ཕྱི་ལོ་ ༢༠༡༩ ཟླ་ ༥ ཚེས་ ༧ རེས་གཟའ་མིག་དམར།
གནམ་ཐང་།
༄༅། །ཕྱི་ལོ་ ༢༠༡༩ ཟླ་ ༥ ཚེས་ ༥ རེས་གཟའ་ཉི་མའི་མཚན་མོར་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེངྒེ་མཆོག་བྷལ་ཊིག་མངའ་ཁུལ་ Baltic region གྱི་ལི་ཐུ་ཝེ་ནི་ཡའི་ Lithuania རྒྱལ་ས་ཝིལ་ན་སིར་ Vilnius གནམ་ཐང་དུ་ཕེབས་འབྱོར་སྐབས་སྐུ་ཚབ་དོན་གཅོད་བསོད་ནམས་ཚེ་རིང་ལགས་དང་། བོད་ཁང་གི་འགན་འཛིན་གཙུག་ལག་སློབ་དཔོན་སྐུ་ཞབས་Prof Vytis Vidunas ལགས། ཡུན་རིང་ནས་བོད་དོན་རྒྱབ་སྐྱོར་གནང་མཁན་ཁག་གཅིག་སོགས་ཀྱིས་ཕེབས་བསུའི་སྣེ་ལེན་ཞུས་འདུག
ཕྱི་ཚེས་ ༦ ཉིན་དཔལ་ལྡན་སྲིད་སྐྱོང་མཆོག་དབུ་བཞུགས་ཐོག་ཡུལ་དེའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་གོ་སྒྲིག་འོག་གྲོས་ཚོགས་ཀྱི་ཚོགས་ཁང་ཞིག་ནང་གསར་འགོད་ལྷན་ཚོགས་བསྐྱངས་པ་དང་། ལྷན་ཚོགས་སྐབས་དེ་སྔ་ཕྱི་ལོ་ ༡༩༩༡ ལོར་ཨུ་རུ་སུ་དམར་པོའི་དབང་སྒྱུར་འོག་ནས་རང་བཙན་ཐོབ་རྗེས་ཡུལ་དེའི་སྲིད་འཛིན་ཆེས་ཐོག་མ་གནང་མཁན་སྐུ་ཞབས་Prof Vytautas Landsbergis མཆོག་ཀྱང་ཕེབས་འདུག སྐབས་དེར་སྲིད་སྐྱོང་མཆོག་གིས་དེ་སྔ་བྷལ་ཊིག་མངའ་ཁུལ་གྱི་ཨི་སི་ཊོ་ནི་ Estonia ཡ་དང་། ལ་ཏི་ཝི་ཡ། Latvia ལི་ཐུ་ཝེ་ནི་ཡ་ Lithuania བཅས་རྒྱལ་ཁབ་གསུམ་གྱིས་ཨུ་རུ་སུ་དམར་པོའི་དབང་སྒྱུར་འོག་དཀའ་སྡུག་ཇི་འདྲ་ཞིག་མྱངས་པ་དེ་དང་། དེང་སྐབས་བོད་ནང་གི་བོད་མི་ཚོས་རྒྱ་ནག་དམར་པོའི་དབང་སྒྱུར་འོག་དཀའ་སྡུག་དེ་མཚུངས་མྱོང་བཞིན་ཡོད་པ་གསལ་བཤད་གནང་ཐོག རྒྱལ་སྤྱིའི་སྤྱི་ཚོགས་སྤྱི་དང་ལྷག་པར་ལི་ཐུ་ཝེ་ནི་ཡུལ་གྱིས་བོད་དོན་ཐོག་རྒྱབ་སྐྱོར་གང་ཐུབ་གནང་དགོས་པའི་འབོད་སྐུལ་གནང་དོན། “གལ་ཏེ་ཁྱེད་རང་འགྲོ་བ་མིའི་ཐོབ་ཐང་དང་རང་དབང་། མང་གཙོ་བཅས་ལ་རྒྱབ་སྐྱོར་གནང་མཁན་ཞིག་ཡིན་ཚེ་བོད་དོན་ཐོག་ངེས་པར་དུ་རྒྱབ་སྐྱོར་གནང་དགོས། ” ཞེས་སོགས་གསུངས།
གསར་འགོད་ལྷན་ཚོགས་ཐོག
གསར་འགོད་ལྷན་ཚོགས་ཐོག་སྲིད་སྐྱོང་མཆོག་གི་བོད་ནང་གི་གནས་སྟངས་དང་རྒྱལ་སྤྱིའི་སྤྱི་ཚོགས་ཁག་ལ་བོད་དོན་རྒྱབ་སྐྱོར་གནང་དགོས་པའི་འབོད་སྐུལ་གནང་བའི་སྐོར་ཕྱེད་ཡོལ་རྒྱལ་ཡོངས་བརྙན་འཕྲིན་བརྒྱུད་སྐར་མ་ ༤ ཙམ་རིང་རྒྱང་བསྲིང་གནང་བ་སོགས་ལ་བརྟེན་རྒྱ་ནག་གཞུང་གིས་སྐྱོན་བརྗོད་ཤུགས་ཆེ་བྱས་འདུག གསར་འགོད་ལྷན་ཚོགས་གྲུབ་མཚམས་གྲོས་ཚོགས་འཐུས་མི་སྐུ་ཞབས་ Laima Andrikiene ལགས་ཀྱིས་སྲིད་སྐྱོང་མཆོག་ལ་གསོལ་ཚིགས་འདེགས་འབུལ་ཞུས་འདུག
སྲིད་བྱུས་ཉམས་ཞིབ་ཁང་།
ཕྱེད་ཡོལ་ཙམ་ལ་ཝིལ་ན་སི་སྲིད་བྱུས་ཉམས་ཞིབ་ཁང་གི་མགྲོན་འབོད་ལྟར་སྲིད་སྐྱོང་མཆོག་ཕེབས་ཏེ། “བོད་ནང་ལག་བསྟར་བྱེད་བཞིན་པའི་སྲིད་བྱུས་གཞི་རྩར་བཟུང་ནས་ཡུ་རོབ་ཐོག་རྒྱ་ནག་གི་ཆབ་སྲིད་ལངས་ཕྱོགས་ལ་དཔྱད་པ། ” ཞེས་པའི་བརྗོད་གཞིའི་ཐོག་གསུང་བཤད་གནང་འདུག སྤྱིར་དེ་ཉིན་སྲིད་སྐྱོང་མཆོག་གིས་ཡུལ་དེའི་རླུང་འཕྲིན་ལས་ཁང་ Žinių radijas བརྒྱུད་བཅར་འདྲི་དང་ལེན་གནང་བ་དང་། སྐབས་དེར་སྲིད་སྐྱོང་མཆོག་གིས་དེང་སྐབས་རྒྱ་ནག་གཞུང་གིས་ “རྒྱུད་གཅིག་ལམ་གཅིག་ ” ཟེར་བའི་དཔལ་འབྱོར་གྱི་སྲིད་བྱུས་གསར་པའི་སྐོར་གསུང་སྐབས་དེ་སྔ་རྒྱ་ནག་གིས་བོད་ནང་ཐོག་མར་ལམ་གཅིག་བརྒྱབ་པ་དང་། དེ་རྗེས་ལམ་དེའི་ཐོག་དམག་མི་དང་དམག་དོན་འཕྲུལ་ཆས་འོར་འདྲེན་བྱས་མཐར་བོད་མིའི་རང་དབང་ཤོར་བ་དང་། རྒྱ་ནག་གཞུང་གི་དབང་སྒྱུར་ལ་ཞི་རྒོལ་བྱེད་མཁན་བོད་མི་རྣམས་ལ་དྲག་གནོན་བྱས་ཚུལ་སོགས་གསུངས།
རླུང་འཕྲིན་ཁང་།
ཕྱོགས་མཚུངས་ཡུལ་དེའི་ཁྲིམས་ཞིབ་ལྷན་ཁང་གི་འགན་འཛིན་ Prof. Dr. Dainius Zalimas མཆོག་གིས་སྲིད་སྐྱོང་མཆོག་ལས་ཁུངས་སུ་མགྲོན་འབོད་ཞུ་སྐབས་བོད་མིའི་སྒྲིག་འཛུགས་ཀྱི་ཆེས་མཐོའི་ཁྲིམས་ཞིབ་ཁང་གི་ལས་དོན་གནང་ཕྱོགས་སྐོར་ངོ་སྤྲོད་གནང་བ་མ་ཟད། རྒྱལ་སྤྱིའི་ཁྲིམས་ཞིབ་ལྷན་ཚོགས་སྐབས་བོད་མིའི་སྒྲིག་འཛུགས་ཀྱི་ཆེས་མཐོའི་ཁྲིམས་ཞིབ་ཁང་མགྲོན་འབོད་གནང་དགོས་པའི་འབོད་སྐུལ་ཡང་གནང་འདུག་པ་བཅས། །
