ཕྱི་ལོ་ ༢༠༡༩ ཟླ་ ༥ ཚེས་ ༢༠ རེས་གཟའ་ཟླ་བ། 

༄༅། །ཕྱི་ལོ་ ༢༠༡༩ ཟླ་ ༥ ཚེས་ ༡༧ དང་ ༡༨ བཅས་ཉིན་གྲངས་གཉིས་རིང་ཕ་རན་སིའི་གྷི་རན་ཌི་ Grand Bourgtheroulde གྲོང་སྡེའི་ནང་བོད་ནོར་མན་ཌེ་Tibet-Normandy ཚོགས་པའི་གོ་སྒྲིག་འོག་བོད་ལ་ཐེངས་ཤིག་བལྟ་ A LOOK AT TIBET EVENT ཞེས་པའི་བོད་ཀྱི་ཐུན་མོང་མ་ཡིན་པའི་རིག་གཞུང་དང་ཡུལ་སྲོལ་གོམས་གཤིས་སོགས་ཀྱི་སྐོར་འགྲེམས་སྟོན་གནང་ཡོད་པ་དང་། འགྲེམས་སྟོན་གྱི་མཛད་སྒོའི་ཐོག་སྦར་སིལ་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་དང་ཕ་རན་སི་འབྲེལ་མཐུད་པ་རྣམ་རྒྱལ་བསམ་གྲུབ་ལགས་རྣམ་གཉིས་ཕེབས་ཡོད།

དེ་ཡང་དབུ་འབྱེད་མཛད་སྒོའི་ཐོག་བོད་ནོར་མན་ཌེ་ཚོགས་པའི་འགན་འཛིན་སྐུ་ཞབས་ཐེ་རེ་ Mr. Thierry Huygh ལགས་ཀྱིས། ཕྱི་ལོ་ ༢༠༠༩ ལོ་ནས་བཟུང་ད་བར་བོད་ནང་གི་གནས་སྟངས་ཧ་ཅང་ཛ་དྲག་ཅན་དུ་གྱུར་ཡོད་པར་བརྟེན། ཕ་རན་སིའི་གསར་འགོད་པ་དང་མི་སེར་བོད་ནང་ཕར་འགྲོ་ཚུར་ཡོང་བྱེད་ཐུབ་ཀྱི་མེད། བོད་ནོར་མན་ཌེ་ཚོགས་པས་ངོས་ནས་ལོ་ལྟར་ས་གནས་གཞི་རིམ་སློབ་གྲྭའི་ནང་བོད་ཀྱི་ཉིན་མོ་དང་ཡིག་གཟུགས་ཉིན་མོ་སྲུང་བརྩི་གོ་སྒྲིག་ཞུ་ཡི་ཡོད་ཅེས་གསུངས།

གྷི་རན་ཌི་ Grand Bourgtheroulde གྲོང་སྡེའི་སྤྱི་ཁྱབ་པ་སྐུ་ཞབས་མར་ཊིན་Mr. Vincent Martin ལགས་ཀྱིས་འབྲེལ་ཡོད་གོ་སྒྲིག་གནང་མཁན་ཚོགས་པར་ཐུགས་རྗེ་ཆེ་ཞུས་པ་དང་སྦྲགས། ཁོང་གི་ལས་ཁུངས་ནས་མཛད་སྒོ་དེ་ལྟ་བུར་རྒྱབ་སྐྱོར་ཞུས་དང་ཞུ་མུས་ཡིན་པ་མ་ཟད། མཛད་སྒོ་དེ་ལྟ་བུ་བརྒྱུད་མི་མང་ལ་བོད་དོན་སྐོར་གོ་རྟོགས་རྒྱ་ཆེ་སྤེལ་ཐུབ་ངེས་རེད་ཅེས་དགའ་ཚོར་ཆེན་པོའི་སྒོ་ནས་གསུངས།

སྦར་སིལ་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་ཀྱིས། བོད་ནོར་མན་ཌེ་ཚོགས་པའི་འགན་འཛིན་སྐུ་ཞབས་ཐེར་རེ་ལགས་དང་གྷི་རན་ཌི་ Grand Bourgtheroulde གྲོང་སྡེའི་སྤྱི་ཁྱབ་པ་སྐུ་ཞབས་མར་ཊིན་ལགས་རྣམ་གཉིས་ལ་མཛད་སྒོ་དེ་ལྟ་བུ་ཚོགས་གནང་བར་ཐུགས་རྗེ་ཆེ་ཞུས་པ་དང་འབྲེལ། བོད་ནང་གི་ཛ་དྲག་གི་གནས་སྟངས་སྤྱི་དང་། ཕ་རན་སིའི་གྲོས་ཚོགས་གོང་འོག་གཉིས་ཀྱི་འཐུས་མི་རྣམ་པ་བོད་ནང་ཕེབས་པར་རྒྱ་གཞུང་གིས་མཐོང་མཆན་ལག་འཁྱེར་སྤྲོད་ཀྱི་མེད་སྟབས། བོད་དོན་ལ་རྒྱབ་སྐྱོར་བྱེད་པ་ནི། ཡུ་རོབ་ཁུལ་གྱི་བཟང་པོའི་རིན་ཐང་ལ་རྒྱབ་སྐྱོར་བྱེད་པ་མཚོན་གྱི་ཡོད། ཅེས་གསུངས། མཛད་སྒོ་གྲོལ་རྗེས་གྲོང་སྡེའི་སྤྱི་ཁྱབ་པ་སྐུ་ཞབས་མར་ཊིན་ལགས་ཀྱིས་སྐུ་མགྲོན་རྣམས་ཁོང་གི་ལས་ཁུངས་ལ་མགྲོན་འབོད་གནང་ཡོད་པ་བཅས།།