ཕྱི་ལོ་ ༢༠༡༩ ཟླ་ ༦ ཚེས་ ༢༥ རེས་གཟའ་མིག་དམར།

༄༅། །སུད་སིའི་གྲོས་ཚོགས་འཐུས་མི་ལྕམ་སྐུ་མ་ཡ་གྷ་རཕ་ Maya Graf ལགས་དང་། སྐུ་ཞབས་ཕེ་བི་ཡན་མོ་ལི་ན་ Fabian Molina ལགས། སྐུ་ཞབས་ནིག་ལོ་སི་གུག་གེར་ Niklaus Gugger ལགས་བཅས་ཀྱིས་སུད་སིའི་གཞུང་ལ་བོད་ཀྱི་གནད་དོན་སྐོར་དང་། དེ་བཞིན་ཟླ་བ་འདིའི་འགོ་སྟོད་དུ་པེ་ཅིང་ལ་སུད་སི་དང་རྒྱ་ནག་གཉིས་དབར་འགྲོ་བ་མིའི་ཐོབ་ཐང་ཐོག་གི་གླེང་སློང་ཐེངས་ ༡༦ པ་གནང་བ་དེ་ཡིས་ཕན་འབྲས་ཇི་བྱུང་སྐོར་ལ་འདྲི་རྩད་གནང་འདུག

དེ་ཡང་སུད་སིའི་གྲོས་ཚོགས་འཐུས་མི་དེ་དག་ནི། སུད་སིའི་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པའི་ཚོགས་གཞོན་དང་ཚོགས་མི་ཤ་སྟག་ཡིན་པ་དང་། ཁོང་གསུམ་གྱིས་ཁ་ཉིན་ཕྱི་ཚེས་ ༢༡ གྲོས་ཚོགས་མཇུག་སྒྲིལ་ཉིན་གྲོས་ཚོགས་འཐུས་མི་མང་དག་ཅིག་གིས་རྒྱབ་སྐྱོར་ཡོད་པའི་ཐོག་འབོད་སྐུལ་ཡིག་ཆ་སྤྱན་འབུལ་ཞུས་པ་མ་ཟད། གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཞོན་ལྕམ་སྐུ་མ་ཡ་གྷ་རཕ་ལགས་ཀྱིས་ཤི་ཅིན་ཕིང་ Xi Jinping གཞུང་བསླེབ་པ་ནས་བཟུང་བོད་དང་ཤར་ཏུར་ཀི་སི་ཐཱན་གཉིས་ནང་འགྲོ་བསྐྱོད་རང་དབང་ཐོག་བཀག་འགོག་དང་། ཆོས་དད་དང་འདུ་འཛོམས་རང་དབང་མེད་པ་སོགས་འགྲོ་བ་མིའི་ཐོབ་ཐང་གི་གནས་སྟངས་ཇེ་ཞན་ཇེ་སྡུག་ཏུ་འགྲོ་བཞིན་ཡོད་ཅེས་གླེང་གནང་སྟེ། སུད་སིའི་གཞུང་ནས་གནས་སྟངས་དེ་ཚོའི་ཐོག་ཐུགས་འཚབ་གནང་སྟེ་རྒྱ་ནག་གཞུང་ལ་དེ་རྩིས་ཀྱི་སྲིད་བྱུས་དང་ཡ་ལན་བྱ་འདོད་ཡོད་མེད་འདྲི་རྩད་གནང་འདུག

ཕྱོགས་མཚུངས་ཕྱག་སྦྲེལ་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་མི་ཡིས་སུད་སིའི་གཞུང་ལ་བོད་ནང་གི་འགྲོ་བ་མིའི་ཐོབ་ཐང་གི་གནད་དོན་དང་འབྲེལ་ནས་འདྲི་རྩད་གནང་བ་དང་ཆབས་ཅིག་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ཆེས་མཐོའི་སྐུ་ཚབ་མཆོག་བོད་དང་ཤར་ཏུ་ཀི་སི་ཐཱན་ནང་ཕེབས་ཆོག་རྒྱུར་རྒྱ་ནག་ལ་གནོན་ཤུགས་སྤྲོད་དགོས་སྐོར་གསུངས་འདུག །