ཕྱི་ལོ་ ༢༠༡༩ ཟླ་ ༥ ཚེས་ ༢༠ རེས་གཟའ་ཟླ་བ།
༄༅། །བོད་མིའི་སྒྲིག་འཛུགས་ཀྱི་ནང་སྲིད་ལས་ཁུངས་ཀྱི་སོ་ནམ་ཚན་པའི་གོ་སྒྲིག་འོག་ཕྱི་ལོ་ ༢༠༡༩ ཟླ་ ༥ ཚེས་ ༡༧ ཉིན་གྱི་ཕྱི་དྲོ་དང་ཕྱི་ཚེས་ ༡༨ ཉིན་གྱི་སྔ་དྲོ་རྡ་ས་འཛིན་སྐྱོང་སྦྱོང་བརྡར་ཁང་དུ་ནང་སྲིད་ལས་ཁུངས་ཀྱི་ཁྱབ་ཁོངས་ས་གནས་འགོ་འཛིན་རྣམས་ལ་ཐེངས་དང་པོ་བཙན་བྱོལ་བོད་མིའི་སོ་ནམ་ལས་དོན་ཡར་རྒྱས་གཏོང་ཕྱོགས་ཐད་བགྲོ་གླེང་ཚོགས་འདུ་བསྐོང་འཚོགས་གནང་ཡོད་པ་དང་། ཚོགས་འདུའི་སྟེང་རྒྱ་བལ་འབྲུག་གསུམ་ནང་གི་བོད་མིའི་ས་གནས་འགོ་འཛིན་གྲངས་ ༤༡ མཉམ་ཞུགས་གནང་ཡོད། ཚོགས་འདུའི་ཐོག་ནང་སྲིད་བཀའ་བློན་འཁོར་ལྷ་ཚང་བསོད་ནམས་སྟོབས་རྒྱལ་མཆོག་གིས་ཚོགས་བཅར་བ་ཡོངས་ལ་གསུང་བཤད་གནང་དོན།
ང་ཚོའི་གཞིས་ཆགས་ཕལ་ཆེ་བའི་འཚོ་རྟེན་དེ་སོ་ནམ་འདེབས་ལས་དང་འབྲེལ་བ་ཆགས་ཡོད། རྒྱ་གར་གཞུང་གིས་བཙན་བྱོལ་བོད་མི་ཚོར་ས་ཆ་མང་པོ་གནང་ཡོད། ད་ལྟའི་ཆར་སོ་ནམ་འདེབས་ལས་ཉམས་རྒུད་དུ་འགྲོ་བཞིིན་ཡོད་པས། ས་གནས་འགོ་འཛིན་རྣམ་པས་ཐེངས་འདིའི་ཚོགས་འདུའི་སྟེང་བགྲོ་གླེང་ལྷུག་པོ་གནང་སྟེ་བཙན་བྱོལ་བོད་མིའི་སོ་ནམ་ཡར་རྒྱས་གཏོང་ཕྱོགས་ཀྱི་ཐབས་ལམ་གསར་པ་ཞིག་ཡོང་བར་འབད་བརྩོན་གནང་དགོས་སྐོར་གསུངས།
ནང་སྲིད་དྲུང་ཆེ་དཔེ་ཟུར་དབང་འདུས་ཚེ་རིང་ལགས་ཀྱིས། རང་ཉིད་ཉེ་ཆར་རྒྱ་གར་ལྷོ་ཕྱོགས་བོད་མིའི་གཞིས་ཆགས་ཁག་ལ་ཕྱིན་པའི་སྐབས། སོ་ནམ་འདེབས་ལས་ཡར་རྒྱས་ཀྱི་རྣམ་པ་ཐོན་ཡོང་གི་ཡོད་ཅིང་། སོ་ནམ་ཐོན་རྫས་ཉོ་མཁན་གང་མང་རག་པར་གཙོ་བོར་སོ་ནམ་ཐོན་རྫས་སྤུས་ཀ་ལྡན་པ་ཞིག་ཡོང་ཐབས་གནང་དགོས་པ་སོགས་ཀྱི་སྐོར་གསུངས།
ནང་སྲིད་ལས་ཁུངས་ཀྱི་སོ་ནམ་ཚན་པའི་འགན་འཛིན་དོན་གྲུབ་ཚེ་རིང་ལགས་ཀྱིས། སོ་ནམ་ལས་དོན་ཡར་རྒྱས་གཏོང་ཕྱོགས་སྤྱིའི་སྐོར་དང་། ལྷག་པར་མ་འོངས་པར་གཞོན་སྐྱེས་ཚོ་སོ་ནམ་འདེབས་ལས་ཀྱི་ལས་ཀར་ཞུགས་པར་སོ་ནམ་འདེབས་ལས་ཐོག་མ་དངུལ་ཕོན་ཆེན་པོ་བཏང་སྟེ་སོ་ནམ་འདེབས་ལས་དེ་བཞིན་ཁེ་བཟང་ཡོད་པའི་དཔལ་འབྱོར་གྱི་སྡེ་ཚན་ཞིག་ལ་བསྒྱུར་ཐབས་གནང་དགོས་པ་སོགས་ཀྱི་སྐོར་གསུངས། །
