ཕྱི་ལོ་ ༢༠༡༩ ཟླ་ ༦ ཚེས་ ༢༥ རེས་གཟའ་མིག་དམར།

༄༅། །ཕྱི་ལོ་ ༢༠༡༩ ཟླ་ ༦ ཚེས་ ༢༤ རེས་གཟའ་ཟླ་བ་ཉིན་བྱང་ཨ་རིའི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་ཀྱིས་ཨ་རིའི་རྒྱལ་ཡོངས་གྲོས་ཚོགས་འཐུས་མི་སྐུ་ཞབས་ཊིམ་བྷུར་ཅེཌ་ Tim Burchett ལགས་དང་མཇལ་འཕྲད་གནང་ཡོད།

དེ་ཡང་སྐུ་ཞབས་ཊིམ་བྷུར་ཅེཌ་ལགས་ནི་ཨ་རིའི་ཊི་ནེ་སིའི་ Tennessee མངའ་སྡེའི་སྤྱི་མཐུན་ཚོགས་པའི་ Republican གྲོས་ཚོགས་འཐུས་མི་ཡིན་པ་མ་ཟད། གསར་དུ་འོས་འདེམས་བྱུང་བའི་གྲོས་ཚོགས་འཐུས་མི་ཡིན་པ་དང་། གྲོས་ཚོགས་ཀྱི་ཕྱི་འབྲེལ་ལས་དོན་ཚན་པའི་ཚོགས་ཆུང་ནང་ཕྱག་ལས་གནང་བཞིན་པ་དང་། དེ་སྔ་ནོཀ་སི་ Knox རྫོང་གི་གྲོང་སྡེའི་སྤྱི་ཁྱབ་པ་གནང་མྱོང་ཡོད། 

སྐབས་དེར་བྱང་ཨ་རིའི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་ཀྱིས་ཨ་རིའི་གྲོས་ཚོགས་འཐུས་མི་སྐུ་ཞབས་ཊིམ་བྷུར་ཅེཌ་ལགས་ལ་བོད་དོན་ངོ་སྤྲོད་གནང་སྐབས། སྐུ་ཞབས་ཊིམ་བྷུར་ཅེཌ་ལགས་ཀྱིས་རྒྱ་ནག་གཞུང་ནས་བོད་རང་སྐྱོང་ལྗོངས་དང་དེ་མིན་བོད་ཀྱི་ས་ཁུལ་ཁག་ཏུ་མི་སེར་སྤེལ་བཞིན་པར་མཐའ་གཅིག་ཏུ་ངོ་རྒོལ་དང་བོད་དོན་ལ་རྒྱབ་སྐྱོར་ཡོད་ཅེས་གསུང་། ཁོང་གི་པ་ལགས་ནི་དམག་ཆེན་གཉིས་པའི་སྐབས་ཨ་རིའི་དམག་མི་ཡིན་སྟབས་དམར་ཤོག་ཚོགས་པའི་ཤུགས་རྐྱེན་ངན་པའི་སྐོར་སྔ་ས་ནས་མཁྱེན་གྱི་ཡོད་སྐོར་སོགས་གསུང་འདུག་པ་བཅས། །