ཕྱི་ལོ་ ༢༠༡༩ ཟླ་ ༥ ཚེས་ ༢༧ རེས་གཟའ་ཟླ་བ།
༄༅། །རྒྱ་གར་གྱི་བྱང་ཤར་ཨ་རུ་ནཱ་ཅལ་ Arunachal Pradesh མངའ་སྡེའི་གྲོས་ཚོགས་ཀྱི་འོས་བསྡུའི་ནང་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་པདྨ་མཁའ་འགྲོ་མཆོག་གི་བྷི་ཇེ་པི་ BJP ཆབ་སྲིད་ཚོགས་པར་རྒྱལ་ཁ་ཤུགས་ཆེ་ཐོབ་པར་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་བོད་མིའི་སྒྲིག་འཛུགས་དང་གཞིས་བྱེས་བོད་མིའི་ཚབ་ཞུས་ཏེ་བློན་ཆེན་མཆོག་ལ་འཚམས་འཕྲིན་ཞིག་ཕུལ་བའི་ནང་འཁོད་དོན།
བློན་ཆེན་མཆོག་གིས་ཨ་རུ་ནཱ་ཅལ་མངའ་སྡེ་ནང་ཕྱོགས་གང་ཅིའི་ཐད་ནས་ཡར་རྒྱས་གཏོང་རྒྱུ་ཡིན་པའི་ཆོད་སེམས་ལ་རྗེས་སུ་ཡི་རངས་དང་། ཆོད་སེམས་དེ་བཞིན་ལམ་ལྷོངས་ཡོང་བའི་སྨོན་འདུན་ཞུ། ཨ་རུ་ན་ཅལ་མངའ་སྡེའི་གཞུང་མང་གཉིས་ནས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ལ་དད་པ་དམ་ཚིག་གཡོ་བ་མེད་པ་ཞུ་གནང་གི་ཡོད་པ་དང་། དེ་བཞིན་བཙན་བྱོལ་བོད་མི་རྣམས་ལ་འདས་པའི་ལོ་ངོ་ ༦༠ རིང་རྒྱབ་སྐྱོར་གནང་དང་གནང་བཞིན་པར་བཀའ་དྲིན་ཤིན་ཏུ་ཆེ་ཞུ་རྒྱུ་ཡིན།
ཨ་རུ་ནཱ་ཅལ་མངའ་སྡེའི་སྤྱི་ཁྱབ་བློན་ཆེན་ཟུར་པ་དང་སྐུ་ཉིད་ཀྱི་ཡབ་ཞིང་གཤེགས་དམ་པ་དེ་ཉིད་ལ་གུས་འདུད་དང་འབྲེལ། དམ་པ་དེ་ཉིད་ནི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དད་གུས་ཧ་ཅང་ཞུ་མཁན་ཞིག་དང་། བོད་དོན་ལ་ཁ་ཞེ་གཉིས་མེད་ཀྱིས་རྒྱབ་སྐྱོར་གནང་མཁན་ཞིག་ཡིན། ཞེས་དྲན་གསོ་དང་སྦྲགས་གསུང་དོན།
གོ་སྐབས་འདི་བརྒྱུད་ངས་ཨ་རུ་ནཱ་ཅལ་མངའ་སྡེའི་གཞུང་མང་གཉིས་ལ་བཀའ་དྲིན་བླ་ལྷག་ཏུ་ཆེ་ཞེས་ཞུ་རྒྱུ་དང་། འབྱུང་འགྱུར་སྤྱི་ཁྱབ་བློན་ཆེན་མཆོག་གི་དབུ་ཁྲིད་འོག་ཨ་རུ་ནཱ་ཅལ་མངའ་སྡེ་དེ་བཞིན་སྔར་ལས་དར་ཞིང་རྒྱས་པ་དང་། འབངས་མི་རྣམས་བདེ་སྐྱིད་ཀྱི་འཚོ་བར་མུ་མཐུད་རོལ་ཐུབ་པའི་སྨོན་འདུན་ཞུ། ཞེས་འཁོད།།
