ཕྱི་ལོ་ ༢༠༡༩ ཟླ་ ༥ ཚེས་ ༢ རེས་གཟའ་ཕུར་བུ།
༄༅། །ཕྱི་ལོ་ ༢༠༡༩ ཟླ་ ༥ ཚེས་ ༢ ཉིན་ཨིན་ཡུལ་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ཊིམ་ལུབ་ཊོན་ Tim Loughton མཆོག་དང་གྲོས་ཚོགས་འཐུས་མི་ལྕམ་སྐུ་པེ་ནི་ Penny Mordaunt མཆོག་གིས་ཨིན་ཡུལ་གྲོས་ཚོགས་འོག་མའི་ནང་བོད་ཀྱི་གནད་དོན་སྐོར་གླེང་གནང་འདུག
དེ་ཡང་ཨིན་ཡུལ་གྲོས་ཚོགས་འཐུས་མི་ལྕམ་སྐུ་ Penny Mordaunt མཆོག་ནི། ཨིན་ཡུལ་གཞུང་གི་ཕྱི་རྒྱལ་རོགས་རམ་ལྷན་ཁང་གི་བློན་ཆེན་ཡིན་པ་དང་། གྲོས་ཚོགས་སུ་ཁོ་མོས་འཛམ་གླིང་མཉམ་འབྲེལ་རྒྱལ་ཚོགས་ཀྱི་སྐྱབས་བཅོལ་ལྷན་ཁང་བརྒྱུད་ཨིན་ཡུལ་གཞུང་ནས་རྒྱལ་ཁབ་གང་སར་ཉམ་ཐག་དང་སྐྱབས་བཅོལ་བ་རྣམས་ལ་རོགས་རམ་གནང་བཞིན་ཡོད་པའི་ཁོངས་སུ་བཙན་བྱོལ་བོད་མི་ཚོ་ཡང་ཚུད་ཀྱི་ཡོད་སྐོར་གསུང་འདུག
སྐབས་དེར་ཨིན་ཡུལ་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་གྲོས་ཚོགས་འཐུས་མི་སྐུ་ཞབས་ Tim Loughton མཆོག་གིས་ཁོང་རང་ཉིད་དང་། དེ་བཞིན་ཌུན་ཌེའི་ Dundee ས་ཁུལ་གྱི་གྲོས་ཚོགས་འཐུས་མི་རྣམ་གཉིས་རིང་མིན་བོད་མི་མང་སྤྱི་འཐུས་ལྷན་ཚོགས་ཀྱི་གོ་སྒྲིག་གནང་གཏན་འཁེལ་བའི་རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་ཐེངས་བདུན་པའི་ཐོག་མཉམ་ཞུགས་གནང་རྒྱུ་ཡིན་སྐོར་གསུང་ཞིང་། ཚོགས་ཆེན་དེ་ནི་བོད་མི་ཚོ་རྒྱ་ནག་གཞུང་གི་དབང་སྒྱུར་དང་གཉའ་གནོན་འོག་བོད་ཀྱི་ཐུན་མིན་ཆོས་དང་རིག་གཞུང་། འགྲོ་བ་མིའི་ཐོབ་ཐང་བཅས་གང་ཅིའི་ཐད་དཀའ་ངལ་ཤུགས་ཆེ་འཕྲད་བ་མ་ཟད། བོད་མི་ས་ཡ་གཅིག་ཙམ་གྱི་ཚེ་སྲོག་ཤོར་ཡོད་པ་བཅས་ངོ་སྤྲོད་གནང་བ་དང་འབྲེལ། ད་ལྟ་རྒྱ་གར་རྡ་རམ་ས་ལ་སོགས་སུ་བོད་མི་བཙན་བྱོལ་བ་མང་དག་ཅིག་གནས་སྡོད་བྱེད་བཞིན་ཡོད་པས། བོད་མི་དེ་དག་གི་ཞུམ་པ་མེད་པའི་སྙིང་སྟོབས་གསོན་པོར་གནས་ཐུབ་སླད་ང་ཚོས་བོད་མིའི་རིན་ཐང་ལྡན་པའི་རིག་གཞུང་དང་ཤེས་ཡོན་ཐོག་རོགས་རམ་སྔར་ལྷག་གནང་དགོས་པ་གསུང་འདུག
སྐབས་དེར་ཨིན་ཡུལ་གཞུང་གི་ཕྱི་རྒྱལ་རོགས་རམ་ལྷན་ཁང་གི་བློན་ཆེན་ལྕམ་སྐུ་ Penny Mordaunt མཆོག་གིས་བོད་མིའི་རིག་གཞུང་དང་ཕ་མེས་ནས་བརྒྱུད་པའི་གཅེས་ནོར་ལ་རྒྱབ་སྐྱོར་སྔར་ལྷག་གནང་རྒྱུ་ཇི་དགེའི་སྐོར་འབྲེལ་ཡོད་རྣམ་པ་དང་ལྷན་བཀའ་སྡུར་གནང་རྒྱུ་ཡིན་པ་གསུང་འདུག
གཞན་ཡང་གྲོས་ཚོགས་སུ་ཨིན་ཡུལ་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་མི་ལྕམ་སྐུ་ཀེ་རི་མེ་ཁར་ཐི་ Kerry McCarthy མཆོག་གིས་ཀྱང་བོད་ཀྱི་གནད་དོན་དང་འབྲེལ། འཛམ་གླིང་གི་སྣེ་གསུམ་པར་གྲགས་པའི་བོད་ནང་འཁྱགས་རོགས་བཞུར་ཚད་མྱུར་པོ་ཡོད་པའི་དབང་གིས་བོད་ནང་དཀའ་ངལ་ཤུགས་ཆེ་འཕྲད་བཞིན་ཡོད་པས། ང་ཚོས་གནམ་གཤིས་འགྱུར་ལྡོག་གི་གནད་དོན་སྐོར་གླེང་སློང་གནང་སྐབས་བོད་ནང་གི་གནམ་གཤིས་དཀའ་ངལ་དེ་སྣང་མེད་དུ་བཞག་རྒྱུ་མེད་པ་གསུང་འདུག གནད་དོན་དེའི་ལན་དུ་ལྕམ་སྐུ་ Penny མཆོག་གིས་ཨིན་ཡུལ་ནས་གོ་ལའི་དཀའ་ངལ་སེལ་ཐབས་ཐོག་དོན་ཚན་གཙོ་བོ་ ༡༧ ཐོག་རོགས་འདེགས་ཞུ་བཞིན་ཡོད་པའི་ཁོངས་གཙོ་བོ་ནང་ནས་གཙོ་བོ་གསུམ་གྱི་ཁོངས་སུ་གཅིག་ནི་འཕྲོད་བསྟེན་དང་འབྲེལ་བའི་རོགས་རམ་དང་། གཉིས་པ་ནི་གནམ་གཤིས་ཐོག་ལ་ཆགས་ཡོད་ཅེས་གསུང་། ཨིན་ཡུལ་གྱི་སྲིད་བློན་མཆོག་མཉམ་འབྲེལ་རྒྱལ་ཚོགས་ཀྱི་དྲུང་ཆེའི་ཁྱབ་ཁོངས་གོ་ལའི་གནམ་གཤིས་ཡར་རྒྱས་གཏོང་ཐབས་ཀྱི་ལས་གཞིའི་རྒྱུན་ལས་ཆགས་ཀྱི་ཡོད་སྟབས། མ་འོངས་པར་ཁོང་གི་དེའི་ཐོག་གཟིགས་རྒྱུ་ཡིན་པ་གསུང་འདུག །
