༢༠༡༩ ཟླ་ ༥ ཚེས་ ༢ རེས་གཟའ་ཕུར་བུ།
༄༅། །ཕྱི་ལོ་ ༢༠༡༩ ཟླ་ ༥ ཚེས་ ༥ ཉིན་བོད་ཀྱི་བླ་ན་མེད་པའི་དབུ་ཁྲིད་འཛམ་གླིང་ཞི་བདེའི་དེད་དཔོན་ཆེན་པོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་༸སྐུ་བཅར་རྣམ་གྲྭ་ཕན་བདེ་ལེགས་བཤད་གླིང་ནས་ཇི་ལྟར་སྔོན་ནས་གསོལ་འདེབས་ཞུས་དོན་ལྟར། བཀའ་བཞེས་བཟང་པོ་སྨིན་སྩལ་ཐོབ་སྟེ་གོང་ཚེས་ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་བཅོམ་ལྡན་འདས་དཔལ་དུས་ཀྱི་འཁོར་ལོ་དང་འབྲེལ་བའི་རིས་མེད་མཁས་པའི་བགྲོ་གླེང་ཐོག་ཆིབས་སྒྱུར་དབུ་བཞུགས་མཛད་གཏན་འཁེལ་འདུག བགྲོ་གླེང་དེ་ཆེས་ཐོག་མ་ཡིན་ཞིང་། ཐེངས་འདིར་བགྲོ་གླེང་དེ་ནི་རི་བོ་དགེ་ལྡན་པའི་བསྟན་པའི་སྲོལ་འབྱེད་༸རྗེ་ཙོང་ཁ་པ་བློ་བཟང་གྲགས་པ་མཆོག་དགོངས་པ་ཆོས་དབྱིངས་སུ་ཐིམ་ཚུལ་བསྟན་ནས་བགྲང་བྱ་ ༦༠༠ འཁོར་བ་དང་བསྟུན་འཇམ་མགོན་རྒྱལ་བ་གཉིས་པ་རྗེ་ཙོང་ཁ་པ་བློ་བཟང་གྲགས་པའི་བཀའ་དྲིན་རྗེས་སུ་དྲན་པའི་ལས་འགུལ་གྱི་ཆ་ཤས་ཤིག་ཡིན་འདུག
བགྲོ་གླེང་ཉིན་དང་པོའི་དབུ་འབྱེད་མཛད་སྒོའི་ཚོགས་མགོན་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཆིབས་བསྒྱུར་གྱིས་དབུ་བཞུགས་མཛད་རྒྱུ་མ་ཟད། བགྲོ་གླེང་ཉིན་གཉིས་པའི་སྐུ་མགྲོན་གཙོ་བོར་བཀའ་བློན་ཁྲི་ཟུར་མཁས་དབང་སྐྱབས་རྗེ་ཟམ་གདོང་བློ་བཟང་བསྟན་འཛིན་རིན་པོ་མཆོག་དབུ་བཞུགས་གནང་རྒྱུ་དང་། བོད་མིའི་སྒྲིག་འཛུགས་ཀྱི་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་ཉིན་མཐའ་མར་ཕེབས་རྒྱུ་ཡིན་འདུག ཐེངས་འདིའི་རིས་མེད་མཁས་པའི་བགྲོ་གླེང་ཐོག་གསུང་བཤད་གནང་མཁན་ས་དགེ་བཀའ་རྙིང་དང་རྒྱལ་བ་ཇོ་ནང་པ། དེ་བཞིན་བུ་སྟོན་བཅས་ཀྱི་སྐུ་ཚབ་ཕེབས་རྒྱུ་ཡིན་འདུག་པ་བཅས།།
