ཕྱི་ལོ་ ༢༠༡༩ ཟླ་ ༥ ཚེས་ ༤ རེས་གཟའ་སྤེན་པ།
༄༅། །འདི་ལོའི་རྒྱ་གར་རྒྱལ་ཡོངས་ཀྱི་འབྲིང་རིམ་སློབ་གྲྭའི་ཡིག་རྒྱུགས་ཆེན་མོའི་ AISSCE གྲུབ་འབྲས་ཐོན་པ་ལྟར། རྒྱ་གར་རྒྱལ་ཡོངས་ཀྱི་འབྲིང་རིམ་སློབ་གྲྭའི་ཡིག་རྒྱུགས་ནང་བོད་པའི་སློབ་གྲྭ་ཁག་ ༡༧ ནས་སློབ་ཕྲུག་གྲངས་ ༡༡༣༣ འཛུལ་ཞུགས་བྱས་ཡོད་པའི་ཁོངས་ནས་སློབ་ཕྲུག་གྲངས་ ༡༡༠༠ ཡིག་རྒྱུགས་འཕྲོད་ཡོད་པ་དང་། བསྐྱར་རྒྱུགས་གཏོང་དགོས་པའི་སློབ་མ་གྲངས་ ༢༨ ཡོད། ཡིག་རྒྱུགས་མ་འཕྲོད་པའི་སློབ་མ་གྲངས་ ༥ བཅས་བྱུང་འདུག ཁྱོན་ཡོངས་ཀྱི་བཙན་བྱོལ་བོད་མིའི་སློབ་གྲྭའི་བརྒྱ་ཆ་ནི་ ༩༧ ལོན་ཡོད་པར་བརྟེན་སྔ་ལོའི་འཛིན་རིམ་བཅུ་གཉིས་ཀྱི་ཡིག་རྒྱུགས་གྲུབ་འབྲས་ལས་བརྒྱ་ཆ་ ༡.༤༤ འཕར་ཆ་བྱུང་ཡོད།
འདི་ལོའི་བོད་པའི་སློབ་གྲྭའི་འཛིན་རིམ་བཅུ་གཉིས་ཀྱི་སློབ་ཕྲུག་བརྒྱ་ཆ་ ༩༤ ལོན་མཁན་སེ་ལ་ཁུའི་བོད་ཁྱིམ་སློབ་གྲྭའི་ཀརྨ་ཕུན་ཚོགས་ཟླ་བ་ལགས་ཡིན་འདུག ཕྱོགས་མཚུངས་རྒྱ་གར་དབུས་འབྲིང་རིམ་ཤེས་ཡོན་ལྷན་ཚོགས་ CBSE ཀྱི་འཛིན་རིམ་བཅུ་གཉིས་ཀྱི་རྒྱལ་ཡོངས་ཡིག་རྒྱུགས་ཆེན་མོའི་གྲུབ་འབྲས་ནང་བོད་སློབ་ཁོངས་ནས་ཡིག་རྒྱུགས་འཕྲོད་ཚད་བརྒྱ་ཆ་ ༡༠༠ ནས་ ༡༠༠ ལེན་མཁན་སློབ་གྲྭ་བརྒྱད་བྱུང་འདུག
སྦེལ་ཀོབ་སཾ་བྷོ་ཊའི་སློབ་མ་བསྟན་འཛིན་གངས་མཚོ་ལགས།
འདི་ལོའི་དགའ་ལྡན་ཕོ་བྲང་གི་བྱ་དགའ་ལེན་མཁན་སྒྱུ་རྩལ་སྡེ་ཚན་ཁོངས་ནས་ཨང་དང་པོའི་ཁོངས། སྦེལ་ཀོབ་སཾ་བྷོ་ཊའི་སློབ་མ་བསྟན་འཛིན་གངས་མཚོ་ལགས་བརྒྱ་ཆ་ ༩༢ ། ཨང་གཉིས་པ་མ་སུ་རི་བོད་ཁྱིམ་གྱི་སློབ་མ་བསོད་ནམས་བདེ་སྐྱིད་ལགས་བརྒྱ་ཆ་ ༨༩།༦ །
མ་སུ་རི་བོད་ཁྱིམ་གྱི་སློབ་མ་བསོད་ནམས་བདེ་སྐྱིད་ལགས།
ཨང་གསུམ་པ་མོན་གྷོ་སཾ་བྷོ་ཊ་གཏན་སློབ་ཀྱི་སློབ་མ་བསྟན་འཛིན་མཚོ་མོ་ལགས་དང་། མ་སུ་རི་བོད་ཁྱིམ་སློབ་མ་བསྟན་འཛིན་རྣམ་རྒྱལ་ལགས་བརྒྱ་ཆ་ ༨༧།༨ ཐོབ་ཡོད་པ་དང་།
མ་སུ་རི་བོད་ཁྱིམ་སློབ་མ་བསྟན་འཛིན་རྣམ་རྒྱལ་ལགས།
སྦེལ་ཀོབ་བོད་ཁྱིམ་གྱི་སློབ་མ་བསྟན་འཛིན་ལུང་རིགས་ལགས།
ཚོང་རིག་གི་སྡེ་ཚན་ཁོངས་ནས་ཨང་དང་པོ། སྦེལ་ཀོབ་བོད་ཁྱིམ་གྱི་སློབ་མ་བསྟན་འཛིན་ལུང་རིགས་བརྒྱ་ཆ་ ༨༩།༦ ། ཨང་གཉིས་པ་སྦེལ་ཀོབ་བོད་ཁྱིམ་སློབ་མ་ཚེ་རིང་བདེ་སྐྱིད་བརྒྱ་ཆ་ ༨༨།༢ ། ཨང་གསུམ་པ་སྐལ་བཟང་རིན་ཆེན་བརྒྱ་ཆ་ ༨༥།༢ ཐོབ་ཡོད།
ཚན་རིག་སྡེ་ཚན་ཁོངས་ཨང་དང་པོ། སེ་ལ་ཁུའི་བོད་ཁྱིམ་སློབ་གྲྭའི་སློབ་མ་ཀརྨ་ཕུན་ཚོགས་ཟླ་བ་བརྒྱ་ཆ་ ༩༤ དང་། ཨང་གཉིས་པ་མ་སུ་རི་བོད་ཁྱིམ་སློབ་མ་ལྷ་མོ་ཚེ་རིང་བརྒྱ་ཆ་ ༩༡ ། ཨང་གསུམ་པ་སེ་ལ་ཁུའི་བོད་ཁྱིམ་སློབ་མ་ཚེ་རིང་ལྷ་མོ་བརྒྱ་ཆ་ ༩༠།༨ ཐོབ་ཡོད་འདུག
སེ་ལ་ཁུའི་བོད་ཁྱིམ་སློབ་གྲྭའི་སློབ་མ་ཀརྨ་ཕུན་ཚོགས་ཟླ་བ་ལགས།
མ་སུ་རི་བོད་ཁྱིམ་སློབ་མ་ལྷ་མོ་ཚེ་རིང་ལགས།
བོད་མིའི་སྒྲིག་འཛུགས་ཤེས་རིག་ལས་ཁུངས་ནས་བཙན་བྱོལ་བོད་མིའི་སློབ་གྲྭ་ཁག་གི་འཛིན་རིམ་བཅུ་གཉིས་སློབ་མ་རྣམས་ནས་གྲུབ་འབྲས་བཟང་པོ་ཐོན་པར་འཚམས་འདྲི་ཞུས་པ་དང་ཆབས་ཅིག་བསྐྱར་རྒྱུགས་གཏོང་དགོས་པ་དང་ཡིག་རྒྱུགས་མ་འཕྲོད་པའི་སློབ་མ་རྣམས་ལ་སེམས་ཤུགས་མ་ཆག་པར་མུ་མཐུད་ཧུར་བརྩོན་དགོས་པའི་འབོད་སྐུལ་ཡང་གནང་ཡོད་པ་བཅས། །
