༢༠༡༩ ཟླ་ ༥ ཚེས་ ༡ རེས་གཟའ་ལྷག་པ།
ཕྱི་ལོ་ ༢༠༠༣ ལོར། ཝ་ཤིང་ཊོན་དུ།
༄༅། །ཕྱི་ལོ་ ༢༠༡༩ ཟླ་ ༤ ཚེས་ ༢༨ ཉིན་ཨ་རིའི་གྲོས་ཚོགས་གོང་མའི་སྤྱི་མཐུན་ཚོགས་པའི་གྲོས་ཚོགས་འཐུས་མི་སྐུ་ཞབས་རི་ཅཌ་ལུ་གར་Sen. Richard Lugar མཆོག་སྐུ་ཚེའི་འཕེན་པ་རྫོགས་པའི་ཡིད་སྐྱོའི་གནས་ཚུལ་ཐོན་པར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཐུགས་གསོའི་གསུང་འཕྲིན་སྩལ་འདུག དེ་ཡང་དམ་པ་ཁོང་དགུང་གྲངས་ ༨༧ ཡིན་ཞིང་། ཡུན་རིང་ནས་བོད་མི་དང་བོད་དོན་ཐོག་ཞལ་ཞེ་གཉིས་མེད་ཐོག་ནས་རྒྱབ་སྐྱོར་གནང་མཁན་ཞིག་ཀྱང་ཡིན་འདུག ལྷག་པར་བོད་ཀྱི་༸གོང་ས་༸སྐྱབས་མགོན་ཏཱ་ལའི་བླ་མ་མཆོག་དང་ཐུགས་འདྲིས་ཆེ་ཞིང་། རྒྱ་ནག་གཞུང་གིས་བོད་ནང་དམ་བསྒྲགས་ཅན་གྱི་སྲིད་བྱུས་ལག་བསྟར་བྱེད་བཞིན་པར་སྐྱོན་བརྗོད་གནང་མཁན་ཞིག་ཡིན་པ་དང་།
མགོན་པོ་གང་ཉིད་ཀྱིས་འཛམ་གླིང་ཞི་བདེ་དང་འགྲོ་བ་མིའི་བཟང་སྤྱོད་གོང་མཐོར་གཏོང་ཐབས་ཀྱི་རླབས་ཆེན་གྱི་མཛད་ཁུར་ལ་བསྔགས་བརྗོད་ཞུ་མཁན་ཞིག་ཡིན་འདུག དམ་པ་ཁོང་ཀླད་པར་ནད་གཞི་ཕོག་རྐྱེན་མཐར་སྐུ་ཚེ་མ་ཟིན་པའི་གནས་ཚུལ་བྱུང་འདུག སྤྱིར་དམ་པ་ཁོང་གིས་གྲོས་ཚོགས་ནང་བོད་དོན་རྒྱབ་སྐྱོར་གྱི་གྲོས་ཆོད་ཁག་མང་པོར་རྒྱབ་སྐྱོར་གནང་ཡོད་ཅིང་། ལྷག་པར་ཕྱི་ལོ་ ༢༠༠༢ ལོར་ཨ་རིའི་གཞུང་གིས་བོད་མིར་འཛིན་པའི་སྲིད་བྱུས་ཞེས་པ་གཏན་འབེབས་གནང་སྐབས་དམ་པ་ཁོང་གིས་རྒྱབ་སྐྱོར་ཤུགས་ཆེ་གནང་འདུག གཞན་ཡང་ ༢༠༠༧ ལོར་ཨ་རིའི་གྲོས་ཚོགས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་གསེར་གྱི་རྟགས་མ་འབུལ་བཞེས་མཛད་དགོས་པའི་གྲོས་ཆོད་ཐོག་ལའང་རྒྱབ་སྐྱོར་ཤུགས་ཆེ་ཞུས་འདུག
