ཕྱི་ལོ་ ༢༠༡༩ ཟླ་ ༥ ཚེས་ ༢༤ རེས་གཟའ་པ་སངས།
༄༅། །རྒྱ་གར་གྲོས་ཚོགས་འོག་མའི་རྒྱལ་ཡོངས་འོས་བསྡུ་ཆེན་མོའི་ནང་སྲིད་བློན་མོ་དི་མཆོག་གིས་སྣེ་ཁྲིད་པའི་ཆབ་སྲིད་ཚོགས་པ་བྷི་ཇེ་པི་ BJP ལ་རྒྱལ་ཁ་ཤུགས་ཆེ་ཐོབ་པར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སྲིད་བློན་མོ་དི་ Narendra Modi མཆོག་ལ་འཚམས་འདྲི་སྩལ་བའི་ནང་འཁོད་དོན།
སྐུ་ཉིད་དང་རྒྱལ་ཡོངས་མང་གཙོ་མནའ་འབྲེལ་ཚོགས་པར་གྲོས་ཚོགས་འོག་མའི་རྒྱལ་ཡོངས་འོས་བསྡུ་ཆེན་མོའི་ནང་རྒྱལ་ཁ་ཐོབ་པར་འཚམས་འདྲི་ཞུ་རྒྱུ་ཡིན། འཛམ་གླིང་ནང་གི་མང་གཙོའི་རྒྱལ་ཁབ་ཆེ་ཤོས་རྒྱ་གར་ལྟ་བུས། ད་ཆ་རྒྱལ་སྤྱིའི་སྤྱི་ཚོགས་སྣེ་ཁྲིད་མཁན་གྱི་རྒྱལ་ཁབ་གཙོ་གྲས་ཤིག་ཆགས་པ་མཐོང་སྐབས། སེམས་ནང་དགའ་སྤོབས་སྐྱེ་བཞིན་འདུག
ཡུལ་འདི་ཉིད་གནའ་བོའི་སྤྱི་ཚོགས་ཀྱི་དཔལ་ཡོན་ཕུན་སུམ་ཚོགས་པ་དར་ཡུལ་ཁོངས་ནས་གཅིག་ཡིན་ཡང་། བྱམས་པ་དང་སྙིང་རྗེ་གཞི་རྩར་འཛིན་པའི་འཚེ་བ་མེད་པའི་ལྟ་སྤྱོད་ཉམས་ལེན་བྱ་རྒྱུ་དེ་གཞན་དང་མི་འདྲ་བའི་ཁྱད་ཆོས་དམིགས་བསལ་བ་ཞིག་རེད།
ངོས་ཀྱིས་འགྲོ་བ་མི་རིགས་གཅིག་གྱུར་དང་ཆོས་ལུགས་ཕན་ཚུན་འཆམ་མཐུན་གྱི་འདུ་ཤེས་གོང་མཐོར་གཏོང་རྒྱུའི་ལས་འགན་ཐོག རྒྱ་གར་གནའ་རབས་ཀྱི་སེམས་ཁམས་རིག་པའི་རྣམ་གཞག་དང་འབྲེལ་བའི་བློའི་རྣམ་གཞག་དང་བྱེད་ལས་སོགས་ལེགས་བཤད་དེ་དག་རྒྱ་གར་ནང་བསྐྱར་གསོ་ཡོང་ཐབས་བྱེད་བཞིན་པ་དེར་རྒྱ་གར་བ་སྤྱི་དང་། ལྷག་པར་གཞོན་སྐྱེས་ཁྲོད་དགའ་མོས་དང་རྒྱབ་སྐྱོར་ཆེན་པོ་བྱས་པ་མཐོང་སྐབས་རེ་བ་བཟང་པོ་ཞིག་མཐོང་གི་འདུག
དེང་སྐབས་འཛམ་གླིང་ཁྱོན་དུ་གནའ་དེང་ཤེས་ཡོན་ཟུང་འབྲེལ་ཐོག་ནས་སེམས་ནང་དོན་དམ་གྱི་ཞི་བདེ་བསྐྲུན་རྒྱུར་རེ་བ་རྒྱག་ས་ནི་རྒྱ་གར་འབའ་ཞིག་ཡིན་པ་ངོས་ཀྱིས་ཡིད་བྱེད་བཞིན་ཡོད།
བོད་མི་ཚོས་རྒྱ་གར་འཕགས་ཡུལ་འདི་ཉིད་ཆོས་ཀྱི་འབྱུང་གནས་སུ་ངོས་འཛིན་གྱིས་གུས་བརྩི་ཧ་ཅང་ཞུ་བཞིན་ཡོད། དུས་རབས་བརྒྱད་པའི་ནང་བོད་དུ་དཔལ་ནཱ་ལེནྡྲའི་ལེགས་བཤད་དར་འཕེལ་བྱུང་བར་བརྟེན་རིག་གནས་ཡར་རྒྱས་ཐོག་ཕན་རླབས་ཤུགས་ཆེ་བྱུང་ཡོད། དུས་རབས་བཅུ་བཞི་པའི་ནང་བྱོན་པའི་བོད་ཀྱི་མཁས་པ་ཞིག་གིས། ཁ་བ་གངས་ཅན་གྱི་ལྗོངས་འདིར་སངས་རྒྱས་ཀྱི་བསྟན་པ་མ་དར་བར་དུ་སྨག་རུམ་མུན་པས་འཐིབ་པར་གསུང་ཡོད།
ཟླ་བ་སྔོན་མར་བོད་མི་བཙན་བྱོལ་བ་རྣམས་རྒྱ་གར་དུ་འབྱོར་ནས་ལོ་ངོ་ ༦༠ འཁོར་བའི་ཉིན་མོ་སྲུང་བརྩི་ཞུས་ཡོད། ངོས་ཀྱིས་གོ་སྐབས་འདི་བརྒྱུད་རྒྱ་གར་གཞུང་མང་གཉིས་ལ་ཐུགས་རྗེ་ཆེ་ཞུ་རྒྱུ་དང་། རྒྱ་གར་གཞུང་མང་གཉིས་ཀྱི་དྲིན་ལ་བརྟེན་ནས་བོད་མི་ཚོས་བཙན་བྱོལ་ནང་རང་གི་ཐུན་མིན་ཆོས་དང་རིག་གཞུང་མི་ཉམས་རྒྱུན་འཛིན་ཐུབ་པ་བྱུང་ཡོད།
སྐུ་ཉིད་ཀྱི་ལས་དོན་གང་ཅིར་བྱ་བ་ལམ་ལྷོངས་ཡོང་བ་དང་། དཀའ་ངལ་ལས་རྣམ་པར་རྒྱལ་ཏེ་རྒྱ་གར་མི་མང་གི་བསམ་དོན་ཡིད་བཞིན་དུ་འགྲུབ་པའི་སྨོན་འདུན་དང་བཅས། ཞེས་འཁོད།
འདི་ག་ཕྱི་དྲིལ་བོད་ཡིག་ཚན་པས་ཨིན་ཡིག་ནས་ཕབ་སྒྱུར་ཞུས། གསུང་འཕྲིན་ངོ་མ་ཨིན་ཡིག་ལ་རྩ་འཛིན་ཡོང་བ་ཞུ།
