ཕྱི་ལོ་ ༢༠༡༩ ཟླ་ ༦ ཚེས་ ༢༠ རེས་གཟའ་ཕུར་བུ།
༄༅། །འདི་གར་སྦར་སིལ་སྐུ་ཚབ་དོན་གཅོད་ཁང་ནས་བཏང་གནས་ནང་འཁོད་དོན། ཕྱི་ལོ་ ༢༠༡༩ ཟླ་ ༦ ཚེས་ ༡༧ ཉིན་ཞྭ་དཀར་གཡུང་དྲུང་བོན་གྱི་བསྟན་པའི་གཙུག་རྒྱན་༸སྐྱབས་རྗེ་རྒྱལ་བ་སྨན་རིའི་ཁྲི་འཛིན་ ༣༤ པ་ཆེན་པོ་མཆོག་ཕ་རན་སིའི་རྒྱལ་ས་པེ་རི་སིར་ཕེབས་འབྱོར་སྐབས་སྦར་སིལ་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་དང་། ཕ་རན་སི་འབྲེལ་མཐུད་པ་རྣམ་རྒྱལ་བསམ་གྲུབ་ལགས། ཕ་རན་སི་བོད་རིགས་ཚོགས་པའི་ཚོགས་གཙོ་བསྟན་འཛིན་སྤེན་པ་ལགས་སོགས་དད་ལྡན་མི་མང་རྣམས་ནས་ཕེབས་བསུ་མཇལ་བཅར་གྱིས་བཞུགས་གནས་གསོལ་མགྲོན་ཁང་དུ་གདན་འདྲེན་ཞུས།
ཕྱི་ཚེས་ ༡༨ ཉིན་གྱི་ཕྱི་དྲོ་ཆུ་ཚོད་ ༥ སྟེང་སྐྱབས་རྗེ་རྒྱལ་བ་སྨན་རི་ཁྲི་འཛིན་ ༣༤ མཆོག་ཕ་རན་སི་བོད་རིགས་ཚོགས་པའི་རིག་པ་ཆོས་ཚོགས་ཀྱི་ཚོགས་ཁང་དུ་གདན་ཞུས་ཀྱིས་སྦར་སིལ་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་དང་། ཕ་རན་སི་བོད་རིགས་སྤྱི་མཐུན་ཚོགས་པའི་ཚོགས་གཙོ་བསྟན་འཛིན་སྤེན་པ་ལགས་རྣམ་གཉིས་ཀྱིས་མཎྡལ་རྟེན་གསུམ་འདེགས་འབུལ་ཞུས་རྗེས་སྐྱབས་རྗེ་མཆོག་གིས་བོད་རིགས་རྣམས་ལ་གཡུང་དྲུན་བོན་གྱི་བྱུང་རིམ་དང་། དར་རྒུད། གཡུང་དྲུང་བོན་གྱི་ལྟ་གྲུབ་གཙོ་བོ་ནི་གཞི་ལམ་འབྲས་གསུམ་དང་། བོན་བློ་རབ་འབྲིང་ཐ་གསུམ་སོགས་ཡིན་པ་དང་།
བཙན་བྱོལ་ནང་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་ཐུགས་རྗེ་བཀའ་དྲིན་ལ་བརྟེན་ནས་གཡུང་དྲུང་བོན་གྱི་བསྟན་པ་ཉམས་པ་སླར་གསོ་དང་འཛིན་སྐྱོང་སྤེལ་གསུམ་གནང་ཐུབ་ཡོད་སྐོར་དང་། རྒྱལ་བ་སྨན་རི་བའི་ཁྲི་འཛིན་བསྐོ་ཕྱོགས་སྐོར། བོད་མི་ནང་ཁུལ་མཐུན་སྒྲིལ་དམ་ཚིག་གཙང་མ་གནང་དགོས་གལ་སོགས་ཀྱི་སྐོར་བཀའ་སློབ་གནང་གྲུབ་མཚམས་དད་ལྡན་མང་ཚོགས་ལ་རྩ་རླུང་སྒོམ་སྒྲུབ་ཀྱི་གསུང་ཆོས་གནང་། དེ་ཉིན་ཕ་རན་སི་བོད་རིགས་ཚོགས་པས་སྐྱབས་རྗེ་རྒྱལ་བ་སྨན་རི་ཁྲི་འཛིན་ ༣༤ མཆོག་གིས་དབུས་སྐུ་མགྲོན་རྣམས་ལ་དགོང་མོའི་གསོལ་ཚིགས་གོ་སྒྲིག་ཞུས། ཕྱི་ཚེས་ ༡༩ ཉིན་སྐྱབས་རྗེ་མཆོག་པེ་རི་སི་ནས་ཨ་རིར་ཕེབས་ཡོད་པ་བཅས།།
