༢༠༡༩ ཟླ་ ༦ ཚེས་ ༢༦ རེས་གཟའ་ལྷག་པ།
༄༅། །ཕྱི་ལོ་ ༢༠༡༩ ཟླ་ ༦ ཚེས་ ༢༥ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་སི་ཀོཌ་ལེན་ཡུལ་གྱི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་མི་རྣམས་ལ་བོད་དོན་རྒྱབ་སྐྱོར་མུ་མཐུད་རྒྱུན་སྐྱོང་དགོས་པའི་འབོད་སྐུལ་ཞུས་འདུག
དེ་ཡང་གྲོས་ཚོགས་ཀྱི་ཚོགས་ཁང་ནང་དུ། གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་ལྕམ་སྐུ་ལིན་ཌ་ཕོ་བྷི་ཡ་ནི་ Linda Fabiani མཆོག་དང་། ལྗང་ཁུ་ཚོགས་པའི་གྲོས་ཚོགས་འཐུས་མི་ལྕམ་སྐུ་རོ་སི་གྷི་རིར་ Ross Greer མཆོག་གིས་དཔལ་ལྡན་སྲིད་སྐྱོང་མཆོག་ལ་གསོལ་ཚིགས་ཕུལ་རྗེས། དཔལ་ལྡན་སྲིད་སྐྱོང་མཆོག་གིས་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་མི་རྣམས་དང་མཇལ་འཕྲད་གནང་འདུག སྐབས་དེར་དཔལ་ལྡན་སྲིད་སྐྱོང་མཆོག་གིས་ཡུལ་དེའི་རྒྱལ་ཡོངས་ཆབ་སྲིད་ཚོགས་པ་ Scottish National Party དང་། ལྗང་ཁུ་ཚོགས་པ་Scottish Green Party བཅས་གྲོས་ཚོགས་ཀྱི་ཆབ་སྲིད་ཚོགས་པ་གཉིས་ཀྱི་འཐུས་མི་རྣམས་དང་མཇལ་འཕྲད་གནང་འདུག་པ་མ་ཟད། གྲོས་ཚོགས་ཀྱི་འཐུས་མི་སྐུ་བགྲེས་ཤོས་གསུམ་དང་མཇལ་འཕྲད་གནང་འདུག
མཇལ་འཕྲད་དེ་དག་སྐབས་དཔལ་ལྡན་སྲིད་སྐྱོང་མཆོག་གིས་ཡུལ་དེར་ཆེས་ཐོག་མ་བཅར་རྒྱུ་བྱུང་བ་མ་ཟད། གྲོས་ཚོགས་འཐུས་མི་རྣམ་པ་དང་མཇལ་འཕྲད་བྱུང་བར་དགའ་པོ་བྱུང་སྐོར་དང་། བོད་དོན་ཐོག་ད་བར་རྒྱབ་སྐྱོར་གནང་བར་ཡི་རངས་བསྔགས་བརྗོད་དང་སྦྲགས། ཐུགས་རྗེ་ཆེ་ཞུས་པ་བརྒྱུད་སླད་ཀྱང་མུ་མཐུད་རྒྱབ་སྐྱོར་གནང་སྐྱོང་ཡོང་བའི་འབོད་སྐུལ་ཡང་ཞུས་འདུག ལྷག་པར་གྲོས་ཚོགས་འཐུས་མི་རྣམ་པ་འབྱུང་འགྱུར་བཞུགས་སྒར་རྡ་རམ་ས་ལར་ཕེབས་རོགས་ཞེས་མགྲོན་འབོད་ཞུས་འདུག
བོད་མཐོ་སྒང་གི་ཁོར་ཡུག་འགྱུར་ལྡོག་གིས་ཤུགས་རྐྱེན་ལ་བརྟེན་ནས་འབྲེལ་ཡོད་ཨེ་ཤི་ཡའི་ས་ཁུལ་ཁག་གཅིག་གི་ཆར་དུས་ནམ་ཤར་མིན་ཐག་གཅོད་བྱེད་བཞིན་ཡོད་པ་མ་ཟད། གོ་ལ་ཁྱོན་དུའང་གནམ་གཤིས་འགྱུར་ལྡོག་ཐད་ཤུགས་རྐྱེན་ཧ་ཅང་ཡོད་སྟབས། བོད་མཐོ་སྒང་གི་འཇིག་སླ་བའི་ཁོར་ཡུག་སྲུང་སྐྱོབ་ཐད་ཛ་དྲག་ལས་འགུལ་སྤེལ་དགོས་པའི་འབོད་སྐུལ་ཞུས་འདུག
ཕྱེད་ཡོལ་གྲོས་ཚོགས་བོད་དོན་རྒྱབ་སྐྱོར་ཚོགས་ཆེན་ཐོག་དཔལ་ལྡན་སྲིད་སྐྱོང་མཆོག་གིས། གྲོས་ཚོགས་འཐུས་མི་རྣམ་པས་ད་བར་ལྷག་བསམ་ཟོལ་མེད་ཐོག་ནས་བོད་དོན་ཐོག་རྒྱབ་སྐྱོར་ཧ་ཅང་གནང་དང་གནང་བཞིན་པ་དེ་དག་ལ་ཐུགས་རྗེ་ཆེ་ཞུ་རྒྱུ་མ་གཏོགས་གཞན་དྲིན་ལན་གསབ་ཐབས་བྲལ་བ་དང་། ལྷག་པར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དུས་དང་རྣམ་པ་ཀུན་ཏུ་བོད་ཀྱི་གྲོགས་པོ་རྙིང་པ་རྣམས་དང་འབྲེལ་ལམ་རྒྱུན་སྐྱོང་ཐོག་ནས་གྲོགས་པོ་གསར་པ་བཟོ་དགོས་པའི་ལམ་སྟོན་བཀའ་སློབ་ཕེབས་པ་ལྟར། འབད་བརྩོན་ཞུ་གང་ཐུབ་བྱེད་བཞིན་ཡོད་སྐོར་གསུངས། གཞན་ཡང་དཔལ་ལྡན་སྲིད་སྐྱོང་མཆོག་གིས་དེང་སྐབས་རྒྱ་ནག་དམར་པོའི་སྟོབས་ཤུགས་དེ་དག་འཛམ་གླིང་སྤྱི་དང་། ལྷག་པར་ཨོ་གླིང་ནང་རྒྱ་ཁྱབ་ཏུ་འཕེལ་བཞིན་ཡོད་པར་བརྟེན་ཨིན་ཇིའི་གཞུང་ནས་ཀྱང་དེར་དོགས་ཟོན་དགོས་པའི་ཉེན་བརྡའང་བཏང་འདུག
དེ་བཞིན་རྒྱ་ནག་གཞུང་གིས་ཕྱི་ལོ་ ༡༩༥༠ ནས་ ༡༩༦༠ བར་བོད་ཀྱི་དགོན་སྡེ་བརྒྱ་ཆ་ ༩༨ གཏོར་བཤིག་བཏང་ཡོད་ཀྱང་། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེའི་བཀའ་དྲིན་ཉག་གཅིག་ལ་བརྟེན་ནས་བཙན་བྱོལ་ནང་དུའང་བོད་ཀྱི་ཆོས་རིག་འཛིན་སྐྱོང་སྤེལ་གསུམ་ཧྲ་ཏག་ཏག་གནང་བཞིན་ཡོད་པ་དང་། ལྷག་པར་དེང་སྐབས་རྒྱལ་སྤྱིའི་ཁྱོན་དུ་བོད་བརྒྱུད་ནང་བསྟན་ལ་དོ་སྣང་སྔར་བའི་ཤུགས་ཤུགས་ཆེ་རུ་འགྲོ་བཞིན་པ་ནི་བོད་མིར་རྒྱལ་ཁ་ཐོབ་པ་ཞིག་ཡིན་སྐོར་གསུངས། གསུང་བཤད་གྲུབ་མཚམས་དྲི་བ་ཁག་ལ་ལན་འདེབས་གསལ་བཤད་ཞིབ་རྒྱས་གནང་འདུག
སྐབས་དེར་དཔལ་ལྡན་སྲིད་སྐྱོང་མཆོག་གིས་ཨིན་ཡུལ་སྲིད་གཞུང་ངོས་ནས་བོད་དོན་རྒྱབ་སྐྱོར་དེ་སྔ་ལས་ཤུགས་ཆེ་རུ་ཕྱིན་ཡོད་པ་དང་། སི་ཀོཌ་ལེན་ཡུལ་གྱི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་མི་རྣམས་ཀྱིས་གྲོས་ཚོགས་ནང་གཉིས་སྨན་དབུ་མའི་ལམ་ལ་རྒྱབ་སྐྱོར་གནང་ཐོག རྒྱ་ནག་གཞུང་གིས་སྲིད་བྱུས་དེ་གཞིར་བཟུང་བོད་ཀྱི་གནད་དོན་འཚེ་མེད་ཞི་བ་གྲོས་མོལ་གྱི་ལམ་ནས་གསལ་དགོས་པ་གྲོས་ཚོགས་ནང་གྲོས་ཆོད་འདོན་དགོས་པའི་རེ་འདུན་ཤུགས་ཆེ་བཏོན་འདུག ལྷག་པར་བཙན་བྱོལ་བོད་མིའི་མང་གཙོའི་སྒྲིག་འཛུགས་ཡང་དག་པ་དེར་སི་ཀོཌ་ལེན་ཡུལ་གྱི་གྲོས་ཚོགས་ནས་ངོས་འཛིན་གནང་ཆེད་གྲོས་ཚོགས་ནང་གྲོས་ཆོད་འཇོག་ཐབས་གནང་དགོས་པའི་འབོད་སྐུལ་ཤུགས་ཆེ་ཞུས་འདུག
མཐར་གྲོས་ཚོགས་འཐུས་མི་རྣམས་ནས་དཔལ་ལྡན་སྲིད་སྐྱོང་མཆོག་ལ་ཐུགས་རྗེ་ཆེ་ཞུའི་ཕྱག་རྟགས་ཕུལ་འདུག ཕྱི་ཚེས་ ༢༦ ཉིན་དཔལ་ལྡན་སྲིད་སྐྱོང་མཆོག་སླར་ཡང་ཨིན་ཡུལ་རྒྱལ་ས་ལོན་ཌོན་དུ་ཕེབས་རྒྱུ་དང་། གྲོས་ཚོགས་འཐུས་མི་རྣམས་ལ། བོད་ཀྱི་ཉམས་མྱོང་གཞི་ལ་བཞག་ནས། དེང་སྐབས་ཡུ་རོབ་ཁུལ་དུ་རྒྱབ་ནག་གི་ས་བབ་ཆབ་སྲིད་ཀྱི་ཤུགས་རྐྱེན་ལ་དཔྱད་པ། ཞེས་པའི་བརྗོད་གཞིའི་ཐོག་གསུང་བཤད་གནང་གཏན་འཁེལ་འདུག དེ་ཉིན་གསར་འགོད་པའི་བཅར་འདྲི་དང་ལེན་ཡང་གནང་རྒྱུ་ཡིན་འདུག་པ་བཅས། །
