ཕྱི་ལོ་ ༢༠༡༩ ཟླ་ ༦ ཚེས་ ༡༩ རེས་གཟའ་ལྷག་པ།

༄༅། །ཕྱི་ལོ་ ༢༠༡༩ ཟླ་ ༦ ཚེས་ ༡༥ ཉིན་སྦར་སེལ་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་ཀྱིས་པེ་རི་སིའི་ཉེ་བའི་གྲོང་སྡེ་ Bois de Vincennes ལ་ཧི་མ་ལའི་དུས་སྟོན་ཐེངས་ ༡༩ པ་དབུ་འབྱེད་གནང་སྐབས། ཁོང་གིས་དུས་སྟོན་གྱི་ཐོག་མའི་དམིགས་ཡུལ་ནི་བོད་ཀྱི་ཆོས་དང་རིག་གཞུང་། སྐད་ཡིག བོད་ཀྱི་ལོ་རྒྱུས་སོགས་ཕ་རན་སིའི་མི་མང་གི་དོ་སྣང་ཡོང་བའི་ཆེད་དུ་ཡིན་པ་དང་། ད་ལོ་དུས་སྟོན་ཐེངས་ ༡༩ པ་སྲུང་བརྩི་ཞུས་བཞིན་ཡོད་སྟབས། ལོ་རྒྱུས་ཀྱི་བྱུང་བ་དང་ཡར་རྒྱས་ཀྱི་རིམ་པ་གལ་ཆེ་ཞིག་ལ་སླེབས་ཡོད་བཅས་གསུངས། 

དེ་ཡང་བཀའ་བརྒྱུད་རྫོང་ནས་༸གོང་ས་མཆོག་གི་༸སྐུ་པར་མཐོང་གྲོལ་རིན་པོ་ཆེ་བཞུགས་ཁྲིར་གདན་འདྲེན་ཞུས་གྲུབ་མཚམས་སྐུ་མགྲོན་རྣམ་པས་དཀར་གཙང་མཇལ་དར་ཕུལ། དེ་རྗེས་དགེ་འདུན་པ་རྣམ་པས་མཆོད་འབུལ་སྨོན་ལམ་དང་བསང་གསོལ་གནང་སྟེ་མཛད་སྒོ་དངོས་སུ་དབུ་འཛུགས་གནང་།

པེ་རི་སི་སྐུ་ཚབ་དོན་གཅོད་ཀྱི་བོད་ཁང་ནས་དུས་སྟོན་གོ་སྒྲིག་ཞུས་ཡོད་པ་དང་། དྲུང་ཆེ་རྣམ་རྒྱལ་བསམ་གྲུབ་ལགས་དང་འཇིགས་མེད་ལགས་གཉིས་ཀྱི་རྐང་འགན་བཞེས་པའི་ཐོག་དུས་སྟོན་ཉིན་གཉིས་རིང་སྲུང་བརྩི་ཞུས་ཡོད། དེ་ཡང་ཕྱི་ལོ་ ༢༠༡༩  ཟླ་ ༦ ཚེས་ ༡༤ རེས་གཟའ་པ་སངས་ཉིན་གྱི་དགོང་མོར་བོད་རང་དབང་གི་དགོང་ཚོགས་ཤིག་ཚོགས་ཡོད་པ་དེར་གཟིགས་མོ་བ་ ༢༠༠༠ ལྷག་མཉམ་ཞུགས་གནང་འདུག

ཉིན་གྲངས་གཉིས་རིང་གི་དུས་སྟོན་སྐབས་ནང་ཆོས་ངོ་སྤྲོད་དང་། རིག་གཞུང་འཁྲབ་སྟོན། བོད་ཀྱི་རོལ་དབྱངས། དཀྱིལ་འཁོར་བཅས་མང་ཚོགས་ལ་གཟིགས་འབུལ་ཞུས་པ་མ་ཟད། ལྷ་སའི་ཨབ་སོག་དང་འབྲོག་ཁྱི་སོགས་འགྲེམས་སྟོན་ཞུས་འདུག དེ་སྔ་ཕ་རན་སིའི་རི་རྩེ་ཨལྤ་ས་གནས་ཀྱི་གཡག་འགྲེམས་སྟོན་གནང་སྲོལ་ཡོད་པ་རེད། གཞན་ཡང་ཚོགས་སྡེ་ཁག་དང་། བོད་པའི་ཚོང་པ། ཟ་ཁང་བཅས་ནས་སོ་སོའི་ཅ་དངོས་དང་བོད་ཟས་ཚོང་འགྲེམས་ཞུས་ཡོད།

ལོ་ལྟར་བཞིན་དུས་སྟོན་ཚགས་ཚུད་དང་གྲུབ་འབྲས་ལྡན་པ་ཞིག་ཡོང་ཐུབ་པ་ནི་ཕ་རན་སིའི་བོད་རིགས་ཚོགས་པ་དང་། ཚོགས་སྡེ་ཁག ཚོང་པ། ཟ་ཁང་བདག་པོ་བཅས་ཀྱི་མཐུན་འགྱུར་ལ་བརྟེན་ནས་བྱུང་བ་ཞིག་ཡིན་པ་མ་ཟད། ལྷག་བསམ་ཅན་གྱི་དྭང་བླངས་རྣམ་པའི་མཐུན་འགྱུར་རོགས་ཕན་གནང་བ་ཉག་ཅིག་ལས་བྱུང་བ་ཞིག་ཡིན།