ཕྱི་ལོ་ ༢༠༡༩ ཟླ་ ༦ ཚེས་ ༢༡ རེས་གཟའ་པ་སངས། 

༄༅། །ཕྱི་ལ་ོ ༢༠༡༩ ཟླ་ ༦ ཚེས་ ༡༩ རེས་གཟའ་པ་སངས་ཉིན་ཨིན་ཇིའི་རྒྱལ་ས་ལོན་ཌོན་དུ་རྟེན་གཞི་བྱས་པའི་ཨིན་ཡུལ་བོད་ཀྱི་ཐེབས་རྩའི་ Tibet House Trust གོ་སྒྲིག་འོག་བོད་ཀྱི་ཐེབས་རྩ་དབུ་བརྙེས་ནས་ལོ་ངོ་ ༢༥ ཧྲིལ་པོ་འཁོར་བའི་དུས་དྲན་ཐོག་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེདྒེ་མཆོག་ཆེད་ཕེབས་ཀྱིས་ཨིན་ཡུལ་དུ་རྟེན་གཞི་བྱས་པའི་བཙན་བྱོལ་བོད་མི་རྣམས་ལ་མཐུན་འགྱུར་གནང་བཞིན་པའི་རོགས་ཚོགས་ཁག་གི་ཚོགས་མི་དང་ལྷན་ཐུག་འཕྲད་གནང་ཡོད།

སྐབས་དེར་དཔལ་ལྡན་སྲིད་སྐྱོང་མཆོག་གིས་ད་བར་རོགས་ཚོགས་ཁག་ནས་བཙན་བྱོལ་བོད་མིའི་ཤེས་ཡོན་དང་འཕྲོད་བསྟེན། སྤྱི་ཚོགས་ཡར་རྒྱས་ཆེད་མཐུན་འགྱུར་རོགས་རམ་རྒྱ་ཆེ་གནང་བར་ཐུགས་རྗེ་ཆེ་ཞུས་ཡོད། དུས་དྲན་སྲུང་བརྩི་ཞུ་དགོས་དོན་གཙོ་བོ་ནི། ཚོགས་པ་ཁག་འདྲ་མིན་དབར་འབྲེལ་བ་དམ་ཟབ་བསྐྲུན་རྒྱུའི་སླད་ཡིན་འདུག 

ཕྱོགས་མཚུངས་ཨིན་ཡུལ་སྐུ་ཚབ་དོན་གཅོད་ཁང་དང་སྦིར་ཊེན་བོད་རིགས་ཚོགས་པ་ཟུང་འབྲེལ་གྱི་གོ་སྒྲིག་འོག་དཔལ་ལྡན་སྲིད་སྐྱོང་མཆོག་གིས་བོད་རིགས་གཞོན་སྐྱེས་རྣམས་ལ་བོད་ཀྱི་གནད་དོན་ཆེད་བོད་མི་གཞོན་སྐྱེས་རྣམས་ནས་སེམས་ཤུགས་ལྡན་པའི་ངང་ནས་མཉམ་ཞུགས་དགོས་རྒྱུ་ཧ་ཅང་གལ་ཆེན་པོ་ཡིན་སྐོར་དང་། གནས་ཡུལ་རྒྱལ་ཁབ་ཁག་གི་ཡུལ་མི་དང་ལྷན་དུ་འབྲེལ་བ་དམ་ཟབ་དང་མཐུན་སྒྲིལ་དགོས་རྒྱུ་ཧ་ཅང་གལ་ཆེན་པོ་ཡིན་ཀྱང་སོ་སོའི་མི་རིགས་ཀྱི་ངོ་བོ་ནམ་ཡང་བརྗེད་རྒྱུ་མེད། ཅེས་དང་། 

གཞན་ཡང་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་གོ་སྒྲིག་འོག་རྡ་སར་ལྔ་དང་ལྔ་བཅུའི་གཞོན་སྐྱེས་ཚོགས་འདུ་ཐེངས་གཉིས་པ་འཚོོགས་རྒྱུ་ཡིན་སྟབས། ཨིན་ཡུལ་དུ་གནས་སྡོད་བོད་མི་གཞོན་སྐྱེས་རྣམས་ནས་མཉམ་ཞུགས་བྱེད་དགོས་སྐོར་དང་། བོད་མི་གཞོན་སྐྱེས་རྣམས་ནས་སོ་སོའི་ཤེས་འཇོན་གྱི་ཐོག་ནས་བོད་དོན་ཐད་ཞབས་འདེགས་ཞུ་རྒྱུ་གལ་ཆེན་པོ་ཡིན་སྐོར་སོགས་ཀྱི་གསུང་བཤད་གནང་། 

ཕྱི་ཚེས་ ༢༠ ཉིན་ Financial Times ཞེས་པའི་གསར་ཁང་ནས་དཔལ་ལྡན་སྲིད་སྐྱོང་མཆོག་ལ་༸རྒྱལ་བའི་ཡང་སྲིད་སྐོར་དང་། རྒྱ་ནག་གཞུང་ནས་འགྲོ་བ་མིའི་ཐོབ་ཐང་སྲུང་སྐྱོབ་སླད་འགན་ཇི་ཡོད། བརྒྱུད་ཅིག་ལམ་གཅིག་སོགས་ཀྱི་སྐོར་བཅར་འདྲི་གནང་། 

དེ་ནས་ཨིན་ཡུལ་བོད་དོན་རྒྱབ་སྐྱོར་བ་དང་ལྷན་ཐུག་འཕྲད་ཀྱིས་གྷོ་གྷལ་ནས་རྒྱ་ནག་གཞུང་དང་མཉམ་འབྲེལ་གྱི་ལས་གཞི་ Google Dragonfly campaign དེ་བཞིན་ཕྱིར་འཐེན་བྱེད་ཡོད་སྐོར་སོགས་ལ་གོ་བསྡུར་གླེང་སློང་གནང་རྗེས་ཨིན་ཡུལ་དུ་ཡོད་པའི་གཙུག་ལག་སློབ་གཉེར་ཁང་གི་སློབ་དཔོན་དང་། རྒྱ་མི་མཁས་པ་ཁག་གཅིག་དང་ལྷན་དུ་བོད་རྒྱ་དཀའ་རྙོག་སེལ་སླད་བོད་རྒྱ་གྲོས་མོལ་སླར་གསོ་དགོས་རྒྱུའི་གནད་དོན་ཐད་བཞུགས་མོལ་ཚོགས་འདུ་ཞིག་བསྐོོང་ཚོགས་གནང་ཡོད། 

དེ་རྗེས་དཔལ་ལྡན་སྲིད་སྐྱོང་མཆོག་བོད་ཀྱི་ཐེབས་རྩའི་གོ་སྒྲིག་འོག་དགོང་མོའི་གསོལ་ཚིགས་སྟབས་བདེ་ཐོག་ཆེད་ཕེབས་ཀྱི་རོགས་ཚོགས་རྣམས་ལ་སླར་ཡང་ཐུགས་རྗེ་ཆེ་ཞུས་ཡོད་པ་བཅས། །