ཕྱི་ལོ་ ༢༠༡༩ ཟླ་ ༦ ཚེས་ ༢༡ རེས་གཟའ་པ་སངས།

༄༅། །ཕྱི་ལོ་ ༢༠༡༩ ཟླ་ ༦ ཚེས་ ༢༡ ནས་ ༢༤ བར་སོག་པོའི་རྒྱལ་ས་ཨོ་ལན་བ་ཌོར་ Ulaanbaatar ནང་ཨེ་ཤི་ཡ་ཞི་བདེ་ནང་པའི་ཆོས་ཚོགས་ཀྱི་ཚོགས་ཆེན་ཐེངས་ ༡༡ ཚོགས་གནང་ཡོད་ཀྱང་། རྒྱ་ནག་གཞུང་གི་གནོན་ཤུགས་འོག་བོད་མིའི་སྒྲིག་འཛུགས་ཆོས་རིག་ལས་ཁུངས་ཀྱི་སྐུ་ཚབ་ཚོགས་བཅར་ཐུབ་མེད། 

དེ་ཡང་བོད་མིའི་སྒྲིག་འཛུགས་ཀྱི་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་གིས་བོད་མིའི་སྒྲིག་འཛུགས་ཀྱི་བརྙན་འཕྲིན་ཚན་པའི་བཅར་འདྲི་སྐབས་གསུང་དོན། ཆོས་ཕྱོགས་ཀྱི་གནས་ཚུལ་ཞིག་ལ་ད་བར་གང་ཡང་བརྗོད་མྱོང་མེད་མཁན་ཞིག་ལ་ཆབ་སྲིད་ཁོ་ནའི་ཐོག་ནས་དེ་ལྟར་བྱས་པ་ནི། རྒྱལ་ཁབ་ཅིག་གི་ཚད་མཐོ་བོའི་རང་དབང་དང་འབྲེལ་བ་ཡོད་པའི་གནད་དོན་ཆགས་ཡོད་སྟབས། ཕར་ཕྱོགས་ནས་དེ་འདྲའི་རིགས་བྱེད་རྐྱང་བྱས། ཚུར་ཕྱོགས་ནས་ཉན་རྐྱང་བྱས་པ་ཡིན་ན། ཕྱོགས་གཉིས་ཀར་དཀའ་ལས་ཁག་པོ་ཆགས་ཀྱི་ཡོད་པར་བརྟེན།  དེ་འདྲའི་གནས་སྟངས་ཆགས་དུས་གཅིག་ནས་འོས་ཤིང་མ་འཚམས་པ་དང་། གཉིས་ནས་ཆོས་ཕྱོགས་རྐྱང་པའི་ཐོག་ད་བར་གང་ཡང་བྱས་མ་མྱོང་མཁན་ཞིག་ལ་དེ་ལྟར་བྱེད་ཡོང་དུས་དཔེར་ན་སོག་པོའི་རྒྱལ་ཁབ་དང་གཞུང་ཡིན་ནའང་ཧ་ཅང་བློ་ཕམ་བྱུང་ཡོད་ངེས་རེད་བསམ་གྱི་འདུག  ང་ཚོ་བོད་པ་ཚོ་ཡིན་ནའང་རིམ་པས་མཁྱེན་ནས་ཐུགས་ཕམ་ཏན་ཏན་ཡོང་གི་རེད། རྒྱ་གཞུང་གི་བྱ་སྤྱོད་ལ་བརྟེན་ནས་ད་ལྟ་རྒྱལ་ཁབ་མང་པོ་སུན་སྣང་སྐྱེས་ནས་བསྡད་ཡོད་པ་རེད། རྒྱ་ནག་གཞུང་ལ་ཡིན་ནའང་དེས་གནོད་པ་ལས་ཕན་ཐོགས་གང་ཡང་མེད། ཅེས་དང་། 

དེ་བཞིན་རྒྱ་ནག་ནི་འཛམ་གླིང་སྟེང་ནང་པ་མང་ཤོས་ཡོད་མཁན་གྱི་རྒྱལ་ཁབ་ཞིག་ཡིན་སྟབས། རྒྱ་གཞུང་གིས་ནང་པའི་ཆོས་ཀྱི་ཐོག་དེ་འདྲ་བྱེད་དགོས་དོན་ག་རེ་རེད། ཐེངས་འདིའི་གནད་དོན་དེ་ཆོས་དང་ཆབ་སྲིད་གཉིས་ཀའི་ཐད་ནས་བཤད་ན་གནད་དོན་ཆེན་པོ་ཞིག་ཆགས་ཡོད་པའི་ཚོར་སྣང་གསར་པ་ཞིག་སྐྱེས་སོང་། ང་ཚོས་དོ་སྣང་གནང་དགོས་པ་ཏན་ཏན་འདུག་ཅེས་སོགས་གསུང་། 

སྤྱིར་ཐེངས་འདིའི་ལྷན་ཚོགས་ཐོག་བྱང་རྩེ་ཆོས་རྗེ་རིན་པོ་ཆེ་མཆོག་དང་། ཀུན་བདེ་གླིང་རིན་པོ་ཆེ་མཆོག ༸སྐྱབས་རྗེ་ཡོངས་འཛིན་གླིང་རིན་པོ་ཆེ་མཆོག  གནས་ཆུང་ཆོས་རྒྱལ་ཆེན་པོའི་སྐུ་རྟེན་མཆོག་སོགས་བོད་བརྒྱུད་ནང་བསྟན་གྱི་ཆོས་བརྒྱུད་ཆེན་པོ་བཞི་དང་། གཡུང་དྲུང་བོན། ༸རྒྱལ་བ་ཇོ་ནང་པ་བཅས་ཀྱི་སྐུ་ཚབ་བཅར་ཐུབ་པ་བྱུང་ཡོད་པ་མ་ཟད། སོག་པོ་རང་ནས་བོད་པའི་བླ་མ་དང་མཁན་པོ་སོགས་ཀྱང་ཆེད་བཅར་གྱིས་ཁྱོན་བོད་པའི་སྐུ་ཚབ་མཚོན་ཐུབ་མཁན་གྱི་མི་གྲངས་ ༡༥ ནས་ ༢༠ བར་བཅར་ཡོད་པ་བཅས། །