༢༠༡༩ ཟླ་ ༧ ཚེས་ ༣༡ རེས་གཟའ་ལྷག་པ།

༄༅། །བོད་མིའི་སྒྲིག་འཛུགས་དཔལ་འབྱོར་ལས་ཁུངས་ཀྱི་སྤྱི་ཁྱབ་འཆར་འགོད་པ་འབུམ་རམས་པ་དཀོན་མཆོག་བརྩོན་འགྲུས་ལགས་དང་། དཔལ་འབྱོར་ལས་ཁུངས་ཀྱི་སྤྱི་ཚོགས་ཡར་རྒྱས་ཐེབས་རྩའི་འགན་འཛིན་དབུ་དཀར་ཚང་སྐལ་རྡོར་ལགས་བདུན་ཕྲག་ལྔའི་རིང་ཨ་རི་དང་ཁེ་ན་ཌ་ཁུལ་གྱི་གཞུང་འབྲེལ་ཕྱོགས་ཕེབས་ལེགས་གྲུབ་བྱུང་འདུག 

དེ་ཡང་འགན་འཛིན་རྣམ་གཉིས་ཕྱི་ལོ་ ༢༠༡༩ ཟླ་ ༦ ཚེས་ ༢༢ ནས་ཕྱི་ཟླ་ ༧ ཚེས་ ༢༩ བར་ཨ་རི་རྒྱལ་ས་ཝ་ཤིང་ཊོན་དང་། ཌི་སི། ཝན་ཁུ་ཝར། སེ་ཡ་ཊལ། པོཌ་ལེན། སན་ཕ་རན་སི་སི་ཁོ་བྷེ་ས་ཁུལ། ལྷོ་ཁལ་ལི་ཕོར་ནི་ཡ། མིན་ཡ་ན་པོ་ལི་སི། ཊོ་རོན་ཊོ། ནིའུ་ཡོག་བཅས་སུ་གཞུང་འབྲེལ་ཕྱོགས་ཕེབས་གནང་དགོས་དོན་ནི། བོད་མིའི་སྒྲིག་འཛུགས་ཀྱི་ལྔ་དང་ལྔ་བཅུའི་འཆར་སྣང་དགོངས་དོན།  བཙན་བྱོལ་བོད་མིའི་སྤྱི་ཚོགས་སྲ་བརྟན་དང་འབྲེལ་བའི་ལས་གཞི་ཆེ་ཁག་གཉིས་ཏེ་གངས་ལྗོངས་དཔལ་འབྱོར་ཞབས་ཞུ་ཁང་དང་། བོད་མིའི་ཁྱད་ལས་དང་བླངས་ཞབས་ཞུ་ཚན་པའི་སྐོར་མང་ཚོགས་ལ་གོ་རྟོགས་སྤེལ་བ་བརྒྱུད། ལས་གཞི་དེ་དག་ནང་མཉམ་ཞུགས་གང་མང་ཡོང་ཐབས་སླད་ཡིན་འདུག 

གངས་ལྗོངས་དཔལ་འབྱོར་ཞབས་ཞུ་ཁང་ནས་སྔོན་འགྲོའི་མ་འཛུགས་ཧིན་སྒོར་བྱེ་བ་བརྒྱ་ཐམ་པ་ནས་རྒྱ་ཆ་བཞི་བཅུ་ཞེ་དགུ་ཙམ་མི་མང་ལ་མ་འཛུགས་བྱ་རྒྱུའི་གོ་སྐབས་འབུལ་རྒྱུ་དང་། མ་འཛུགས་གོ་སྐབས་དེ་ཁག་གཉིས་སུ་དབྱེ་ཡོད་པའི་ཁོངས་ནས་དང་པོ་དེར་ཉུང་ཐར་ཨ་སྒོར་ ༡༥༠༠༠ ཐམ་པ་སྐྱེད་འབབ་ངེས་མེད་ཀྱི་ཐོབ་བྱ་མ་ཤེར་ Equity Share དང་།  གཉིས་པ་ཉུང་ཐར་ཨ་སྒོར་ ༢༥༠༠༠ དེ་དུས་ཐུང་འདེམས་ཆའི་མ་ཤེར་ Short – Term Preference Share ལོ་ལྔའི་ནང་ལོ་ལྟར་མ་རྩའི་འབབ་སྐལ་རྒྱ་ཆ་ ༣ འབུལ་རྒྱུ་ཡིན། 

གཞུང་འབྲེལ་ཕྱོགས་ཕེབས་ཉིན་མཐའ་མར་མ་འཛུགས་བྱེད་མཁན་གྲངས་ ༥༥ ནས་ཨ་སྒོར་ས་ཡ་གཅིག་མ་འཛུགས་བྱེད་ཡོད་པ་མ་ཟད། མི་མང་པོ་ཞིག་ནས་ཀྱང་མ་འཛུགས་བྱེད་རྒྱུའི་འདོད་མོས་ཀྱང་གནང་ཡོད། བྱང་ཨ་རིའི་ཁུལ་ནས་ཨ་སྒོར་ས་ཡ་གཅིག་དང་ཁྲི་ལྔ་ཐམ་པ་མ་འཛུགས་བྱེད་རྒྱུའི་རེ་བ་ཡོད། མ་འཛུགས་གནང་མཁན་ཕལ་ཆེ་བ་བོད་མིའི་སྒྲིག་འཛུགས་དང་བོད་མིའི་ཚོགས་སྡེ་ཁག་ལ་རྒྱབ་སྐྱོར་གནང་རྒྱུའི་ཀུན་སློང་ལས་དཔལ་འབྱོར་གྱི་ཁེ་ཕན་སླད་མིན། སྐབས་དེར་བོད་མིའི་སྤྱི་ཚོགས་ཡར་རྒྱས་ཐེབས་རྩ་བརྒྱུད་ཞལ་འདེབས་ཕུལ་མཁན་ཡང་བྱུང་ཡོད། 

གངས་ལྗོངས་དཔལ་འབྱོར་ཞབས་ཞུ་ཁང་གི་དགོས་དམིགས་གཙོ་བོ་ནི། བོད་མི་ཡར་ཐོན་ཚོང་ལས་ཆེ་ཆུང་རྣམས་ལ་དཔལ་འབྱོར་ཞབས་ཞུའི་མཐུན་རྐྱེན་བསྐྲུན་རྒྱུ་དང་།  གངས་ལྗོངས་དཔལ་འབྱོར་ཞབས་ཞུ་ཁང་ནི་དངུལ་ཁང་མིན་པའི་དཔལ་འབྱོར་སྡེ་ཚན་ཞིག་ཡིན་ཞིང་། ཕྱི་ལོ་ ༢༠༡༧ ནས་བཟུང་ད་བར་ཁྱོན་བསྡོམས་ཨ་སྒོར་ས་ཡ་ ༤་༣ ཐམ་པ་འཚོ་རྟེན་རོགས་སྐྱོར་གནང་བ་བྱུང་ཡོད། 

གངས་ལྗོངས་དཔལ་འབྱོར་ཞབས་ཞུ་ཁང་གི་མ་འོངས་དམིགས་ཡུལ་གཙོ་བོ་ནི་དངུལ་ཁང་ཆུང་གྲས་དེབ་སྐྱེལ་བྱེད་རྒྱུ་དེ་ཡིན་པ་དང་། དེ་བཞིན་དངུལ་ཁང་གཞན་ནང་བཞིན་ལས་དོན་བྱེད་རྒྱུ་དེ་ཡིན།

དེ་ཡང་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་བྱང་ཨ་རི་ཁུལ་གྱི་བོད་མི་ཚོས་གངས་ལྗོངས་དཔལ་འབྱོར་ཞབས་ཞུ་ཁང་ལ་མཐུན་འགྱུར་རོགས་སྐྱོར་གནང་བར་ཧ་ཅང་དགའ་པོ་བྱུང་ཞེས་དང་། གངས་ལྗོངས་དཔལ་འབྱོར་ཞབས་ཞུ་ཁང་གསར་འཛུགས་གནང་དགོས་པའི་དམིགས་ཡུལ་ལྟར། འབྱུང་འགྱུར་བོད་མི་རྣམས་རང་ཁ་རང་གསོ་ཡོང་སླད་ལས་གཞི་འདིའི་ནང་མཉམ་ཞུགས་གང་མང་ཡོང་བའི་རེ་བ་ཡོད་སྐོར་གསུངས། 

ཐེངས་འདིའི་གཞུང་འབྲེལ་ཕྱོགས་ཕེབས་སྐབས་བོད་མིའི་ཁྱད་ལས་དང་བླངས་ཞབས་ཞུ་ཚན་པའི་སྐོར་མང་ཚོགས་ལ་གོ་རྟོགས་དང་། མཉམ་ཞུགས་ཡོང་ཐབས་སླད་གོ་རྟོགས་རྒྱ་ཆེ་སྤེལ་ཐུབ་པའང་བྱུང་ཡོད་པ་མ་ཟད། ལས་གཞི་འདི་བཞིན་ཕྱི་ལོ་ ༢༠༡༢ ལོར་གསར་འཛུགས་གནང་བ་ནས་བཟུང་ལོ་རེ་བཞིན་བོད་མིའི་སྒྲིག་འཛུགས་ཀྱི་ལས་ཁུངས་ཁག་ལ་དང་བླངས་ཞབས་ཞུ་གནང་མཁན་གཞོན་སྐྱེས་བོད་མི་ཁྱད་ལས་པ་འཛུལ་ཞུགས་ཇེ་མང་དུ་འགྲོ་བཞིན་པ་དང་། འདས་པའི་ལོ་གསུམ་ནང་དང་བླངས་ཞབས་ཞུ་གནང་མཁན་མི་གྲངས་བརྒྱ་སྐོར་ཞིག་ཡོང་གི་ཡོད་པ་རེད། དེ་བཞིན་གཞུང་འབྲེལ་ཕྱོགས་ཕེབས་སྐབས་ཨ་རིའི་རོགས་ཚོགས་དང་། ཨ་རིའི་གཞུང་གི་གནད་ཡོད་མི་སྣ་སོགས་དང་ཐུག་འཕྲད་ཡང་གནང་ཡོད་པ་བཅས། །