༢༠༡༩ ཟླ་ ༥ ཚེས་ ༨ རེས་གཟའ་ལྷག་པ།

༄༅། །ཕྱི་ལོ་ ༢༠༡༩ ཟླ་ ༥ ཚེས་ ༥ རེས་གཟའ་ཉི་མའི་ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་བྷལ་ཊིག་མངའ་ཁུལ་ Baltic region གྱི་ལི་ཐུ་ཝེ་ནི་ཡའི་ Lithuania རྒྱལ་ས་ཝིལ་ན་སིར་ Vilnius ཕེབས་འབྱོར་བྱུང་མཚམས་ཕྱི་ཉིན་ཏེ།  ཕྱི་ལོ་ ༢༠༡༩ ཟླ་ ༥ ཚེས་ ༦ ཉིན་དཔལ་ལྡན་སྲིད་སྐྱོང་མཆོག་དབུ་བཞུགས་ཐོག་ཡུལ་དེའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་གོ་སྒྲིག་འོག་གྲོས་ཚོགས་ཀྱི་ཚོགས་ཁང་ཞིག་ནང་གསར་འགོད་ལྷན་ཚོགས་ཤིག་བསྐྱངས་པ་བརྒྱུད་བོད་ནང་གི་ཛ་དྲག་གནས་སྟངས་སོགས་འགྲེལ་བརྗོད་གནང་བར་བརྟེན།  ཡུལ་དེར་རྟེན་གཞི་བྱས་པའི་རྒྱ་ནག་གཞུང་ཚབ་ཁང་གིས་དེ་ཉིན་ཕྱེད་ཡོལ་ཙམ་ལ་སྐྱོན་བརྗོད་ཤུགས་ཆེ་བྱས་པའི་བསྒྲགས་གཏམ་སྤེལ་བ་མ་ཟད།  བྱེད་སྟངས་དེ་རིགས་ནི་ཆབ་སྲིད་ཀྱི་འགལ་འཛོལ་ཛ་དྲག་པོ་ཞིག་ཡིན་པ་ཡུལ་དེའི་སྲིད་གཞུང་ལ་སྐྱོན་བརྗོད་བྱས་འདུག 

དེ་ཡང་གསར་འགོད་ལྷན་ཚོགས་སྐབས་དེ་སྔ་ཕྱི་ལོ་ ༡༩༩༡ ལོར་ཨུ་རུ་སུ་དམར་པོའི་དབང་སྒྱུར་འོག་ནས་རང་བཙན་ཐོབ་རྗེས་ཡུལ་དེའི་སྲིད་འཛིན་ཆེས་ཐོག་མ་གནང་མཁན་སྐུ་ཞབས་ Prof.Vytautas Landsbergis མཆོག་ཀྱང་ཕེབས་འདུག

བོད་ཀྱི་གནད་དོན་སྐོར་གླེང་སློང་ཆེད་སྤྱི་སྒེར་ཚོགས་པ་སུ་རུང་གིས་སྡིངས་ཆ་སྐྲུན་པའི་རིགས་ལ་རྒྱ་ནག་གཞུང་གིས་མཐའ་གཅིག་ཏུ་ངོ་རྒོལ་ཡོད་སྐོར་བསྒྲགས་གཏམ་དེའི་ནང་འཁོད་འདུག  དེ་ཡང་ཕྱི་འབྲེལ་དྲུང་ཆེ་དང་བོད་མིའི་སྒྲིག་འཛུགས་ཀྱི་མགྲིན་ཚབ་པ་དྭགས་པོ་བསོད་ནམས་ནོར་བུ་ལགས་ཀྱིས་ “དཔལ་ལྡན་སྲིད་སྐྱོང་མཆོག་ཐེངས་འདིར་ལི་ཐུ་ཝི་ནི་ཡར་ Lithuania ཕེབས་སྐབས། ཡུལ་དེར་གནས་པའི་རྒྱ་ནག་གཞུང་ཚབ་ཁང་གིས་ངོ་རྒོལ་བྱས་པ་དེར་ང་ཚོ་བློ་ཕམ་ཡོད།  སྲིད་སྐྱོང་བློ་བཟང་སེངྒེ་མཆོག་ནི་མང་གཙོའི་ལམ་ནས་འོས་འདེམས་བྱུང་བའི་དབུ་ཁྲིད་ཞིག་ཡིན་པ་མ་ཟད།  བོད་མི་ས་ཡ་དྲུག་མཚོན་བཞིན་ཡོད། རྒྱ་ནག་གཞུང་གིས་བོད་སར་བཙན་བཟུང་བྱས་ནས་རིམ་བཞིན་དབང་སྒྱུར་འོག་བོད་མི་རྣམས་ལ་ཆོས་དད་དང་གཞི་རིམ་འགྲོ་བ་མིའི་ཐོབ་ཐང་། དེ་བཞིན་སྐད་ཡིག་སྲུང་སྐྱོབ་ཀྱི་རང་དབང་སོགས་རྩ་བ་ནས་སྤྲད་མེད། ” ཅེས་གསུངས། །