས་མཆོག་གི་ཡིད་ཆེས་དགེ་རྩ་ཚོགས་པའི་མཐུན་འགྱུར་འོག གློ་ནད་ཊི་སྦིའི་ཁ་གཏད་དུ་བུད་མེད་རྒྱལ་ཡོངས་སིལ་སྤོལ་རྩེད་འགྲན་ཐེངས་དང་པོ་དེ་བཞིན་མཇུག་སྒྲིལ་ཡོད།
དེ་ཡང་ཕྱི་ཚེས་ ༦ ཉིན་གྱི་ཕྱི་དྲོ་ཆུ་ཚོད་ ༣།༣༠ ཙམ་ལ་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་དཔལ་འབྱོར་བཀའ་བློན་ཀརྨ་ཡེ་ཤེས་མཆོག་དང་། བོད་མི་མང་སྤྱི་འཐུས་ཁག་གཅིག འཕྲོད་བསྟེན་དྲུང་ཆེ་དཔལ་ལྡན་དོན་གྲུབ་ལགས། སྲི་ཞུའི་ལས་བྱེད། གཟིགས་མོ་བ་བཅས་གངས་སྐྱིད་སིལ་སྤོལ་རྩེད་ཐང་དུ་འདུ་འཛོམས་ཀྱི་ཐོག་མར་འཕྲོད་བསྟེན་དྲུང་ཆེ་དཔལ་ལྡན་དོན་གྲུབ་ལགས་ཀྱིས་ངོ་སྤྲོད་གསུང་བཤད་གནང་གྲུབ་མཚམས་སྐུ་མགྲོན་གཙོ་བོ་དཔལ་འབྱོར་བཀའ་བློན་ཀརྨ་ཡེ་ཤེས་མཆོག་གིས་རྩེད་རིགས་ཀྱི་འཕྲོད་བསྟེན་ལ་ཕན་ཐོགས་ཧ་ཅང་ཡོད་པ་མ་ཟད། རྩེད་མོ་བ་ཕན་ཚུན་ངོ་ཤེས་དང་འབྲེལ་འདྲིས་ལའང་ཕན་ཐོགས་ཡོད་པར་བརྟེན། རྩེད་འགྲན་ནང་མཉམ་ཞུགས་ངེས་པར་དུ་དགོས་གལ་སྐོར་དང་། འཕྲོད་བསྟེན་སླད་རྩེད་འགྲན་ཙམ་གྱི་མི་ཕན་པར་རྒྱུན་ལྡན་ཟས་སྤྱོད་ལ་གཟབ་དགོས་སྐོར་སོགས་ཀྱི་གསུང་བཤད་གནང་གྲུབ་མཚམས་བལ་ཡུལ་དང་ལྡེ་ར་ལྡུན་དོན་གྲུབ་གླིང་རུ་ཁག་དབར་རྩེད་འགྲན་གནང་སྟེ་བལ་ཡུལ་རུ་ཁག་ལ་ཨང་ ༢༥ དང་ལྡེ་ར་ལྡུན་དོན་གྲུབ་གླིང་རུ་ཁག་ལ་ཨང་ ༣༠ ཐོབ་སྟེ་དོན་གྲུབ་གླིང་རུ་ཁག་གིས་རྒྱལ་ཁ་བླངས་ཡོད་པ་དང་། སུ་ཇཱ་སློབ་གྲྭའི་རུ་ཁག་ལ་རྩེད་མོ་དྲང་བདེན་རྩེད་མཁན་གྱི་གཟེངས་རྟགས་ཐོབ་ཡོད་པ་བཅས། །
