ཕྱི་ལོ་ ༢༠༡༩ ཟླ་ ༦ ཚེས་ ༢༤ རེས་གཟའ་ཟླ་བ།
༄༅། །འདི་གར་བོད་མིའི་སྒྲིག་འཛུགས་ནང་སྲིད་ལས་ཁུངས་ནས་བཏང་གནས་ནང་འཁོད་དོན། བོད་མིའི་སྒྲིག་འཛུགས་ཀྱི་ནང་སྲིད་བཀའ་བློན་འཁོར་ལྷ་ཚང་བསོད་ནམས་སྟོབས་རྒྱལ་མཆོག་ཀུམ་རའོ་གཞིས་ཆགས་ཀྱི་ཚོང་ཁང་གྲངས་ ༡༡ དབུ་འབྱེད་ཀྱི་མཛད་སྒོ་དང་འབྲེལ་ཉེ་ཁུལ་གྱི་ས་ཊོན་ཁམས་ཀཿཐོག་གཞིས་ཆགས་དང་། ཧར་པར་སྤུར་བོད་མིའི་གཞིས་ཆགས། ཁམས་གླིང་ཚང་བོད་མིའི་གཞིས་ཆགས། སྤོན་ཌ་ཆོལ་གསུམ་བོད་མིའི་གཞིས་ཆགས་བཅས་སུ་ཕྱི་ལོ་ ༢༠༡༩ ཟླ་ ༦ ཚེས་ ༡༨ ནས་ ༢༡ བར་གཞུང་འབྲེལ་ཕྱོགས་ཕེབས་གནང་ཡོད།
དེ་ཡང་ཀུམ་རའོ་བོད་མིའི་ས་གནས་འགོ་འཛིན་ལས་ཁུངས་ནས་གདན་ཞུ་ཕུལ་དོན་ལྟར། ནང་སྲིད་བཀའ་བློན་འཁོར་ལྷ་ཚང་བསོད་ནམས་སྟོབས་རྒྱལ་མཆོག་གིས་འདི་ཟླའི་ཚེས་ ༡༩ ཉིན་གྱི་སྔ་དྲོའི་ཆུ་ཚོད་ ༩ པའི་ཐོག་ཀུམ་རའོ་བོད་མིའི་གཞིས་ཆགས་ཀྱི་ཚོང་ཁག་ ༡༡ གསར་རྒྱག་གི་ལས་གཞི་ལེགས་གྲུབ་ཟིན་པའི་ཚོང་ཁང་དབུ་འབྱེད་ཀྱི་མཛད་སྒོའི་སྐུ་མགྲོན་གཙོ་བོར་ཕེབས་ཏེ་སྒོ་བྱང་དང་སྣང་གསལ་མར་མེ་ཞལ་འབྱེད་ཀྱི་སྒོ་ནས་མཛད་སྒོ་དབུ་འཛུགས་གནང་ཡོད།
མཛད་སྒོའི་ཐོག་ཀུམ་རའོ་ས་གནས་འགོ་འཛིན་དང་ཀུམ་རའོ་ས་གནས་འཐུས་ཚོགས་ཀྱི་ཚོགས་མི། ཀུམ་རའོ་སྒ་པ་ཚོགས་པའི་ཚོགས་གཙོ། ས་ཐོན་ཁམས་ཀཿཐོག་ས་གནས་འགོ་འཛིན་དང་ས་གནས་འཐུས་ཚོགས་ཀྱི་དྲུང་ཆེ། ས་གནས་རང་བདེན་ཚོགས་ཆུང་གི་ཚོགས་གཙོ། དེ་བཞིན་ས་གནས་ཀྱི་གནད་ཡོད་མི་སྣ་ཁག་དང་། མང་ཚོགས་བཅས་ཚང་འཛོམས་སར་ཀུམ་རའོ་ས་གནས་འགོ་འཛིན་གྱིས་ཚོང་ཁང་གསར་རྒྱག་གི་ལས་གཞི་དང་འབྲེལ་བའི་ལས་བསྡོམས་སྙིང་བསྡུས་ཤིག་སྙན་སྒྲོན་དང་སྦྲགས་ཚོང་ཁང་གྲངས་ ༡༡ ཆ་ཚང་ཀུམ་རའོ་སྒ་པ་བདེ་དོན་ཚོགས་པའི་ཚོགས་གཙོར་རྩིས་འབུལ་གནང་།
དེ་རྗེས་སྒ་པ་བདེ་དོན་ཚོགས་པའི་ཚོགས་གཙོས་ཀུམ་རའོ་ས་གནས་མང་ཚོགས་ཀྱི་འཚོ་རྟེན་ལ་ཕན་སླད་ཚོང་ཁང་གསར་རྒྱག་གི་ལས་གཞིའི་ཐད་ནང་སྲིད་ལས་ཁུངས་ནས་རོགས་དངུལ་གནང་བར་ཐུགས་རྗེ་ཆེ་ཞུ་དང་། ཚོང་ཁང་གསར་རྒྱག་གི་ལས་གཞི་དང་འབྲེལ་བའི་གཉིས་མོས་གན་ཡིག་ནང་གསལ་བཞིན་སྒ་པ་བདེ་དོན་ཚོགས་པ་ནས་ཚོང་ཁང་གི་ལོ་རེའི་ཡོང་འབབ་ཇི་བྱུང་ནས་བརྒྱ་ཆ་ ༣༥ ས་གནས་འགོ་འཛིན་ལས་ཁུངས་ཀྱི་རྒྱུན་གྲོན་སླད་འབུལ་རྒྱུ་ཡིན་པ་ནན་བརྗོད་ཀྱང་གནང་ཡོད། མཐར་ནང་སྲིད་བཀའ་བློན་མཆོག་གིས་མཛད་སྒོ་དང་འབྲེལ་བའི་གསུང་བཤད་གནང་དོན། ཀུམ་རའོ་སྒ་པ་བདེ་དོན་ཚོགས་པ་དང་ས་གནས་མི་མང་ནས་འབྲེལ་ཡོད་ས་གནས་འགོ་འཛིན་ལས་ཁུངས་བརྒྱུད་ཚོང་ཁང་གསར་རྒྱག་གི་ལས་གཞིའི་ཆེད་ནང་སྲིད་ནས་བཀའ་འཁྲོལ་ཐོག་རོགས་དངུལ་གནང་སྐྱོང་ཡོང་བའི་ཞུ་སྐུལ་སྔ་ཕྱིར་ཐེངས་མང་བྱུང་ཡོད་ཀྱང་། ནང་སྲིད་ལ་ཚོང་ཁང་གསར་རྒྱག་གི་ལས་གཞི་འདི་ནི་ས་གནས་ཀྱི་གནས་བབ་ལ་གཞིགས་ཏེ་ས་གནས་མང་ཚོགས་ཀྱི་འཚོ་རྟེན་ལ་ཕན་པའི་དཔལ་འབྱོར་ཁེ་ཕན་བསྐྲུན་ཐུབ་རྒྱུའི་ཐད་ཐེ་ཚོམ་ཡོད་པ་བཞིན་ས་གནས་ནས་དེའི་ཐད་འཕྲལ་ཕུགས་གཉིས་ཀར་ཁེ་ཕན་ཇི་ཡོད་ཐད་རྟོག་ཞིབ་དགོས་པར་བརྗོད་དེ་གནས་སྐབས་རིང་ཕྱིར་འགྱངས་ཞུས་ཡོད་ཀྱང་། ས་གནས་ནས་ལས་གཞི་འདི་ནི་ས་གནས་མང་ཚོགས་དང་ས་གནས་སྒ་པ་ཚོགས་པའི་དཔལ་འབྱོར་གྱི་ཡོང་འབབ་ལ་ཕན་ཐོགས་རྒྱ་ཆེ་ཡོད་སྐོར་གྱི་ཞུ་སྐུལ་ཡང་ཡང་བྱུང་ཡོད་པས་དེ་ལྟར་ས་གནས་མང་ཚོགས་ཀྱི་འཚོ་རྟེན་དང་ཚོགས་པའི་དཔལ་འབྱོར་ཐོག་ཕན་ཐོགས་ཡོད་པ་དངོས་ཡོད་ཡིན་ཚེ་རོགས་དངུལ་འབུལ་རྒྱུ་བྱས་ཡོད་པ་བཞིན་ད་ལན་ཚོང་ཁང་གསར་རྒྱག་གི་ལས་གཞི་ལེགས་གྲུབ་ཟིན་ཡོད་སྟབས། སླད་ཕྱིན་ཚོང་ཁང་དེ་དག་ལས་ཡོང་འབབ་གང་ལེགས་སྤེལ་སྐྲུན་གྱིས་ས་གནས་སུ་ཕན་ཐོགས་ཐུབ་པ་ཞིག་ཡོང་རྒྱུར་འབད་བརྩོན་བྱ་དགོས་སྐོར་གསུང་བཤད་གནང་།
མཛད་སྒོའི་ཐོག་ནང་སྲིད་བཀའ་བློན་མཆོག་གིས་ཚོང་ཁང་གསར་རྒྱག་གི་ལས་གཞིའི་ཨར་རྒྱག་བོགས་ལེན་པ་ཤར་དུར་ད་ཨན་དང་ཨར་རྒྱག་དོ་དམ་པ་སྐལ་བཟང་གཉིས་ལ་ཐུགས་རྗེ་ཆེ་ཞུའི་ཕྱག་རྟགས་ཀྱང་ཕུལ་གནང་ཡོད།
ཚོང་ཁང་གསར་རྒྱག་གི་མཛད་སྒོ་མཇུག་སྒྲིལ་རྗེས་དཔལ་ལྡན་བཀའ་ཤག་གི་བཀའ་འབྲེལ་ལྟར་ས་ཌོན་ཁམས་ཀཿཐོག་གཞིས་ཆགས་དང་ཧར་སྤུར་བོད་མིིའི་གཞིས་ཆགས། གླིང་ཚང་གཞིས་ཆགས་བཅས་དང་། དེ་ནས་ཕྱི་ཉིན་ཏེ་ཕྱི་ཚེས་ ༢༠ ཉིན་སྤུ་རུ་ཝ་ལ་ས་སྐྱ་གཞིས་ཆགས་དང་། སྤོན་ཌ་ཆོལ་གསུམ་གཞིས་ཆགས་དང་སཾ་བྷོ་ཊའི་སློབ་གྲྭ་བཅས་སུ་ཕྱོགས་ཕེབས་གནང་སྟེ་ས་གནས་སུ་འཚམས་གཟིགས་དང་། ས་གནས་མང་ཚོགས་དང་སློབ་ཕྲུག་ལྷན་ཐུག་འཕྲད་ཀྱིས་དཔལ་ལྡན་བཀའ་ཤག་གི་ལྔ་དང་ལྔ་བཅུའི་འཆར་སྣང་གི་གོ་དོན་དང་དགོས་དམིགས་ཀྱི་རྒྱབ་ལྗོངས་ཀྱི་གནས་སྟངས་གསལ་བཤད་དང་། ལྔ་དང་ལྔ་བཅུའི་འཆར་སྣང་མངོན་འགྱུར་ཐུབ་ཆེད་དུ་ས་གནས་ལས་གཞི་ཆེ་ཆུང་གང་སྤེལ་ཡང་རང་ཁ་རང་གསོའི་ཕྱོགས་སུ་བསྐྱོད་ཐུབ་ཐབས་དང་། ནང་སྲིད་ནས་ཞུ་སྐུལ་ཐེངས་མང་བྱས་པ་བརྒྱུད་རྒྱ་གར་དབུས་གཞུང་ནས་གཏན་ལ་འབེབས་གནང་པའི་བཙན་བྱོལ་བོད་མིར་མཐུན་རྐྱེན་སྦྱོར་བྱེད་ཕྱོགས་ཀྱི་ ༢༠༡༤ ནང་གསལ་གྱི་མཐུན་རྐྱེན་རྣམས་ཞུ་ལེན་ཐུབ་པ་དགོས་རྒྱུ།
དེ་བཞིན་ཕ་མ་རྣམས་ནས་དོན་མེད་དུ་དངུལ་གང་བྱུང་བེད་སྤྱོད་མ་གནང་བར་རང་ཉིད་ཀྱི་ཕྲུ་གུའི་ཤེས་ཡོན་ཐོག་འགྲོ་སོང་གཏོང་དགོས་ཇི་མཆིས་ལ་བཏང་ཐུབ་པ་བྱས་ཏེ་དེང་སང་བོད་ཕྲུག་ཤེས་ཡོན་དང་འཇོན་ཐང་ཅན་རེ་ཟུང་མཐོང་རྒྱུ་ཡོད་པ་བཞིན་འབྱུང་འགྱུར་ཡང་གང་མང་སྐྱེད་སྲིང་ཐུབ་ཐབས་སུ་འབད་རྩོན་གནང་དགོས་པ་དང་། ལྷག་དོན་དུ་བོད་མིའི་བཟང་སྤྱོད་མ་དོར་བའི་སྒོ་ནས་བོད་མི་ནང་ཁུལ་འཆམ་མཐུན་རྒྱུན་གནས་ཐུབ་ཐབས་སུ་འབད་རྩོན་གནང་དགོས་རྒྱུ་དང་།
མཐར་ང་ཚོས་སྤྱི་ནོར་༸གོང་ས་༸སྐྱབས་མགོན་ཐམས་ཅད་མཁྱེན་པ་མཆོག་ཐུགས་དགྱེས་པ་ཞིག་ཡོང་བའི་ལས་བཟང་པོ་ཞིག་སྤེལ་དཀའ་ནའང་ཐུགས་མ་ཕམ་པ་ཞིག་བྱ་ཐུབ་ངེས་ཡིན་པས་དེའི་ཐད་ཚང་མས་ཐུགས་སྣང་ཆེར་བསྐྱེད་དགོས་པའི་གསུང་བཤད་གནང་སྟེ། ཕྱི་ཚེས་ ༢༡ ཉིན་ཕྱིར་བཞུགས་སྒར་རྡ་སར་ཕེབས་གནང་ཡོད་པ་བཅས། །
