ཕྱི་ལོ་ ༢༠༡༩ ཟླ་ ༦ ཚེས་ ༤ རེས་གཟའ་མིག་དམར།
ནིའུ་ཡོག་དང་ནིའུ་འཇར་སི་བོད་རིགས་སྤྱི་མཐུན་ཚོགས་པའི་ངོ་དེབ་ལས།
༄༅། །ཕྱི་ལོ་ ༢༠༡༩ ཟླ་ ༦ ཚེས་ ༢ ཉིན་ནིའུ་ཡོག་དང་ནིའུ་འཇར་སི་བོད་རིགས་སྤྱི་མཐུན་ཚོགས་པའི་སྤྱི་ཁང་ཕུན་ཚོགས་སྡེ་བཞི་དབུ་འབྱེད་རྟེན་འབྲེལ་གྱི་མཛད་སྒོའི་ཐོག་སྐུ་མགྲོན་གཙོ་བོ་ས་སྐྱ་གོང་མ་བདག་ཁྲི་རིན་པོ་ཆེ་མཆོག་གིས་མང་ཚོགས་ལ་བཀའ་སློབ་སྩལ་དོན། ལྷར་བཅས་སྲིད་ཞིའི་གཙུག་རྒྱན། གངས་ཅན་བསྟན་འགྲོ་ཡོངས་ཀྱི་མགོན་སྐྱབས་དཔུང་གཉེན་མཚུངས་ཟླ་མ་མཆིས་པ་སྤྱི་ནོར་༸གོང་ས་༸སྐྱབས་མགོན་ཆེན་པོའི་ཞབས་ཀྱི་པདྨོར་སྒོ་གསུམ་གུས་ཕྱག་སྔོན་དུ་འགྲོ་བའི་སྒོ་ནས་དེ་རིང་འདི་གར་ཕེབས་པའི་སྐྱབས་གནས་དགེ་འདུན་གྱི་སྡེ་དང་། བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག བྱང་ཨ་རིའི་སྐུ་ཚབ་དོན་གཅོད། སྤྱི་འཐུས་རྣམ་པ། གཞན་ཡང་གཞུང་ཞབས་རྣམ་པ། སྤྱི་མཐུན་ཚོགས་པའི་ཚོགས་གཙོ་ལགས་ཀྱིས་གཙོས་ལས་བྱེད་རྣམ་པ། སྦྱིན་བདག་རྣམ་པ། སྐུ་མགྲོན་རྣམ་པ་བཅས་ཚང་མར་ཞུ་རྒྱུར། དེ་རིང་ནིའུ་ཡོག་དང་ནིའུ་ཇར་སི་བོད་རིགས་སྤྱི་མཐུན་ཚོགས་པའི་ཚོགས་ཁང་ཕུན་ཚོགས་སྡེ་བཞི་ལེགས་འགྲུབ་བྱུང་ནས་དེ་རིང་དབུ་འབྱེད་མཛད་སྒོའི་སྐབས་ང་རང་ཡང་ཁྱུག་ཙམ་རིང་བཅར་ཐུབ་པ་ཞེ་དྲགས་དགའ་པོ་བྱུང་། གོ་སྐབས་འདི་བརྒྱུད་ཚང་མར་སྙིང་ནས་མཛའ་ཞིང་བརྩེ་བའི་འཚམས་འདྲི་བཀྲ་ཤིས་བདེ་ལེགས་ཞུ་རྒྱུ་ཡིན། གསུང་བཤད་གནང་མཁན་མང་པོ་བྱུང་སོང་། ཚང་མས་གཟབ་རྒྱས་གནང་སོང་།
ང་ལ་དམིགས་བསལ་ཞུ་རྒྱུ་མི་འདུག ངས་གོ་ཐོས་ལ་ནིའུ་ཡོག་ལ་བོད་མི་མང་ཤོས་སྡོད་ཀྱི་ཡོད་པ་རེད་ཟེར་གྱི་འདུག སྤྱི་ཁང་དགོས་རྒྱུ་གལ་ཆེན་པོ་ཞེ་དྲགས་ཆགས་ཡོད། སྤྱི་ཁང་དེའི་དོན་དུ་ལོ་མང་པོའི་རིང་ལ་ཚང་མས་སྐུ་ལས་ཞེ་དྲགས་བསྐྱོན་ཡོད། དཔལ་འབྱོར་འདུ་འགོད་དང་ཆོག་རྐྱེན་ཡི་གེ་ཐོབ་རྒྱུ་སོགས་གང་ཅིའི་ཐོག་ལ་དཀའ་ལས་ཞེ་དྲགས་བརྒྱབ་ནས་ད་ཆ་གྲུབ་འབྲས་སོན་ཡོད་པ་དེ་དགའ་འོས་པ་ཞིག་རེད། དེར་བརྟེན་ང་རང་ཞེ་དྲགས་དགའ་པོ་བྱུང་། ད་རྣམ་པ་ཚོས་དཔེ་སྤྱོད་ཡག་པོ་བྱེད་རྒྱུ་གལ་ཆེན་པོ་རེད། གཙོ་ཆེ་ཤོས་བོད་མི་མང་པོ་ཞིག་ཨ་རི་ལུང་པར་བསླེབས་ཡོད། ཨ་རི་ལུང་པ་འདི་འཛམ་བུ་གླིང་གི་སྟོབས་འབྱོར་ཆེ་ཤོས་དང་མང་གཙོ་ལུང་པ་རེད། འོན་ཀྱང་ཕྱིའི་ཤུགས་རྐྱེན་ཞེ་དྲགས་ཤུགས་ཆེན་པོ་ཡོད་སྟབས། མི་ཚོ་ལུང་པ་འདིའི་ནང་བསླེབས་རྗེས་རང་བཞིན་གྱིས་ཨ་རི་བ་ཆགས་འགྲོ་གི་ཡོད། ངའི་ངོ་ཤེས་པ་ཕྱི་རྒྱལ་གྱི་མི་ཨ་རི་བ་མ་ཡིན་པ་དེ་འདྲ་ཡོད། ཁོང་ཚོས་བརྗོད་པ་ལྟར་ན། ཐོག་མ་ཨ་རི་ལ་བསླེབས་དུས་ཁོང་ཚོས་སོ་སོ་ལུང་པའི་གོམས་གཤིས་དང་། སྤྱོད་པ། སྐད་ཡིག་སོགས་ཡུན་གནས་ཡོང་བར་ཐབས་ཤེས་བྱས་པ་ཡིན། ཡིན་ཡང་ཕྱིའི་ཤུགས་རྐྱེན་ཆེ་དྲགས་ནས་ཚང་མ་ཨ་རི་བ་རང་ཆགས་འགྲོ་གི་འདུག་ཅེས་བཤད་མཁན་བྱུང་། སྔ་མོ་ཡིན་ན་ང་ཚོ་བོད་པ་ཉུང་ཉུང་རེད། ད་ལྟ་བོད་པ་མང་པོ་ཡོད་སྟབས་གལ་ཆེ་ཤོས་དེ་ང་ཚོ་བོད་པ་རང་གི་ངོ་བོ་དེ་གནས་ཐུབ་རྒྱུ་གལ་ཆེ་ཤོས་རེད། 
བོད་མིའི་ངོ་བོ་གནས་པར་གཞན་ལ་མེད་པ་ཞིག་ང་ཚོ་བོད་ལ་ཐུན་མོང་མ་ཡིན་པའི་ཆོས་དང་རིག་གཞུང་རྩ་ཆེན་པོ་ཞིག་ཡོད། རྩ་ཆེན་པོ་ཡིན་པའི་རྒྱུ་མཚན་ནི་འགྲོ་བ་མིའི་མཚོན་པའི་སེམས་ཅན་དུ་གཏོགས་ཚད་ཚང་མ་བདེ་སྐྱིད་འདོད་མཁན་དང་སྡུག་བསྔལ་མི་འདོད་པ་ཤ་སྟག་རེད། སྡུག་བསྔལ་སེལ་བ་དང་བདེ་སྐྱིད་ཐོབ་པར་དཔལ་འབྱོར་དང་དབང་ཐང་གི་ཐོག་ནས་ཐོབ་ཐུབ་ཀྱི་མེད། ཆོས་ཀྱི་བསླབ་བྱ་ཐོག་ནས་རང་གི་སེམས་རྒྱུད་དུལ་བ་ཞིག་བྱུང་ན། ནང་གི་ཞི་བདེ་དེ་ཐོབ་ཐུབ་ཀྱི་ཡོད། དེར་བརྟེན་ང་ཚོ་བོད་ཀྱི་ནང་པ་སངས་རྒྱས་པའི་ཆོས་དང་རིག་གཞུང་དེ་དག་བོད་མི་ཙམ་དུ་མ་ཟད། འཛམ་བུ་གླིང་ཡོངས་རྫོགས་ལ་དགོས་མཁོ་ཆེན་པོ་ཆགས་ཡོད། ང་ཚོས་གཞན་ལ་སྐྱབས་འཇུག་ཞུ་མ་དགོས་པར། ང་རང་ཚོ་ཕ་མ་ནས་བརྒྱུད་ཡོང་བའི་ཆོས་དང་རིག་གཞུང་རྩ་ཆེན་པོ་དེ་ང་རང་ཚོ་རང་གིས་ཡག་པོ་བྱས་ནས་ཉར་ཚགས་བྱེད་རྒྱུ་གལ་ཆེན་པོ་ཆགས་ཡོད། ཆོས་དང་རིག་གཞུང་རྩ་ཆེན་པོ་དེ་ཐུག་སའི་རྩ་བ་བོད་སྐད་དང་བོད་ཡིག་ལ་ཐུག་གི་ཡོད། དེར་བརྟེན་བོད་མི་གཞོན་སྐྱེས་ཚོས་བོད་སྐད་དང་བོད་ཡིག་ཡག་པོ་ཤེས་དགོས་རྒྱུ་གལ་ཆེན་པོ་ཞེ་དྲགས་རེད། དེང་སང་སྔར་དང་མ་འདྲ་བ་གཟའ་མཇུག་སློབ་གྲྭ་ཚོགས་ཀྱི་ཡོད། ཕྱོགས་གང་ཅིའི་ཐད་ནས་ཡར་རྒྱས་འགྲོ་དང་འགྲོ་བཞིན་པ་རེད། ནང་མི་རྐྱང་པ་འཛོམས་པའི་སྐབས་ལ་ཡིན་ནའང་བོད་སྐད་རྒྱུག་རྒྱུ་གལ་ཆེན་པོ་རེད། ཕ་མ་ཚོས་ཕྲུ་གུ་ཚོར་ཨིན་ཇིའི་སྐད་རྒྱག་གི་ཡོད་པ་དེ་སྐྱོན་ཆེན་པོ་རེད། ནང་མི་བརྒྱུད་བོད་སྐད་བརྒྱབ་པ་ཡིན་ན། དམིགས་བསལ་འགྲོ་སོང་གཏོང་དགོས་པ་གང་ཡང་མེད། ངའི་ངོ་ཤེས་པ་ཝེ་ཏི་ནམ་མི་རིགས་ཡིན་པ་དེ་འདྲ་ཡོད།
ཁོང་ཚོས་ནང་མི་རྐྱང་པ་འཛོམས་པའི་སྐབས་རང་གི་སྐད་མ་གཏོགས་རྒྱག་མི་ཆོག་པའི་ཁྲིམས་བཟོས་འདུག ང་རང་ཚོས་ཁ་མིག་ཡར་ལྟ་བྱས་ནས་བོད་སྐད་དང་བོད་ཡིག་ཡག་པོ་སྦྱང་རྒྱུ་གལ་ཆེན་པོ་རེད། སྔོན་མ་ཡང་ངས་ཚར་མང་པོ་ཞུས་པ་ཡིན། ད་དུང་ཡིན་ནའང་གལ་བོ་ཆེ་ལ་ནན་ཏན་ཟེར་བ་ནང་བཞིན། བོད་སྐད་དང་བོད་ཡིག་སྦྱང་རྒྱུ་ཚང་མའི་ཐུགས་ལ་གཞག་རོགས་གནང་། བོད་མི་སྤྱི་བོ་གནམ་བསྟན་ཡོངས་རྫོགས་ལ་བོད་སྤྱི་པའི་འགན་འཁྲི་ཡོད། བོད་སྤྱི་པའི་དོན་དུ་ཚང་མས་མཐུན་པོ་བྱེད་རྒྱུ་ཧ་ཅང་གལ་ཆེན་པོ་རེད། མཐུན་པོ་ཡོད་ན་ཉམས་ཆུང་གིས་ཀྱང་དོན་ཆེན་འགྲུབ། ཅེས་གསུངས་པ་རེད། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་ཐུགས་རྗེ་བཀའ་དྲིན་ཉག་གཅིག་ལ་བརྟེན་ནས་ཆོས་ཕྱོགས་ཀྱི་ཐོག་ནས་བཤད་པ་ཡིན་ན། སྔར་དང་མི་འདྲ་བའི་མཐུན་ལམ་དམ་ཚིག་གོང་བུ་གཅིག་གྱུར་དང་། ཕན་ཚུན་དག་སྣང་ནོར་བུའི་འོད་ཀྱིས་ཁྱབ་ནས་བསྡད་ཡོད། ཆོལ་ཁ་དང་མི་རིགས་ཀྱི་ཐོག་ནས་བཤད་ནའང་འདྲ། ང་ཚོ་ཚང་མ་རྩམ་པ་ཟ་མཁན་ཡིན་པ་གཅིག་པ་ཡིན། ནང་ཁུལ་གྱི་ཙག་ཙིག་ལ་མགོ་འཁོར་ནས་བསྡད་པ་དེ་ཧ་ཅང་ནོར་འཁྲུལ་ཆེན་པོ་རེད། ད་ལྟ་ང་ཚོའི་ལུང་པ་མིའི་ལག་པར་ཤོར་ཡོད། རྒྱལ་བ་རིན་པོ་ཆེས་བོད་མི་ཚང་མ་མཐུན་པོ་བྱེད་དགོས་ཞེས་བཀའ་སློབ་ཡང་ཡང་ཕེབས་ཡོད། རྩ་བའི་རྒྱལ་བ་རིན་པོ་ཆེས་དགུང་ལོ་ ༡༡༣ བཞུགས་རྒྱུའི་ཞལ་བཞེས་ཐོབ་ཡོད་ཀྱང་། བླ་སློབ་ཀྱི་དམ་ཚིག་ཟེར་བ་དེ་ཧ་ཅང་གལ་ཆེན་པོ་ཆགས་ཡོད། ཚང་མས་རྒྱལ་བ་རིན་པོ་ཆེའི་བཀའ་བཞིན་བསྒྲུབ་རོགས་གནང་། ཞེས་སོགས་ཀྱི་བཀའ་སློབ་སྩལ། །
