ཕྱི་ལོ་ ༢༠༡༩ ཟླ་ ༦ ཚེས་ ༢༦ རེས་གཟའ་ལྷག་པ།
༄༅། །ཕྱི་ལོ་ ༢༠༡༩ ཟླ་ ༦ ཚེས་ ༧ རེས་གཟའ་པ་སངས་ཉིན་བཞུགས་སྒར་༸རྒྱལ་བའི་ཕོ་བྲང་དུ། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས། ཨི་རན་ Iran ཡུལ་གྱི་སྒེར་གྱི་ཚོང་དོན་སྒྲིག་འཛུགས་ཀྱི་འགན་འཛིན་མི་གྲངས་ལྔ་བཅུ་ང་བརྒྱད་ལ་བཀའ་སློབ་སྩལ་དོན།
ཨི་རན་ནས་ཕེབས་མཁན་ཁྱེད་རྣམ་པ་ཐུག་པར་ངོས་རང་ཧ་ཅང་དགའ་པོ་བྱུང་། འགའ་རེས་ཨི་རན་ཡུལ་མིར་དོགས་ཟོན་བྱེད་ཀྱི་འདུག འོན་ཀྱང་བོད་མིར་མཚོན་ན་དུས་རབས་བདུན་པ་ཆོས་རྒྱལ་སྲོང་བཙན་སྒམ་པོའི་སྐུ་དུས་ནས་པར་ཤི་ཡ་དང་འབྲེལ་བ་ཡོད། པར་ཤི་ཡ་ནས་ཡིན་པ་ཚོ་འབྱོར་ལྡན་དང་སོག་པོ་ཚོ་དམག་ལ་དགའ་པོ་ཡོད་པར་བརྩི་སྲོལ་ཡོད། ངོས་ལ་འགན་ཁུར་ཁག་གཅིག་ཡོད། འཛམ་གླིང་མི་འབོར་ཐེར་འབུམ་བདུན་ཡོད་པ་ཚང་མས་མི་ཚེ་བདེ་སྐྱིད་ལྡན་པ་ཞིག་འདོད་པ་ལྟར། ངོས་རང་ཡང་དེ་མཚུངས་མི་ཞིག་རེད། མི་ཚེ་བདེ་སྐྱིད་ལྡན་པ་ཞིག་ཡོང་བར་བསམ་བློ་ཞི་བདེ་བག་ཕེབས་དགོས། དེ་ཡོང་བར་བྱམས་བརྩེའི་ཉམས་ལེན་བྱེད་དགོས་པའི་བསླབ་བྱ་དེ་ངོས་ཀྱིས་གཞན་ལ་རྒྱུས་སྟོན་བྱེད་ཀྱི་ཡོད། ལས་སླ་པོའི་ཐོག་ནས་བཤད་ན། བསམ་པ་བཟང་པོ་བྱས་ནས་བདེ་སྐྱིད་ཡོང་གི་རེད།
![His Holiness the Dalai Lama addressing members of a group from Iran during their meeting at his residence in Dharamsala, HP, India on June 7, 2019. Photo by Tenzin Choejor His Holiness the Dalai Lama addressing members of a group from Iran during their meeting at his residence in Dharamsala, HP, India on June 7, 2019. Photo by Tenzin Choejor](https://www.dalailama.com/assets/news-articles/2019-06-07-Dharamsala-N02-A7306754.jpg)
གཉིས་ནས་ངོས་རང་ནང་པའི་དགེ་སློང་ཞིག་རེད། དེར་བརྟེན་ཆོས་ལུགས་ནང་ཁུལ་མཐུན་སྒྲིལ་གོང་འཕེལ་གཏོང་རྒྱུ་དེ་ངོས་ཀྱི་བཟང་སྤྱོད་ཀྱི་འགན་རེད། ལྟ་གྲུབ་ཐོག་ནས་ཆོས་ལུགས་ནང་ཕན་ཚུན་མི་མཐུན་པ་འདྲ་མིན་སྣ་ཚོགས་ཡོད། འོན་ཀྱང་ཆོས་ལུགས་ཚང་མས་བྱམས་བརྩེའི་ཉམས་ལེན་གལ་ཆེ་ཡིན་པ་གཅིག་གྲགས་རེད། ཆོས་ལུགས་མཐུན་སྒྲིལ་ཡོང་ཐུབ་རྒྱུར་ངོས་ལ་ཡིད་ཆེས་གཙང་མ་ཡོད། རྒྱ་གར་ལ་གཟིགས་དང་། ལོ་ངོ་སྟོང་ཕྲག་རིང་ནས་ཆོས་ལུགས་འདྲ་མིན་མཐུན་འབྲེལ་རྒྱུན་སྐྱོང་ཐོག་མཉམ་གནས་བྱེད་བཞིན་ཡོད།
ངོས་རང་ཆོས་ལུགས་མཐུན་སྒྲིལ་གོང་འཕེལ་ལ་གཙིགས་ཆེར་འཛིན་བཞིན་ཡོད་སྟབས། ཆོས་ལུགས་གཞན་གྱི་མི་སྣ་ཚོ་དང་ཐུག་སྐབས་དགའ་པོ་ཡོང་བཞིན་འདུག དེར་བརྟེན་དེ་རིང་འདིར་ཁ་ཆེའི་ཆོས་ལུགས་ནང་གི་ཤི་ཡ་ Shia ཆོས་ལུགས་ཀྱི་མཆེད་གྲོགས་ཕོ་མོ་ཚོ་དང་ཐུག་རྒྱུ་བྱུང་བར་ངོས་ལ་དོན་དམ་གྱི་ཆེ་མཐོང་ཐོབ་པ་ཞིག་བྱུང་། དེང་སྐབས་ཨི་ཇིབ་ Egypt ཡིན་ནའང་རེད། སྦར་མ་ Burma དང་ཨབ་གྷ་ནི་སི་ཐན་ Afghanistan ནང་དུ་ཡིན་ནའང་རེད། ཆོས་ཀྱི་མིང་འོག་ནས་མི་གསོད་ཁྲག་སྦྱོར་བྱེད་བཞིན་པ་དེ་དག་མཐོང་སྐབས་བློ་ཡུལ་ནང་གཤོང་དཀའ་བ་ཞིག་འདུག
བདུན་ཕྲག་རྗེས་མའི་ནང་ངོས་རང་ལྡི་ལིར་ཁ་ཆེའི་ཆོས་ལུགས་ནང་ཁུལ་མཐུན་སྒྲིལ་དགོས་པའི་ཚོགས་ཆེན་ཐོག་འགྲོ་རྒྱུ་ཡིན། རྒྱ་གར་ནང་གི་སུན་ནི་Sunnis དང་ཤི་ཡ་ Shias འཁྲུག་པ་བརྒྱབ་འདུག་ཟེར་བ་ཞིག་ངོས་ཀྱིས་ནམ་ཡང་གོ་མྱོང་མེད། དེར་བརྟེན་ངོས་ཀྱི་ལ་དྭགས་ཁ་ཆེའི་གྲོགས་པོ་ཚོར་ཁ་ཆེའི་ཆོས་ལུགས་ནང་ཁུལ་མཐུན་སྒྲིལ་གོང་མཐོར་གཏོང་རྒྱུའི་ལས་གཞིའི་ཐོག་ཏོག་ཙམ་ཤུགས་བརྒྱག་ཐུབ་ན། ཞེས་བརྒྱུད་སྐུལ་བྱས་པ་ཡིན། ངོས་རང་ཆོས་ལུགས་གཞན་གྱི་མི་སྣ་སུ་དང་ཐུག་སྐབས། གཞི་རྩའི་ང་ཚོ་ཚང་མ་འགྲོ་བ་མི་རིགས་གཅིག་གྱུར་རེད་བསམ་པ་དྲན་གྱི་འདུག ངོས་རང་སྐྱེས་ཡུལ་གྱི་ས་གནས་ལ་མཚོན་ན་ང་ཚོའི་གྲོང་པ་ཁ་ཆེ་བ་རེད། ངོས་རང་བྱིས་པའི་སྐབས་ཁ་ཆེའི་ཕྲུ་གུ་ཚོ་དང་ལྷན་རྩེད་འཇོར་རོལ་བ་མ་གཏོགས། གཞན་དེ་ཁ་ཆེ་ཡིན་བསམ་པའི་ཚོར་སྣང་རྩ་བ་ནས་མེད།
ཕྱིས་སུ་ངོས་རང་ལྷ་སར་འབྱོར་སྐབས་ལྷ་སའི་ནང་དུའང་ཁ་ཆེའི་ནང་མི་ཉུང་ཤས་ཤིག་ཡོད་པ་ཤེས་རྟོགས་བྱུང་། ཁོང་རྣམས་༸རྒྱལ་དབང་༸སྐུ་ཕྲེང་ལྔ་པའི་སྐབས་ནས་ཡོད་འདུག ༸རྒྱལ་མཆོག་ལྔ་པ་ཆེན་པོས་ཁ་ཆེ་བ་ཚོར་ས་ཆ་གསོལ་སྩལ་མཛད་སྟབས། ཁ་ཆེའི་ལྷ་ཁང་བཞེངས་འདུག འོན་ཀྱང་ས་གནས་བོད་མི་ནང་པ་དང་ཁ་ཆེའི་དབར་འཁྲུག་རྩོད་བྱུང་བའི་གནས་ཚུལ་རྩ་བ་ནས་གོ་ཐོས་མེད། ཁ་ཆེ་བ་ཚོས་ཁ་ལག་ཞིམ་པོ་བཟོ་བ་མ་ཟད། དབུས་སྐད་དྭངས་མ་རྒྱག་གི་རེད། ད་ཐེངས་ལྡི་ལིར་ལྷན་ཚོགས་དེར་ཁ་ཆེའི་གཞུང་ཚབ་ཁང་འདྲ་མིན་ནས་སྐུ་ཚབ་འཐུས་མི་གང་མང་མཉམ་ཞུགས་ཐུབ་རྒྱུའི་རེ་བ་ཞུ་བཞིན་ཡོད། ཆོས་ལུགས་མཐུན་སྒྲིལ་གོང་མཐོར་གཏོང་རྒྱུའི་གོ་སྐབས་བཟང་པོ་ཞིག་མཐོང་གི་འདུག ཅེས་བཀའ་སློབ་སྩལ་རྗེས་ཚོགས་བཅར་བའི་དྲི་བར་བཀའ་ལན་སྩལ་འདུག
![His Holiness the Dalai Lama signing one of his books to present to members of a group from Iran at the conclusion of their meeting at his residence in Dharamsala, HP, India on June 7, 2019. Photo by Tenzin Choejor His Holiness the Dalai Lama signing one of his books to present to members of a group from Iran at the conclusion of their meeting at his residence in Dharamsala, HP, India on June 7, 2019. Photo by Tenzin Choejor](https://www.dalailama.com/assets/news-articles/2019-06-07-Dharamsala-N05-DSC03462.jpg)