ཕྱི་ལོ་ ༢༠༡༩ ཟླ་ ༧ ཚེས་ ༢ རེས་གཟའ་མིག་དམར། 

༄༅། །ཕྱི་ལོ་ ༢༠༡༩ ཟླ་ ༦ ཚེས་ ༢ ནས་ ༦ བར་ཉིན་གྲངས་ལྔའི་རིང་རྡ་ས་གངས་སྐྱིད་སིལ་སྤོལ་རྩེད་ཐང་དུ་བོད་མིའི་སྒྲིག་འཛུགས་ཀྱི་འཕྲོད་བསྟེན་ལས་ཁུངས་དང་། བོད་རྒྱལ་ཡོངས་རྩེད་རིགས་ཚོགས་ཆུང་ཐུན་མོང་གི་གོ་སྒྲིག་དང་། ༸གོང་ས་མཆོག་གི་ཡིད་ཆེས་དགེ་རྩའི་ཚོགས་པའི་མཐུན་འགྱུར་འོག གློ་ནད་ཊི་སྦིའི་ཁ་གཏད་དུ་བུད་མེད་རྒྱལ་ཡོངས་སིལ་སྤོལ་རྩེད་འགྲན་ཐེངས་དང་པོ་དབུ་འཛུགས་གནང་སོང་། 

དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩།༣༠ ཐོག་གློ་ནད་ཊི་སྦི་ཡི་ཁ་གཏད་དུ་བུད་མེད་རྒྱལ་ཡོངས་སིལ་སྤོལ་རྩེད་འགྲན་ཐེངས་དང་པོའི་དབུ་འབྱེད་མཛད་སྒོར་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་འཕྲོད་བསྟེན་དྲུང་ཆེ་དཔལ་ལྡན་དོན་གྲུབ་ལགས་ཀྱིས་གསུང་བཤད་གནང་དོན། དེ་རིང་བུད་མེད་སིལ་སྤོལ་འགྲན་སྡུར་དེ་བཞིན་ཐེངས་དང་པོ་ཆགས་ཀྱི་ཡོད། ལས་གཞི་འདིའི་དམིགས་ཡུལ་གཙོ་བོ་ནི། བོད་པའི་སྤྱི་ཚོགས་ནང་ད་ལྟའང་ཊི་སྦིའི་ནད་གཞི་ཁྱབ་བརྡལ་འགྲོ་བཞིན་ཡོད་པར་བརྟེན་ད་རེས་ཀྱི་ལས་གཞི་འདི་བརྒྱུད་ཊི་སྦི་ནད་གཞིའི་སྐོར་མང་ཚོགས་ལ་གོ་རྟོག་སྤེལ་རྒྱུ་ཙམ་མ་ཟད། བུད་མེད་ན་གཞོན་ནང་རྩེད་རིགས་ལ་དོ་དབྱིངས་སླེབ་རྒྱུ་དང་། རྒྱུན་གཏན་འཚོ་བའི་ཁྲོད་སོ་སོ་རང་ཉིད་ཀྱི་འཕྲོད་བསྟེན་ལ་དོ་སྣང་དང་མ་འོངས་པར་ང་ཚོའི་སྤྱི་ཚོགས་ཀྱི་འཕྲོད་བསྟེན་སྤྱི་ཡོངས་ནས་ཡར་རྒྱས་གཏོང་ཐབས་དང་། བུད་མེད་ནུས་སྟོབས་གོང་སྤེལ་སླད་ཡིན། 

སྤྱིར་འཛམ་གླིང་གི་རྒྱལ་ཁབ་ཕན་ཚུན་བར་རྩེད་མོ་རིགས་འགྲན་བསྡུར་བྱེད་དགོས་དོན་ནི། རྒྱལ་ཁབ་ཕན་ཚུན་དབར་ཆབ་སྲིད་དང་དཔལ་འབྱོར་སོགས་ཀྱི་འབྲེལ་ལམ་བཟང་པོ་ཡོང་ཆེད་ཡིན། འོན་ཀྱང་ང་ཚོས་རྩེད་མོ་འགྲན་བསྡུར་བྱེད་པ་དེ་སྤྱི་ཚོགས་ཀྱི་འཕྲོད་བསྟེན་ཡག་པོ་ཡོང་སླད་ཡིན། ཞེས་དང་།  

གཞན་ཡང་ནད་གཞི་མང་པོ་ཞིག་རྩེད་མོ་རྩེད་ནས་འགོག་ཐབས་བྱེད་བཞིན་ཡོད་སྐོར་དང་། རྩེད་མོ་རྩེད་བ་ལ་བརྟེན་ནས་ལུས་སེམས་གཉིས་ཀྱི་འཕྲོད་བསྟེན་བདེ་ཐང་ཡོང་ཐུབ་ཀྱི་ཡོད།  

སྤྱིར་རྩེད་འགྲན་སྐབས་རྒྱལ་ཕམ་དེ་གཙོ་བོ་མིན། གཙོ་བོ་ནི་སྤྲོ་སེམས་ལྡན་པའི་ཐོག་ནས་རྩེད་དགོས། ཞེས་སོགས་ཀྱི་གསུང་བཤད་གནང་རྗེས་སྦེལ་ཀོབ་བུད་མེད་རྩེད་འགྲན་རུ་ཁག་དང་ལྡེ་ར་ལྡུན་དོན་གྲུབ་གླིང་རུ་ཁག་གཉིས་དབར་རྩེད་འགྲན་དབུ་འཛུགས་གནང་སོང་། 

ཐེངས་འདིའི་རྩེད་འགྲན་ནང་བལ་ཡུལ་དང་། སྦེལ་ཀོབ། དོན་གྲུབ་གླིང་། དབུས་བོད་ཀྱི་སྨན་རྩིས་མཐོ་སློབ། སུ་ཇ་བོད་ཁྱིམ། རྡ་ས། རྡ་སྟེང་བོད་ཁྱིམ་བཅས་ཁྱོན་བུད་མེད་རུ་ཁག་བདུན་མཉམ་ཞུགས་གནང་ཡོད་པ་བཅས། །