ཕྱི་ལོ་ ༢༠༡༩ ཟླ་ ༦ ཚེས་ ༤ རེས་གཟའ་མིག་དམར།

༄༅། །འདི་གར་བྱང་ཨ་རི་སྐུ་ཚབ་དོན་ཁང་ནས་བཏང་གནས་ནང་འཁོད་དོན།  ཕྱི་ལོ་ ༢༠༡༩ ཟླ་བ་ ༦ ཚེས་ ༢ ཉིན་ཨ་རིའི་གྲོང་ཁྱེར་ནིའུ་ཡོག་གི་ལམ་ཆེན་ ༡༢ དང་ལམ་ཆུང་ ༤༢ ཀྱི་ཆུ་འགྲམ་དུ་རྒྱ་ནག་མང་གཙོ་ཚོགས་པ། པེ་ཅིང་དཔྱིད་གསར། རྒྱ་ནག་མང་གཙོའི་འཐབ་རྩོད་ཚོགས་པ། རྒྱ་ནག་མང་གཙོའི་མཉམ་འབྲེལ་ཚོགས་པ་བཅས་ཀྱིས་གོ་སྒྲིག་འོག་དྲུག་བཞིའི་དོན་རྐྱེན་བྱུང་སྟེ་ལོ་ངོ་སུམ་བཅུ་འཁོར་བའི་དུས་དྲན་གྱི་མར་མེ་མཚན་ཚོགས་ཞིག་ཐོག་བསྐོང་ཚོགས་གནང་ཡོད། 

སྐབས་དེར་ཨ་རི་དོན་ཁང་གི་རྒྱ་རིགས་འབྲེལ་མཐུད་པ་ཚུལ་ཁྲིམས་རྒྱ་མཚོ་ལགས་མགྲོན་འབོད་གནང་བ་ལྟར་མཉམ་ཞུགས་ཀྱིས་གཏམ་བཤད་གནང་ཡོད། དེ་ཡང་རྒྱ་རིགས་འབྲེལ་མཐུད་པས་ཐོག་མར་འགྲོན་འབོད་གནང་བར་ཐུགས་རྗེ་ཆེ་ཞུས་པ་དང་སྦྲགས། ལས་འགུལ་ཐོག་ཞུགས་མཁན་གྱི་གཞོན་སྐྱེས་རྣམས་ལ་འཚམས་འདྲི་བཀྲིས་བདེ་ལེགས་ཞུས།  དྲུག་བཞིའི་དོན་རྐྱེན་ནི། འཛམ་གླིང་གི་ལོ་རྒྱུས་ཐོག་སེམས་སྐྱོ་དགོས་པའི་གནས་ཚུལ་ཞིག་དང་གནོན་ཤུགས་ཇི་ཙམ་ཆེན་པོ། དངོས་བྱུང་གནས་ཚུལ་དེ་ནི་ནམ་ཡང་སུབ་ཐབས་མེད་པ་ཞིག་ཡིན། ཕྱི་ལོ་ ༡༩༨༨  དང་  ༡༩༨༩  ནི་བོད་མིར་མཚོན་ན་དུས་ཚོད་གལ་ཆེན་ཞིག་སྟེ། རྒྱ་ནག་པེ་ཅིང་གཞུང་ནས་༸གོང་ས་མཆོག་དང་བོད་དོན་གྲོས་མོལ་བྱེད་འདོད་ཀྱི་བསམ་ཚུལ་བཏོན་པ་དང་། ཚོགས་ཡུལ་དང་དུས་ཚོད་སོགས་༸གོང་ས་མཆོག་ནས་གཏན་འཁེལ་ཆོག་པར་བཤད། དུས་ཚོད་དེ་ནི་༸གོང་ས་མཆོག་ནས་སྔ་རྗེས་ཞི་བའི་དོན་ཚན་ལྔ་དང་སི་ཊག་སི་སྦར་གྱི་དགོངས་འཆར་གནང་བའི་དུས་ཚོད་ཡང་རེད། འོན་ཀྱང་དྲུག་བཞིའི་དོན་རྐྱེན་བྱུང་བའི་སྐབས་དེར་༸གོང་ས་མཆོག་ནས་མྱུར་དུ་རྒྱ་ནག་གཞུང་ནས་སློབ་ཕྲུག་ལ་དྲག་པོའི་གདུང་འདེད་གཏོང་བར་སྐྱོན་བརྗོད་བྱས་པ་མ་ཟད། སློབ་ཕྲུག་གི་ཞི་བའི་མང་གཙོའི་ལས་འགུལ་ལ་རྒྱབ་སྐྱོོར་གནང་བའི་སྐོར་འབྲེལ་མཐུད་པས་ངོ་སྤྲོད་གནང་།

གཞན་ཡང་རྒྱ་རིགས་འབྲེལ་མཐུད་པས་མུ་མཐུད་འབྲེལ་བརྗོད་བྱེད་རྒྱུར་བོད་མིའི་སྒྲིག་འཛུགས་ཀྱི་སྣེ་འཁྲིད་འོག་བཙན་བྱོལ་སྤྱི་ཚོགས་ཀྱི་བོད་པ་རྣམས་མང་གཙོ་ཀ་བ་གསུམ་ལྡན་གྱི་མང་གཙོའི་རང་དབང་ཡོངས་སུ་ལོངས་སྤྱོད་བྱེད་བཞིན་ཡོད་པ་དང། དེ་ནམ་ཞིག་ལ་རྒྱ་ནག་གི་མི་མང་ཚོར་ཡོང་ཐུབ་པའི་སྨོན་འདུན་ཞུ་ཡོད་པ་བཅས། །