༢༠༡༩ ཟླ་ ༥ ཚེས་ ༢ རེས་གཟའ་ཕུར་བུ།

༄༅། །དཔལ་ལྡན་སྲིད་སྐྱོང་མཆོག་གིས་ཉི་ཧོང་གི་རྒྱལ་པོ་ཨ་ཀི་ཧི་ཊོ་མཆོག་གིས་རང་གི་སྲས་ན་རུ་ཧི་ཊོ་མཆོག་ལ་རྒྱལ་སྲིད་མངའ་དབང་རྩིས་སྤྲོད་གནང་བར་ཉི་ཧོང་གི་སྲིད་བློན་སྐུ་ཞབས་ཤིན་ཛོ་ཨ་བྷེ་Shinzo Abeམཆོག་བརྒྱུད་འཚམས་འདྲི་ཞུས་པའི་འཁོད་དོན། ཕྱི་ལོ་ ༢༠༡༩ ཟླ་ ༥ ཚེས་ ༡ རེས་གཟའ་ལྷག་པའི་ཉིན་ཉི་ཧོང་གི་རྒྱལ་པོ་ཨ་ཀི་ཧི་ཊོ་མཆོག་གིས་རྒྱལ་སྲས་ན་རུ་ཧི་ཊོ་མཆོག་ལ་ལོ་རྒྱུས་རང་བཞིན་ལྡན་པའི་རྒྱལ་སྲིད་མངའ་དབང་རྩིས་སྤྲོད་གནང་བར་ངས་བོད་མིའི་སྒྲིག་འཛུགས་དང་བོད་མི་ཡོངས་ཀྱི་ཚབ་ཞུས་ཏེ་ཉི་ཧོང་གི་མི་མང་ལ་སྙིང་ཁོངས་རུས་པའི་སྟེང་ནས་འཚམས་འདྲི་བཀྲ་ཤིས་བདེ་ལགས་ཞུ་རྒྱུ་ཡིན།  རྒྱལ་སྲིད་བདག་གིར་བཞེས་པ་དང་བསྟུན་འཆམ་མཐུན་གྱི་དུས་རབས་གསར་པ་འགོ་འཛུགས་བྱུང་ཡོད།  ཉི་ཧོང་སྐད་ཐོག་འཆམ་མཐུན་ལ་ Reiwa ཞེས་བརྗོད་པ་དེ་བོད་སྐད་སྒྲ་གདངས་ལ་རེ་བ་ཞེས་ཐོན། རྒྱལ་པོ་ཨ་ཀི་ཧི་ཊོ་མཆོག་གིས་ལོ་ངོ་ ༣༠ རིང་ཉི་ཧོང་གི་རྒྱལ་སྲིད་བསྐྱངས་ཡོད། ད་ཆ་རྒྱལ་སྲས་མཆོག་གིས་རྒྱལ་སྲིད་བདག་གིར་བཞེས་རྗེས་འབྱུང་འགྱུར་ཉི་ཧོང་དེ་བཞིན་ཡར་རྒྱས་ཀྱི་ཕྱོགས་སུ་གོམ་པ་མདུན་སྤོ་ཐུབ་པ་དང་། ད་ལྟ་འཛམ་གླིང་ནང་གི་མང་གཙོ་དང་དཔལ་འབྱོར་གྱི་ཐོག་ནས་སྟོབས་ཆེན་རྒྱལ་ཁབ་ཀྱི་གོ་ས་མུ་མཐུད་འཛིན་ཐོག་ཞི་བདེ་ལྡན་པའི་འཛམ་གླིང་ཞིག་སྐྲུན་རྒྱུའི་འབད་བརྩོན་ཐད་ཕྱར་གྲུ་མཉམ་འདེགས་གནང་ཐུབ་པའི་སྨོན་འདུན་ཞུ་རྒྱུ་ཡིན།  

ལྷག་པར་ཉི་ཧོང་གཞུང་མང་གཉིས་ཀྱིས་གྲོས་མོལ་གྱི་ལམ་ནས་བོད་ཀྱི་གནད་དོན་གསལ་ཆེད་རྒྱབ་སྐྱོར་གནང་དང་གནང་མུས་ལ་ང་ཚོས་གོ་སྐབས་འདི་བརྒྱུད་བཀའ་དྲིན་ཆེ་ཞུ་རྒྱུ་ཡིན། ཞེས་འཁོད།