ཕྱི་ལོ་ ༢༠༡༩ ཟླ་ ༦ ཚེས་ ༢༧ རེས་གཟའ་ཕུར་བུ།
༄༅། །ཨིན་ཡུལ་གྱི་གྲོས་ཚོགས་འོག་མའི་ནང་གྲོས་ཚོགས་བགྲོ་གླེང་འཚོགས་བཞིན་པའི་སྐབས་དང་བསྟུན། ཨིན་ཡུལ་གྱི་གྲོས་ཚོགས་འོག་མའི་ཚོགས་གཙོ་འཇོན་བྷར་ཁའོ་John Bercow མཆོག་གིས་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་ལ་ཨིན་ཡུལ་གྱི་གྲོས་ཚོགས་འོག་མའི་ནང་ཕེབས་བསུའི་སྣེ་ལེན་ཞུས་ཡོད་པ་དང་། སྐབས་དེར་ཨིན་ཡུལ་གྱི་གྲོས་ཚོགས་འོག་མའི་ཚོགས་གཙོ་མཆོག་གིས། འགྲོ་བ་མིའི་ཐོབ་ཐང་གི་གནད་དོན་ཐོག་ཐུགས་འཚབ་ཧ་ཅང་གཞི་རྒྱ་ཆེན་པོ་གནང་བཞིན་པའི་སྐབས་འདིར། ལས་རོགས་རྣམ་པས་བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་གྲོས་ཚོགས་ར་བའི་ནང་ཕེབས་བསུ་ཞུ་རྒྱུར་ཏན་ཏན་དགའ་མོས་གནང་གི་རེད། དོན་དངོས་སུ་སྲིད་སྐྱོང་མཆོག་ད་ལྟ་གྲོས་ཚོགས་ར་བའི་ནང་ཕེབས་ཡོད་པ་དང་། ཁོང་ལ་ཕེབས་བསུ་ཞུ་འོས་པ་ཞིག་རེད།
བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེངྒེ་མཆོག་དེ་སྔ་གྲོས་ཚོགས་འོག་མའི་ནང་ཕེབས་མྱོང་ཡོད་ལ། དེ་རིང་སླར་ཡང་སྲིད་སྐྱོང་མཆོག་གྲོས་ཚོགས་ར་བའི་ནང་ཕེབས་ཡོད། སྲིད་སྐྱོང་མཆོག་ནི་བོད་མིའི་ངོ་བོ་མཚོན་ཐུབ་པའི་མི་སྣ་གལ་འགངས་ཅན་ཞིག་ཡིན། སྲིད་སྐྱོང་ལགས། ང་ཚོས་ཀྱང་སྐུ་ཉིད་ལ་ངོས་འཛིན་དེ་ལྟར་ཞུ་བཞིན་ཡོད། སྲིད་སྐྱོང་མཆོག་སླར་ཡང་ཐུག་འཕྲད་བྱུང་བ་དགའ་པོ་བྱུང་། ལས་རོགས་རྣམ་པ་ཚོས་ཀྱང་དེ་ལྟར་དགའ་མོས་གནང་གི་རེད་བསམ་གྱི་འདུག་ཅེས་དང་།
གཞན་ཡང་ཕྱིའི་གནོན་ཤུགས་ཧ་ཅང་ཡོད་ཀྱང་སྲིད་སྐྱོང་མཆོག་གིས་གལ་ཆེའི་ལས་དོན་མུ་མཐུད་མཇུག་སྐྱོང་གནང་རོགས། ཞེས་གྲོས་ཚོགས་འོག་མའི་ཚོགས་གཙོ་མཆོག་གིས་གསུངས།
ཨིན་ཡུལ་གྱི་གྲོས་ཚོགས་འོག་མའི་ཚོགས་གཙོ་འཇོན་བྷར་ཁའོ་མཆོག་གིས་ཕྱི་ལོ་ ༢༠༡༦ ལོ་ལའང་དཔལ་ལྡན་སྲིད་སྐྱོང་མཆོག་ལ་གྲོས་ཚོགས་སུ་ཕེབས་བསུའི་སྣེ་ལེན་ཞུས་མྱོང་ཡོད། དཔལ་ལྡན་སྲིད་སྐྱོང་མཆོག་གིས་ཨིན་ཡུལ་གྱི་གྲོས་ཚོགས་འོག་མའི་གྲོས་ཚོགས་བགྲོ་གླེང་ལས་རིམ་ལ་གཟིགས་ཞིབ་གནང་ཡོད་པ་བཅས། །
