ཕྱི་ལོ་ ༢༠༡༩ ཟླ་ ༦ ཚེས་ ༢༥ རེས་གཟའ་མིག་དམར།
༄༅། །ཨ་རིའི་ཕྱི་སྲིད་ལས་ཁུངས་ US State Department ནས་ལོ་ལྟར་འཛམ་གླིང་གི་རྒྱལ་ཁབ་འདྲ་མིན་གྱི་ཆོས་དད་རང་དབང་གི་གནས་སྟངས་སོགས་ལ་རྟོག་ཞིབ་གནང་སྟེ་ལོ་འཁོར་སྙན་ཐོ་ཞིག་འདོན་སྤེལ་གནང་གི་ཡོད་པ་ལྟར། ཕྱི་ལོ་ ༢༠༡༨ ལོའི་རྒྱལ་སྤྱིའི་ཆོས་དད་རང་དབང་གི་ལོ་འཁོར་སྙན་ཐོ་དེ་བཞིན་ཕྱི་ལོ་ ༢༠༡༩ ཟླ་ ༦ ཚེས་ ༢༡ ཉིན་ཨ་རིའི་ཕྱི་སྲིད་དྲུང་ཆེ་སྐུ་ཞབས་མ་ཡིག་པོམ་པེའོ་ Mike Pompeo མཆོག་དབུ་བཞུགས་ཐོག་ཡོངས་གྲགས་གསལ་བསྒྲགས་སྤེལ་ཡོད།
དེ་ཡང་ཨ་རིའི་ཕྱི་སྲིད་ལས་ཁུངས་ནས་ཕྱི་ལོ་ ༢༠༡༨ ལོའི་རྒྱལ་སྤྱིའི་ཆོས་དད་རང་དབང་ཀྱི་གནས་བབ་སྐོར་ལོ་འཁོར་སྙན་ཐོ་ཞིག་འདོན་སྤེལ་གནང་ཡོད་པ་དང་། སྙན་ཐོའི་ནང་འདས་པའི་ལོ་ངོ་གཅིག་གི་ནང་ཚུད་ལ་ཨ་རི་གཞུང་ནས་རྒྱ་ནག་གི་མཐོ་རིམ་འགོ་ཁྲིད་ཚོ་དང་ལྷན་ཐུག་འཕྲད་ཀྱིས་བོད་ནང་གི་གཞི་རྩའི་འགྲོ་བ་མིའི་ཐོབ་ཐང་གི་གནས་སྟངས་ཙམ་མིན་པར་བོད་མིའི་ཆོས་དད་རང་དབང་ལ་བརྩི་བཀུར་ཞུ་དགོས་པའི་སྐུལ་མ་ལན་མང་གནང་མྱོང་ཡོད་ཀྱང་། རྒྱ་ནག་གཞུང་ནས་བཟང་ཕྱོགས་ཀྱི་འགྱུར་བ་མེད་པའི་ཁར་བོད་མིའི་ཆོས་དད་རང་དབང་ཐོག་དམ་བསྒྲགས་སྔར་ལས་ཤུགས་རུ་བྱེད་བཞིན་ཡོད་སྐོར་གསུངས་འདུག
སྙན་ཐོ་དེའི་ནང་དུ་འཛམ་གླིང་རྒྱལ་ཁབ་ ༢༠༠ མ་ཟིན་ཙམ་གྱི་ཆོས་དད་རང་དབང་གི་གནས་སྟངས་སྐོར་ལ་ཁྱོན་ཤོག་གྲངས་ ༨༧ ཙམ་ཡོད་པའི་ནང་ནས་རྒྱ་ནག་སྡེ་ཚན་ཁོངས་སུ་རྒྱ་ནག་དང་། བོད། ཡུ་གུར། ཧོང་ཀོང་། མ་ཁའོ་བཅས་སྡེ་ཚན་ལྔ་སོ་སོའི་ནང་གི་ཆོས་དད་རང་དབང་སྐོར་ཆེད་བཀོད་གནང་ཡོད་པ་མ་ཟད། བོད་ནང་གི་ཆོས་དད་རང་དབང་སྐོར་ཤོག་གྲངས་ ༢༠ འདོན་སྤེལ་གནང་འདུག་པའི་ནང་། རྒྱ་ནག་གཞུང་གིས་ཕྱི་ལོ་ ༢༠༡༨ ཟླ་ ༢ ནས་ཆོས་དོན་སྒྲིག་ཁྲིམས་ Regulations on Religious Affairs གསར་པ་ལག་བསྟར་བྱས་པ་ནས་བཟུང་། བོད་རང་སྐྱོང་ལྗོངས་གཙོ་བོར་གྱུར་པའི་བོད་ཀྱི་ས་གནས་ཁག་ཏུ་ཡོད་པའི་དགོན་སྡེ་གྲྭ་ཚང་ཁག་གི་དཔེ་ཁྲིད་ལ་དམིགས་བསལ་དམ་བསྒྲགས་དང་། ཉིན་རེའི་ཆོས་ཕྱོགས་ཀྱི་བྱེད་སྒོ་ཁག་ལ་ཐེ་བྱུས་སོགས་བྱེད་ཀྱི་ཡོད་པ་མ་ཟད། འདས་ལོར་རྒྱ་ནག་གཞུང་གི་དམ་བསྒྲགས་ཅན་གྱི་སྲིད་བྱུས་འོག་གྲྭ་བཙུན་ཁག་གཅིག་ལ་སྡུག་སྦྱོང་མནར་གཅོད་དང་ངེས་མེད་འཛིན་བཟུང་སོགས་བྱས་ཡོད་པ་དང་། གྲྭ་བཙུན་ཁག་གཅིག་ད་ལྟའི་ཆར་གར་སོང་ཆ་མེད་དུ་གྱུར་ཡོད་སྐོར་དང་། བོད་མིའི་ངོ་བོ་དང་ཆོས་ལུགས་ལ་བརྟེན་ནས་བོད་མི་ཚོར་མགྲོན་ཁང་དང་གླ་གཏོང་རླངས་འཁོར་ནང་སྣེ་ལེན་མི་བྱེད་པའི་གནས་ཚུལ་རྒྱུན་དུ་ཡོང་བཞིན་ཡོད་པ། དེ་བཞིན་རྒྱ་ནག་གི་གྲོང་ཁྱེར་ཁག་གི་ནང་ལས་ཀའི་གོ་སྐབས་དང་འབྲེལ་ནས་བོད་མི་ཡིན་ཚེ་དབྱེ་འབྱེད་བྱེད་ཀྱི་ཡོད་པའི་སྐོར་དང་། རྒྱ་རིགས་མང་པོ་ཞིག་བོད་བརྒྱུད་ནང་བསྟན་ལ་དད་མོས་ཆེན་པོ་ཡོད་པ་ལྟར། བོད་ཀྱི་དགོན་སྡེ་ཁག་ནང་སློབ་གཉེར་བྱེད་དུ་ཕྱིན་ན་དམ་བསྒྲགས་བྱེད་ཀྱི་ཡོད་སྐོར་བཀོད་འདུག
ལྷག་པར་སྙན་ཐོའི་ནང་འདས་ལོར་རྒྱ་གཞུང་གི་དྲག་པོའི་སྲིད་བྱུས་ལ་མ་བཟོད་པར་རང་ལུས་མེར་སྲེག་གནང་མཁན་རྒྱལ་གཅེས་པ་ཚེ་ཁོ་ལགས་ཀྱིས་གཙོས་གཞན་གསུམ་གྱི་ལོ་རྒྱུས་དང་། རྒྱ་ནག་གཞུང་ནས་བོད་དཀར་མཛེས་གསེར་རྟ་བླ་རུང་སྒར་དང་ཡ་ཆེན་སྒར་བཅས་སུ་གྲྭ་ཤག་ ༡༥༠༠ གཏོར་བཤིག་བཏང་བ་མ་ཟད། གྲྭ་བཙུན་ ༣༠༠༠ ཕྱིར་འབུད་བཏང་བའི་གནས་ཚུལ་སོགས་ཐེར་འདོན་དང་སྦྲགས། རྒྱ་གཞུང་ནས་བོད་མིའི་ཆོས་ཕྱོགས་ཀྱི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་དུས་ནས་དུས་སུ་མཚན་སྨད་ཞུས་པ་དང་། མགོན་པོ་གང་ཉིད་མཆོག་གིས་དབུས་བོད་ཀྱི་བླ་སྤྲུལ་རྣམ་པའི་སྐུའི་ཡང་སྲིད་ཀྱི་གནད་དོན་ཐོག་མུ་མཐུད་ཐེ་བྱུས་བྱེད་བཞིན་པ་སོགས་ཐེར་འདོན་གནང་ནས་རྒྱ་ནག་གཞུང་གི་བྱེད་བབ་ལ་སྐྱོན་བརྗོད་གནང་འདུག་པ་མ་ཟད།
ཨ་རིའི་གཞུང་ནས་རྒྱ་ནག་གཞུང་གིས་བོད་མིའི་འགྲོ་བ་མིའི་ཐོབ་ཐང་དང་གཞི་རྩའི་རང་དབང་ལོངས་སུ་སྤྱོད་རྒྱུར་བཙན་གནོན་བྱེད་བཞིན་པར་བློ་འཚབ་ཆེན་པོ་ཡོད་པ་ལྟར། འདས་ལོར་ཨ་རིའི་ནང་ཚོགས་པའི་རྒྱལ་སྤྱིའི་ཆོས་དད་རང་དབང་གི་ཆེས་མཐོའི་ལྷན་ཚོགས་སྐབས། ཨ་རིའི་སྲིད་འཛིན་གཞོན་པ་མེག་པིན་སི་ Mike Pence མཆོག་དང་ཕྱི་སྲིད་དྲུང་ཆེ་མེག་པམ་པེའོ་ Mike Pompeo མཆོག་རྣམ་གཉིས་ནས་བོད་ཀྱི་ཆབ་སྲིད་བཙོན་ཟུར་མགོ་ལོག་འཇིགས་མེད་ལགས་ལ་མཇལ་མོལ་གནང་ཡོད་སྐོར་དང་། ཨ་རིའི་གཞུང་ནས་རྒྱ་ནག་གཞུང་ལ་བོད་ནང་གི་ཆོས་དད་རང་དབང་གི་གནས་སྟངས་ཡར་རྒྱས་གཏོང་དགོས་པའི་སྐུལ་མ་ཐེངས་མང་གནང་ཡོད་ལ། བོད་ནང་དུ་ཡོད་པའི་ཆོས་ལུགས་འགོ་ཁྲིད་དང་། ཆོས་ལུགས་རྗེས་འབྲང་པ། དེ་བཞིན་གཞུང་འབྲེལ་མ་ཡིན་པའི་ཚོགས་པ་ཁག་དང་འབྲེལ་བ་ཟབ་མོ་བཞག་སྟེ་བོད་ནང་གི་ཆོས་དད་རང་དབང་གི་གནས་བབ་ཐད་ལྟ་རྟོག་བྱེད་ཀྱི་ཡོད་པ་བཅས་སོགས་སྲིད་འཛིན་སྐུ་ཞབས་ཌོ་ནལ་ཊམ་ Donald Trump མཆོག་གི་གཞུང་ནས་གལ་ཆེན་དུ་འཛིན་བཞིན་ཡོད་སྐོར་བཀོད་འདུག །
