ཕྱི་ལོ་ ༢༠༡༩ ཟླ་ ༥ ཚེས་ ༣ རེས་གཟའ་པ་སངས།
༄༅། །ཕྱི་ལོ་ ༢༠༡༩ ཟླ་ ༤ ཚེས་ ༢༩ ཉིན་བོད་དཀར་མཛེས་ཁུལ་སེར་ཤུལ་རྫོང་དུ་བོད་མི་གཞོན་སྐྱེས་བཞི་ཡིས་བསང་གསོལ་སྐབས་ཀུན་གཟིགས་པཎ་ཆེན་རིན་པོ་ཆེ་སྐུ་ཕྲེང་བཅུ་གཅིག་པ་མཆོག་ཀློད་བཀྲོལ་ཡོང་བ་དང་། ༸རྒྱལ་བ་ཡབ་སྲས་གཉིས་བོད་ནང་ཞལ་འཛོམས་ཡོང་བའི་སྨོན་ལམ་བརྒྱབ་པའི་ཉེས་མིང་འོག་རྒྱ་ནག་གཞུང་གིས་འཛིན་བཟུང་བྱས་འདུག
དེ་ཡང་དཀར་མཛེས་ཁུལ་སེལ་ཤུལ་རྫོང་ཁོངས་ནས་ཡིན་པའི་གཞོན་སྐྱེས་རང་ལོ་ ༢༠ ཡིན་པ་དབང་ཆེན་ལགས་ཀྱིས་སེར་ཤུལ་དགོན་གྱི་རྒྱབ་རིར་ལབ་རྩེ་ཞིག་ཡོད་པ་དེར་ཁོར་ཡུག་གཙང་བཟོའི་ཉིན་མོར་བསང་གསོལ་དང་དར་ལྕོག་འཛུགས་པའི་སྐབས་ཀུན་གཟིགས་པཎ་ཆེན་རིན་པོ་ཆེ་སྐུ་ཕྲེང་བཅུ་གཅིག་པ་མཆོག་ཀློད་བཀྲོལ་ཡོང་བ་དང་། ༸རྒྱལ་བ་ཡབ་སྲས་གཉིས་བོད་ནང་ཞལ་འཛོམས་དགོས་སྐོར་སྐད་འབོད་དང་སྨོན་ལམ་བརྒྱབ་སྟེ་ཕྱིར་ལོག་ཡོང་བའི་སྐབས་ལམ་བར་དུ་བོད་ནང་གི་སྔ་དྲོའི་ཚོུད་ ༡༠།༣༠ ཙམ་ལ་ས་གནས་རྒྱ་ནག་ཉེན་རྟོག་པས་དབང་ཆེན་ལགས་དང་། བློ་བཟང་ལགས། ཡོན་ཏན་ལགས། དབང་པོ་སྐྱོན་ཅན་ཞིག་བཅས་མི་བཞི་འཛིན་བཟུང་བྱས་འདུག འཛིན་བཟུང་བྱས་པའི་བོད་མི་བཞི་པོ་དེ་དག་ལས་དབང་པོ་སྐྱོན་ཅན་དེ་ཕྱིས་སུ་གློད་བཀྲོལ་བཏང་ཡོད་འདུག་ཀྱང་གཞན་རྣམས་བཀག་ཉར་བྱས་འདུག་པ་མ་ཟད། ཁོང་རྣམས་ཀྱི་ལག་ཐོགས་ཁ་པར་ཡང་བཙན་འཕྲོག་བྱས་འདུག
ཁོང་རྣམ་པའི་གཉེན་ཉེ་ཚོ་ཐུག་འཕྲད་དུ་ཕྱིན་སྐབས་ཉིན་གྲངས་ ༡༥ ནང་ཚུད་ཁྲིམས་ཐག་གཅོད་ཀྱི་ཡོད་པས་དེའི་བར་དུ་ཕྱི་མི་ཐུག་འཕྲད་དུ་ཡོང་མི་ཆོག་སྐོར་བརྗོད་འདུག །
