ཕྱི་ལོ་ ༢༠༡༩ ཟླ་ ༦ ཚེས་ ༢༨ རེས་གཟའ་པ་སངས།
༄༅། །ཕྱི་ལོ་ ༢༠༡༩ ཟླ་ ༦ ཚེས་ ༢༦ ཉིན་ཨིན་ཡུལ་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ལྷན་ཚོགས་ཐོག་གྲོས་ཚོགས་འོག་མའི་ཚོགས་གཙོ་མཆོག་ཕེབས་འདུག གོང་ཚེས་ཉིན་གྱི་ཕྱེད་ཡོལ་ཙམ་ལ་ལྷན་ཚོགས་སྐབས་སྐུ་ཞབས་ཇོན་བྷེར་ཀའོ་ Hon Speaker John Bercow མཆོག་ཕེབས་པ་མ་ཟད། སི་ཀོཌ་ལེནྜ་རྒྱལ་ཡོངས་ཆབ་སྲིད་ཚོགས་པའི་ Scottish National Party གྲོས་ཚོགས་འཐུས་མི་སྐུ་ཞབས་ཀི་རི་སི་ལོ་ Chris Law མཆོག་དང་། ངལ་རྩོལ་ཚོགས་པའི་གྲོས་ཚོགས་འཐུས་མི་སྐུ་ཞབས་ཀེ་རི་ Kerry McCarthy མཆོག་དང་མེ་རི་རིམ་མར་ Mary Rimmer མཆོག དེ་བཞིན་ཨིན་ཡུལ་ས་གནས་ལི་ཝར་པུལ་ Liverpool ཞེས་པ་ནས་གྲོས་ཚོགས་འཐུས་མི་སྐུ་ཞབས་ཌེ་ཝིཌ་ཨལ་ཊོན་ David Alton མཆོག་བཅས་ཕེབས་འདུག
ཕྱོགས་མཚུངས་གཞུང་འབྲེལ་གནད་ཡོད་མི་སྣ་དང་བོད་དོན་རྒྱབ་སྐྱོར་བ། གཞོན་སྐྱེས་དྭང་བླངས་པ། ཉམས་ཞིབ་པ། གྲོས་ཚོགས་ཀྱི་ལས་བྱེད། བོད་རིགས་སློབ་མ་ཁག་གཅིག མང་ཚོགས་བཅས་ཀྱང་ཚོགས་འདུར་ཕེབས་འདུག ཚོགས་འདུ་གཙོ་སྐྱོང་གནང་མཁན་སྐུ་ཞབས་ཊིམ་ལུབ་ཊོན་ Tim Loughton མཆོག་ཡིན་ཞིང་། ཐོག་མར་གཙོ་སྐྱོང་བ་སྐུ་ཞབས་ཊིམ་ལུབ་ཊོན་མཆོག་གིས་ཕེབས་བསུའི་གསུང་བཤད་གནང་བསྟུན། ཨིན་ཡུལ་གྲོས་ཚོགས་འོག་མའི་ཚོགས་གཙོ་སྐུ་ཞབས་ཇོན་བྷེར་ཀའོ་ Hon Speaker John Bercow མཆོག་ལ་གསུང་བཤད་གནང་རོགས་ཞུས་པར་ཁོང་གིས། བོད་མི་ཚོས་དཀའ་སྡུག་མྱངས་དང་མྱོང་བཞིན་པའི་གནས་སྟངས་རྒྱུས་མངའ་ཡོད་པ་མ་ཟད། བོད་མི་ཚོས་སྙིང་སྟོབས་དང་ལྷག་བསམ་ཐོག་ནས་ཁྲིམས་མཐུན་གྱི་བདག་དབང་རྩོད་བཞིན་པའི་གནས་སྟངས་སྐོར་ཤེས་རྟོགས་ཡོད་སྐོར་དང་། དེ་བཞིན་དཔལ་ལྡན་སྲིད་སྐྱོང་མཆོག་སླར་ཡང་མཇལ་བར་དགའ་ཚོར་དང་སྦྲགས། བོད་མིའི་མགྲིན་ཚབ་པ་སྐུ་བགྲེས་པ་ཞིག་ཡིན་སྐོར་སོགས་གསུངས།
ཁོང་གིས་དེ་སྔ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཨིན་ཡུལ་གྲོས་ཚོགས་ནང་ཆིབས་སྒྱུར་བསྐྱང་སྐབས་མཇལ་འཕྲད་བྱུང་བ་རྣམས་དྲན་གསོ་ཞུས་པ་མ་ཟད། ལྷག་པར་དེ་སྔ་ཕྱི་ལོ་ ༢༠༡༢ ཕྱི་ཟླ་ ༦ ནང་ཨིན་ཡུལ་གྲོས་ཚོགས་ཀྱི་ཚོགས་ཁང་ཞིག་ཏུ། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཉིན་དགུང་གསོལ་ཚིགས་འདེགས་འབུལ་ཞུ་སྐབས། བོད་དོན་རྒྱབ་སྐྱོར་ཤུགས་ཆེ་གནང་མཁན་སྐུ་ཞབས་ཊིམ་ལུབ་ཊོན་མཆོག་དང་། ནོར་མན་བྷེ་ཀར་ Norman Baker མཆོག་རྣམ་གཉིས་སྐབས་དེར་ཨིན་གཞུང་གི་བློན་ཆེན་ཡིན་སྟབས། གསོལ་ཚིགས་སྐབས་མགྲོན་འབོད་མ་ཞུས་པ་རེད། དེ་ནི་གཙོ་བོ་རྒྱ་ནག་གཞུང་ལ་ཁོང་ཁྲོ་མི་སློང་ཆེད་གནང་བ་ཞིག་ཡིན་པ་དྲན་གསོ་གནང་འདུག
ཕྱོགས་མཚུངས་ལྷན་ཚོགས་ཐོག་ཕེབས་པའི་གྲོས་ཚོགས་འཐུས་མི་རྣམས་ལའང་ཡི་རངས་བསྔགས་བརྗོད་གནང་བ་དང་སྦྲགས། ཁོང་རྣམས་ནི་བོད་མིའི་ཐོབ་ཐང་འཐབ་རྩོད་པ་དང་། འགྲོ་བ་མིའི་ཐོབ་ཐང་རྩོད་ལེན་གནང་མཁན་ཡིན་སྐོར་གསུངས། དེ་ཡང་ཁོང་གིས་ “ང་ཚོས་བོད་མི་དང་བོད་དོན་ཐོག་འཛེམས་ཟོན་མེད་པའི་ཐོག་ནས་རྒྱབ་སྐྱོར་ཞུ་བཞིན་ཡོད། བོད་ཀྱི་གནད་དོན་བདག་སྤྲོད་བྱ་རྒྱུ་དང་། གོ་རྟོགས་སྤེལ་རྒྱུ་གནད་འགག་ཆེན་པོ་རེད། “ཅེས་གསུངས།
དེ་རྗེས་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས། ཨིན་ཡུལ་གྲོས་ཚོགས་འོག་མའི་ཚོགས་གཙོ་སྐུ་ཞབས་ཇོན་བྷེར་ཀའོ་མཆོག་ཐེངས་འདིར་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ལྷན་ཚོགས་ཐོག་ཕེབས་པ་ནི་ཆེས་ཐོག་མ་ཡིན་པ་མ་ཟད། ཚོགས་གཙོ་མཆོག་གིས་གྲོས་ཚོགས་འོག་མའི་ནང་ཟུར་ཉན་དུ་བོད་མིའི་སྒྲིག་འཛུགས་ཀྱི་སྲིད་སྐྱོང་བཅར་ཡོད་སྐོར་གསུངས་པ་དེའང་ཆེས་ཐོག་མ་ཡིན་སྟབས། རྣམ་འགྱུར་དེ་དག་གིས་རྒྱ་ནག་གཞུང་ལ་བརྡ་ལན་ཤུགས་ཆེ་ཞིག་བཏང་བ་དང་། ལྷག་པར་གཞིས་བཞུགས་བོད་རིགས་སྤུན་ཟླ་རྣམས་ལ། རང་དབང་ལྡན་པའི་འཛམ་གླིང་ཕྱི་ཕྱོགས་ནས་ཁོང་རྣམ་པར་རྒྱབ་སྐྱོར་ཤུགས་ཆེ་གནང་བཞིན་ཡོད་པའི་རེ་བའི་བརྡ་ལན་གསར་པ་ཞིག་སྦྱིན་ཡོད་སྐོར་གསུངས།
དེ་ནས་དཔལ་ལྡན་སྲིད་སྐྱོང་མཆོག་གིས་བརྗོད་གཞི་དང་འབྲེལ། “བོད་ཀྱི་ཉམས་མྱོང་གཞི་ལ་བཞག་ནས། དེང་སྐབས་ཡུ་རོབ་ཁུལ་དུ་རྒྱ་ནག་གི་ས་བབ་ཆབ་སྲིད་ཀྱི་ཤུགས་རྐྱེན་ལ་དཔྱད་པ།” ཞེས་པའི་བརྗོད་གཞིའི་ཐོག་གསུང་བཤད་གནང་འདུག ཐོག་མར་དཔལ་ལྡན་སྲིད་སྐྱོང་མཆོག་གིས་ཨ་རིའི་རང་དབང་ཁང་པའི་ལོ་འཁོར་སྙན་ཐོ་བཏོན་པའི་ནང་། འཛམ་གླིང་ནང་འགྲོ་བ་མིའི་ཐོབ་ཐང་ལ་དམ་བསྒྲགས་ཆེ་ཤོས་ཨང་དང་པོ་སི་རི་ཡ་ Syria དང་། གཉིས་པ་བོད་དང་། ལོ་བསྟུས་མར་བོད་ནང་གི་བོད་མིའི་འགྲོ་བ་མིའི་ཐོབ་ཐང་གི་གནས་སྟངས་དེ་འཛམ་གླིང་ཁྱོན་དུ་སྡུག་ཤོས་ཨང་གཉིས་པ་ཡིན་པ་སྙན་ཐོའི་ནང་ཐོན་པའི་སྐོར་དང་། ལྷག་པར་ཨིན་གཞུང་ནས་ཀྱང་དེ་སྔ་ཨ་རི་ལྟར། རྒྱ་ནག་དང་ལྷན་བོད་ནང་འགྲོ་འོང་གི་གོ་སྐབས་འདྲ་མཉམ་བརྗེ་ལེན་དགོས་པའི་གྲོས་ཆོད་ཁྲིམས་མཐུན་གཏན་འབེབས་གནང་ཐབས་ཡོང་བའི་རེ་འདུན་ཞུས་གནང་འདུག
རྒྱལ་སྤྱིའི་རང་བཞིན་ལྡན་པའི་བོད་དོན་རྒྱབ་སྐྱོར་གྱི་ལྷན་ཚོགས་སྐབས། གྲོས་ཚོགས་འཐུས་མི་རྣམས་ལ་རྒྱ་ནག་གཞུང་གི་དངོས་ཤུགས་བརྒྱུད་གསུམ་ནས་གནོན་ཤུགས་སྤྲོད་ཐབས་བྱེད་བཞིན་ཡོད་སྐོར་གསུངས་པ་དང་སྦྲགས། ཉེ་ལམ་ལ་ཏི་ཝི་ཡའི་རྒྱལ་ས་རི་གར་ Riga རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ལྷན་ཚོགས་ཐེངས་བདུན་པ་ཚུགས་སྐབས། བལ་ཡུལ་ནས་གྲོས་ཚོགས་འཐུས་མི་གཉིས་ལྷན་ཚོགས་སུ་བཅར་ཡོད་ཀྱང་། རྗེས་སུ་ཁོང་གཉིས་རང་གནས་སུ་ལོག་རྗེས་འབྲེལ་ཡོད་ཆབ་སྲིད་ཚོགས་པས་བཀའ་བཀྱོན་བཏང་སྐོར་ལུང་འདྲེན་གནང་འདུག
གཞན་ཡང་དཔལ་ལྡན་སྲིད་སྐྱོང་མཆོག་གིས་དེང་སྐབས་རྒྱ་ནག་གཞུང་གི་རྒྱུད་གཅིག་ལམ་གཅིག ཟེར་བའི་སྲིད་བྱུས་འོག་དེ་སྔ་བོད་ནང་བཙན་འཛུལ་བྱས་པ་ལྟར། འཇམ་མཁས་ཀྱི་སྲིད་བྱུས་དེའི་འོག་རྒྱལ་སྤྱིའི་ཁྱོན་དུ་གནོན་ཤུགས་སྤྲོད་ཐབས་བྱེད་བཞིན་ཡོད་སྟབས། འཛམ་གླིང་རྒྱལ་ཁབ་གཞན་ཚོས་བོད་ནང་དེ་སྔ་ཕྱི་ལོ་ ༡༩༥༩ དང་ ༡༩༦༠ ནང་རྒྱ་ནག་གཞུང་གིས་འཛུགས་སྐྲུན་ཡར་རྒྱས་དང་། དཔལ་འབྱོར་ཡར་རྒྱས་ཀྱི་གོ་སྐབས་ཡོད་ཚུལ་བཤད་ནས་རིམ་བཞིན་བོད་ས་དབང་སྒྱུར་བྱས་པར་བརྟེན། བོད་ནས་བློ་སྐྱེད་ལེན་དགོས་པ་དྲན་སྐུལ་ཞུས།
དེ་བཞིན་ཁོང་གིས་བོད་མིའི་སྒྲིག་འཛུགས་ཀྱིས་དབུ་མའི་ལམ་གྱི་སྲིད་བྱུས་རྒྱུན་སྐྱོང་གནང་བཞིན་པ་དེ་ནི། རྒྱ་ནག་གཅིག་གི་སྲིད་བྱུས་དང་རྒྱབ་འགལ་མི་འགྲོ་བ་དང་། ཨིན་གཞུང་ནས་བོད་མིའི་སྒྲིག་འཛུགས་ཀྱི་གཉིས་སྨན་དབུ་མའི་ལམ་ལ་རྒྱབ་སྐྱོར་གནང་དགོས་པའི་རེ་འདུན་བཏོན་གནང་བ་དང་སྦྲགས། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚབ་དང་ལྷན་བོད་རྒྱ་འབྲེལ་མོལ་བསྐྱར་གསོ་གནང་ཆེད་ཨིན་གཞུང་གིས་རྒྱ་ནག་གཞུང་ལ་གནོན་ཤུགས་སྤྲོད་དགོས་སྐོར་སོགས་གསུངས་རྗེས་དྲི་བ་དྲིས་ལན་གནང་འདུག
ཐེངས་འདིར་ཨིན་ཡུལ་གྲོས་ཚོགས་འོག་མའི་ཚོགས་གཙོ་མཆོག་མཛད་བྲེལ་ཧ་ཅང་ཡོད་བཞིན་དུ། ལྷན་ཚོགས་ཐོག་ཆུ་ཚོད་གཅིག་ཙམ་རིང་བཞུགས་འདུག ཕྱི་ཚེས་ ༢༧ ཉིན་དཔལ་ལྡན་སྲིད་སྐྱོང་མཆོག་གིས་གསར་འགྱུར་བརྒྱུད་ལམ་ཁག་གཉིས་ལ་བཅར་འདྲི་དང་ལེན་དང་། རྒྱལ་ས་ལོན་ཌོན་སྒེར་གྱི་ཚོགས་པ་ Caledonian Club ཞེས་པའི་ནང་གསུང་བཤད་གནང་ཡོད་པ་བཅས།།
